LESON 15

Kèl rol bann zansien néna dan la kongrégasion ?

In ansien i diskut èk bann pèrsonn dan la kongrégasion — Finlann

In ansien i donn in diskour — Zot i ansègn.

Bann zansien ki ankouraj bann pèrsonn dan la kongrégasion — Zot i ankouraj.

In ansien lé antrèn préché — Zot i prèch.

Nout bann zansien i form pa in group le prèt. Zot lé pa péyé pou sad zot i fé dan la kongrégasion. Kom dann tan premié sièk, sé bann zom ke lé proch koté Jéova, é zot lé choizi pou èt bann bèrjé dan la kongrégasion (Akt 20:28). Banna i ranpli bann kondision ki fo pou dirij é prann soin la kongrégasion, « pa parske zot lé oblijé, mé volontèrman ; pa parske zot i ièm tir in profi malonèt, mé avèk gran keur » (1 Pièr 5:1-3). Kosa banna i fé pou nou ?

Banna i sousi a zot de nou é i protèj a nou. Bann zansien i gid, i protèj é i èd la kongrégasion pou rès proch koté Jéova. Zot i dominn pa nou, parske zot i konpran ke sé Bondieu ke la donn a zot se rol inportan la ; O kontrèr, zot i èd a nou pou ke nou san a nou bien é ke nou lé kontan (2 Korintien 1:24). Kom in bèrjé i pran soin chak brebi ke li néna, banna i fé tout zot posib pou konèt chak pèrsonn dan la kongrégasion (Provèrb 27:23).

Banna i ansègn a nou koman fé la volonté Bondieu. Chak semèn, bann zansien i dirij bann rénion la kongrégasion pou rann nout foi plu for (Akt 15:32). Bann zom la, lé fidèl é zot i donn osi le méyeur de zot mèm dan la prédikasion. Zot i prèch osi èk nou, é zot i form a nou dann tout form prédikasion.

Banna i ankouraj a nou. Pou èd chakèn d’nou raproch ankor plus koté Jéova, bann zansien i diskut ansanm nou kan nou lé la Sal du Roiyom, oubien zot i vien voir a nou nout kaz. Zot lintansion, sé èd a nou é ankouraj a nou avèk la Bib (Jak 5:14, 15).

An plus bann travay ke zot néna dan la kongrégasion, in bonpe zansien néna in travay é bann résponsabilité familial ki demann a zot bokou d’tan é bonpe zéfor. Bann frèr la « ki travay dur » i mérit nout réspé (1 Tésalonisien 5:12, 13).