NOUT VI KRÉTIEN
Jéova i sov sak lo moral lé atèr
I ariv nout tout aoir chagrin dann kèr. Kan nou lé tris, i vé pa dir nou na poin la foi an Jéova. Mé Jéova la di, ké li mèm nadfoi li lé chagriné (Jén 6:5, 6). Mé kosa i fo fé si souvan nou lé tris, oubien si nou dor nou lèv komsa ?
Domand lèd Jéova. Jéova i sousi ali vréman si nou lé bien ou pa dan nout tèt, é koman i lé nout moral. Li koné kan nou lé éré é kan nou lé tris. Li konpran poukosa nou pans é nou rosan tèl ou tèl zafèr (Psom 7:9b). Sak lé plis inportan ankor, sé ké Jéova i trakas pou nou é li pé èd anou sobat kont nout chagrin, oubien la déprésion (Psom 34:18 ; ti not).
Fé ansort ou san aou bien dan out tèt. Kan nou oi tout an noir, sa i pé défand anou èt éré, é i pé fébli nout lamitié avèk Jéova. Pou sa mèm, lé inportan nou protèj nout kèr, sétadir lo moun nou lé vréman dédan nou mèm (Prov 4:23).
ROGARD LO VIDÉO KOMAN NOUT BANN FRÈR I VIV AN PÉ MÈM SI NÉNA LA DÉPRÉSION, APRÉSA RÉPOND BANN KÈSTION LA :
Kosa Nikki la fé kont la déprésion ?
Koman Nikki la rand ali kont li lavé bézoin oir in doktèr ? (Mat 9:12).
Koman Nikki la kont su Jéova ?