Égzod
17 Tout le peup bann Zisraélit la kit le dézèr Sinn ; zot la avans ti pa ti pa, dapré sak Jéova té ordonn, é zot la kanp Refidim. Mé lavé poin de lo pou boir pou le peup. 2 Alor le peup la komans ralé èk Moiz é la di : « Donn anou de lo pou boir ! » Mé Moiz la di azot : « Poukosa zot i ral èk moin ? Poukosa zot i arèt pa tès Jéova ? » 3 Mé le peup lavé vréman soif, é li té anplègn kont Moiz é té i di : « Poukosa ou la fé kit anou Léjip ? Pou fé mor anou èk la soif, anou é osi nout bann garson é nout bann troupo ? » 4 Pou fini, Moiz la kriyé vèr Jéova : « Kosa mi doi fé avèk se peup ? Ankor in pe, é zot sar tué amoin koudgalé ! » 5 Alor Jéova la di Moiz : « Pas devan le peup é pran avèk ou detroi zansien anparmi le peup Israèl, é osi le baton ke ou la bat su le Nil. Pran ali dan out min é march. 6 Ma tienbo amoin devan ou, tèrla, su le gro roch, a Orèb. I fodra ou tap su le gro roch, de lo va sort dedan é le peup va boir ali. » Moiz la fé komsa, devan lé zieu bann zansien Israèl. 7 Donk li la apèl le landroi Masa é Meriba, parske bann Zisraélit la rod ralé pousé ansanm li é ke zot la tésté Jéova kan zot la di : « Jéova lé anparmi nou ou non ? » 8 Aprésa, bann Zamalésit lé vnu konbat Israèl a Refidim. 9 Alor Moiz la di Jozué : « Choizi bann bonom é alé konbat bann Zamalésit. Demin, mi sra anlèr le ti montagn, avèk le baton le vré Bondieu dan la min. » 10 Alor Jozué la fé sak Moiz lavé di ali é li la konbat bann Zamalésit. Moiz, Aaron é Our la mont anlèr le ti montagn. 11 Tank Moiz té i lès son bann min anlèr, bann Zisraélit té dominn, mé dèk li té lès son bann min tonbé, bann Zamalésit té dominn. 12 Kan bann min Moiz lé devnu lour, Aaron é Our la pran in galé é la mèt andsou li, é li la asiz desu. Aprésa, chakèn in koté, zot la tienbo anlèr son bann min, alor son bann min la pa fébli juskatank solèy la tonbé. 13 Donk avèk lépé, Jozué la abat bann Zamalésit é sak té soutien azot. 14 Alor Jéova la di Moiz : « Ékri sa dan le liv pou ke i oubli pa sa é répèt sa avèk Jozué : “Mi va éfas in bon foi pou tout desou le sièl la tras bann Zamalésit.” » 15 Aprésa Moiz la konstrui in lotèl pou sakrifis é la apèl sa Jéova-Nisi. 16 Li la di : « Parske bann min bann Zamalésit lé kont le tronn de Ja, Jéova sra an gèr kont banna jénérasion apré jénérasion. »