Ou pé gard out joi kan ou pran soin in moun ké ou èm

1-2. Si ou pran soin in moun ou èm, kosa Jéova i rosan pou ou ? (Provèrb 19:17 ; agard osi bann zimaj).

« ÈK MON madam i fé plis 32 zan nou lé marié », ala sak Jin-yeol, in frèr péi la Koré i rakont. « I fé sink zané ké mi pran soin d’èl. Kom èl na la maladi Parkinson, lé difisil pou èl boujé. Mi èm mon madam é moin lé kontan pran soin d’èl. Tou lé soir, èl i doi dor dan in li èspésial pou bann malad. Mi dor koté èl é nou ténir nout min pou dormi. »

² Pétèt ou pran soin in moun out famiy ou in kamarad ké lé malad ou ajé. Lé sur, ou lé kontan èdé parsk’ou èm ali. É kan ou pran soin sak ou èm, ou fé mont out lamour pou Jéova (1 Tim. 5:4, 8 ; Jak 1:27). Mé dèrièr sa, ou pas par bann malizé ké lé zot i romark pa. Nadfoi, ou na linprésion ké na poin pèrsone i konpran out soufrans. Somanké dovan lé zot ou rir, mé kan ou lé tousèl ou plèr (Ps. 6:6). Mèm si banna i oi pa sak ou lé antrinn pas dédan, Jéova li, li oi (agard Égzod 3:7). Out bann larm èk out bann sakrifis néna in bonpé la valèr pou li (Ps. 56:8 ; 126:5). Li romark tout sak ou fé pou pran soin lo moun ou èm. Pou Jéova, lé komsi li doi aou in zafèr é li promèt rékonpans aou pou tout sak ou fé (lir Provèrb 19:17).

3. Akoz té pé èt difisil pou Abraam èk Sara pran soin Téra ?

³ In paké domoun dan la Bib té doi pran soin in moun ké té fine vié oubien malad. Alon koz dési Abraam èk Sara. Kan zot la kit Our, Téra, zot papa, navé apépré 200 zan. Mé kan mèm sa, li la parti ansanm zot. Zot la fé 960 kilomèt pou ariv juska Arane (Jén. 11:31, 32). Lé sur, Abraam èk Sara té èm Téra, mé majine koman té pa fasil pou zot okip dé li pandan zot voyaj. An plis ké sa, zot té voyaj su lo do chamo oubien su bann bourik. Té doi èt vréman difisil pou Téra mont su bann zanimo-la é rès lontan dési. Lé normal ké nadfoi zot té fatigé é pétèt mèm uzé. Kinport sak la arivé, lé sur Jéova la done azot la fors zot lavé bézoin. Kom Jéova la fé pou Abraam èk Sara, li va done aou la fors é li va soutien aou (Ps. 55:22).

4. Kosa nou sa oir dann sujé-la ?

⁴ Sra pli fasil pou ou kontinié pran soin sak ou èm si ou néna la joi (Prov. 15:13). Rapèl aou ké ou pé gard out joi malgré tout sak ou viv (Jak 1:2, 3). Koman ou pé fé grandi out joi ? In fason fé sa, sé domand Jéova dan la priyèr èd aou trouv bann rézon pou gard la joi. Dann sujé-la, nou sa oir kosa sak i pran soin in moun i pé fé ankor pou gard zot joi. Nou sa oir osi koman lé zot i pé èd banna. An promié, alon oir poukosa sak i pran soin in moun la bézoin gard zot joi é akoz sa lé pa fasil.

POUKOSA I PÉ ÈT DIFISIL GARD LA JOI KAN OU PRAN SOIN IN MOUN

5. Akoz sak i pran soin in moun i doi gard zot joi ?

⁵ Si nou rès kalé su bann difikulté kan nou pran soin in moun, riskab nou nora pu la fors pou pran soin d’li (Prov. 24:10). É kan nou lé fatigé, nou pé èt moin janti é nou poura pa èd lo moun kom nou voudré. Poukosa i pé èt difisil gard la joi kan nou pran soin in moun ?

6. Akoz i pé arivé ké sak i pran soin in moun na pu lénèrji ?

⁶ Ou gingn pu fé rien parské ou na pu lénèrji. In sèr i apèl Leah i di : « Mèm kan i èspas bien, pran soin in moun i fatig in bonpé. An fin d’journé, mi gingn pu fé rien parské mi na pu la fors. Nadfoi, mèm pou répond in mésaj mi na pu kouraj. » Pou dot lé difisil trouv in tan pou zot oubien pou ropozé. In sèr i apèl Inés i rakont : « Mi dor pa asé. Na d’soir mi lèv apépré tou lé dé zèr d’tan, pou okip mon bèlmèr. É i fé d’zané nou la pokor pran vakans èk mon mari. » Na in pé i gingn mèm pa pas lo tan èk zot kamarad ou sinon aksèp désèrtin rèsponsabilité dan lasanblé, parské okip sak zot i èm i pran tout zot tan. Du kou, zot i pé san azot tousèl é zot na linprésion zot i gingn pu avans ni dovan ni dèrièr.

7. Akoz sak i pran soin in moun i pé santi azot koupab oubien chagriné ?

⁷ Ou pé aoir lo kèr chagriné oubien santi aou koupab. Jessica, in sèr, i di komsa : « Souvan mi di amoin ké sak mi fé pou mon papa, lé jamé asé. Dèk mi pran in ti tan pou moin, mi san amoin koupab, komsi mi pans rienk moin mèm. » Désèrtin i pans ké zot i fé jamé asé pou sak zot i èm. Nadfoi, zot lé o bout é zot i pans ké zot i gingn pu kontinié pran soin lo moun. Oubien ankor, kan zot lé fatigé, i pé ariv azot di ou fé in zafèr lé pa janti. Tousa i pé rand azot tris (Jak 3:2). Na détroi osi, zot kèr i fé mal parské zot i oi lo moun zot i èm tonb plizanpli malad. In not sèr k’i apèl Barbara i di : « Sak i fé mal amoin lo plis, sé oir la santé lo moun mi èm diminié in pé plis tou lé jour. »

8. Rakont in zistoir la arivé k’i mont kèl léfé bann ti mo lankourajman i pé aoir.

⁸ Ou na linprésion sak ou fé, na poin d’valèr pou lé zot. Akoz sa ? Parské lé rar domoun i di aou mèrsi é i félisit aou pou out dur travay é out sakrifis. Mèm inn ti mo lankourajman, i pé rand aou vréman éré (1 Tés. 5:18). In sèr k’i apèl Melissa i di : « Nadfoi, mi plèr èk lé nèr. Mé kan sak mi pran soin, i di amoin ‘Mèrsi pou tout sak ou fé pou moin’, sa i romont mon moral ! Bann ti parol-la i done amoin la fors èk kouraj pou kontinié pran soin d’zot. » In frèr i apèl Ahmadu, èk son madam, i okip zot ti niès k’i viv ansanm zot, èl i fé kriz lépilèpsi. Li èsplik sak li rosan kan èl i fé mont son rokonésans pou sak zot i fé : « Mèm si èl i konpran pa tout bann sakrifis nou fé pou èl, sa i touch amoin kan èl i di anou mèrsi ou kan èl i ésèy ékri : ‘Mi èm azot’. »

KOMAN GARD LA JOI

9. Koman sak i pran soin in moun i pé fé mont zot i koné zot limit ?

⁹ Rokonèt out bann limit (Prov. 11:2). Pou nout tout, nout tan é nout lénèrji lé limité. Donk i fo konèt kosa ou lé kapab fé ou pa, é somanké nadfoi fodra ou di non. É kas pa la tèt, lé normal ! Parské sa i fé mont ou koné out bann limit. Si na domoun i vé èd aou, aksèp èk gran kèr. In frèr i apèl Jay i di komsa : « Nou lé pa kapab fé tout zafèr an mèm tan. Si nou rod pa fé plis ké sak nou gingn fé, nou va gingn gard nout joi. »

10. Poukosa lé inportan ésèy konpran lo situasion ? (Provèrb 19:11).

¹⁰ Ésèy konpran lo situasion (lir Provèrb 19:11). Si ou fé sa, ou va gingn rès kalm kan lo moun ou èm, i di oubien i fé in zafèr pa janti. Ésèy konpran poukosa li aji komsa. Akoz zot maladi, na domoun i pé fé d’zafèr k’an tan normal zot noré jamé fé (Ékl. 7:7). Par égzanp, in moun ké dabitud lé trankil é janti, i pé vni dézagréab é rod disput sanm ou. Oubien li pouré komans fé kapris ou èt mové. Si ou èd in moun ké na in maladi grav, pétèt sré util pou ou aprann plis su son maladi. Plis ou va konpran son maladi, plis sra fasil pou ou konpran ké si li aji komsa, sé akoz son maladi é pa parské li vé èt komsa (Prov. 14:29).

11. Kèl zafèr inportan sak i pran soin in moun i doi fé tou lé jour ? (Psom 132:4, 5).

¹¹ Rand pli for out lamitié sanm Jéova. Nadfoi fodra mèt su koté désèrtin zaktivité pou gingn fé sak « lé pli inportan » (Fil. 1:10). É inn an parmi bann zafèr lo pli inportan sé out lamitié ansanm Jéova. Mèm si lo roi David té bien okipé, sak té kont lo plis pou li, té son ladorasion pou Jéova (lir Psom 132:4, 5). Lé parèy, mèm si ou lé bien okipé, ou doi pran lo tan lir la Bib é pri tou lé jour. In sèr i apèl Elisha i rakont : « Pou gard mon joi, mi pri é mi réfléchi an profondèr su bann gayar ti Psom. La priyèr lé parèy in boué sovtaj pou moin. Souvan dan la journé mi pri Jéova pou èd amoin rès kalm. »

12. Poukosa sak i pran soin in moun i doi pran lo tan pou okip zot santé ?

¹² Pran lo tan okip out santé. Kom ou lé bien okipé, ou pé trouv difisil pran lo tan pou okip out santé. Pou èt bien dan nout tèt é dan nout kor, i fo nou fé atansion sak nou manj é i fo fé légzèrsis. Donk mèm si ou na poin tro lo tan, lé inportan ké ou fé tousa pou out santé (Éféz. 5:15, 16). An plis ké sa, i fo ou dor asé (Ékl. 4:6). Bann spésialis lo sèrvo, i èsplik ké kan nou dor, sa i èd nout sèrvo pou répar ali son tousèl. In lartik lintèrnèta k’i koz su la santé i èsplik ké kan in moun na in bon somèy, li va santi ali moin strèsé, é li va rès kalm kan néna bann situasion difisil. Oubli pa, i fo osi ou pran lo tan fé sak ou èm (Ékl. 8:15). In sèr i èsplik kosa i èd aèl gard son joi. Èl i di : « Dèk i fé bo déor, mi sa bat karé pou profit in pé lo solèy. Tou lé moi mi ésèy kal in jour ansanm in kamarad pou fé inn ti zafèr ansanm. »

13. Akoz rir i fé anou du bien ? (Provèrb 17:22).

¹³ Oubli pa rir (lir Provèrb 17:22 ; Ékl. 3:1, 4). Rir lé bon pou lo kor é pou la tèt. Kan ou pran soin in moun, lé rar tout i èspas kom ou lavé prévu. Mé si ou gingn rir in bon kou dan bann situasion komsa, sra pli fasil pou ou suporté. É kan ou ri èk lo moun ou pran soin, i pé fé grandi lamour ké zot néna inn pou lot.

14. Kan ou koz su sak ou rosan èk in bon kamarad, koman sa i èd aou ?

¹⁴ Di sak ou rosan èk in bon kamarad. Malgré tout bann zéfor ou fé pou gard out joi, nadfoi ou va santi aou dépasé. Kan sa i ariv, sak i pé èd aou sé koz èk in bon kamarad ké va pa juj aou, oubien ké va pa sot an lèr dèk ou di in nafèr (Prov. 17:17). In moun k’i ékout é k’i di aou bann ti parol k’i ankouraj, sé pétèt jus sak i fo aou pou gard out joi (Prov. 12:25).

15. Poukosa kan ou koz su lo Paradi, sa i done aou la joi ?

¹⁵ Majine azot ansanm dann Paradi. Oubli pa, ou va pa okip in moun malad ou ajé pou toultan. Sé pa sak Jéova lavé prévu pou domoun (2 Kor. 4:16-18). « La vré vi » i tard pa pou arivé (1 Tim. 6:19). Kan ou koz èk lo moun ou pran soin su sak zot sa fé ansanm dann Paradi, sa va mèt la joi dan zot kèr (Izai 33:24 ; 65:21). Heather, in sèr, i rakont : « Souvan mi di èk lo bann moun mi okip ké nou va koud ansanm, kour ansanm é fé vélo ansanm. Nou va fé dopin é fé kui manjé pou tout sak nou èm ké va résusité. É aprésa nout tout, nou di mèrsi Jéova pou lèspoir li done anou. »

KOSA LÉ ZOT I PÉ FÉ

16. Koman nou pé fé pou èd sak i pran soin in moun dan nout lasanblé ? (agard osi lo zimaj).

¹⁶ Èd lo frèr ou la sèr komsa li gingn pran lo tan pou li mèm. Anou dan lasanblé nou pé propoz nout lèd pou pran soin lo moun malad ou ajé. Komsa, sak i èd ali va gingn pran lo tan ropozé é fé sak li la bézoin fé (Gal. 6:2). Pou gingn fé sa, néna détroi proklamatèr la fé in program ant zot. Natalya, in sèr k’i okip son mari paralizé i rakont : « In frèr nout lasanblé i vien inndé foi dan la somèn pou rès èk mon mari. Zot i prèch ansanm, zot i koz ansanm é mèm, zot i gard fim ansanm. Mon mari i aprésié vréman bann gayar ti moman-la, é osi sa i lès amoin lo tan ropozé é fé bann zafèr mi èm, kom promèn inn ti pé. » Détroi dan lasanblé i pé propoz rès la nuit èk lo moun malad ou ajé, komsa sak i èd ali va gingn bien dormi.

17. Koman nou pé fé pou èd sak i pran soin in moun kan néna la sal ou lasanblé ?

¹⁷ Èd lo frèr ou la sèr pandan la sal ou bann zasanblé. Pétèt in frèr ou in sèr i gingn pa tro suiv la sal ou kan na lasanblé, parské li doi okip in moun malad ou ajé. Sak lé dan lasanblé i pé propoz pou asiz a koté lo moun malad ou ajé, pandan tout lo program ou jus in bout. Si lo moun malad ou ajé lé oblijé rès son kaz, ou pé propoz alé ché li pou suiv la rénion, komsa sak i èd ali va gingn alé la sal.

18. Kosa nou pé fé ankor pou èd sak i pran soin in moun ?

¹⁸ Ankouraj azot é pri pou zot. Azot zansien pran lo tan pou ankouraj sak i pran soin in moun, é fé sa asé souvan (Prov. 27:23). É nout tout dan lasanblé, chak foi nou gingn alon félisit èk gran kèr tout sak i pran soin in moun. Nou pé osi domand Jéova, done banna la fors é èd banna gard zot joi (2 Kor. 1:11).

19. Kosa nout tout nou atand ?

¹⁹ Tard pa, Jéova va anlèv tout sak i fé souf anou é tout sak i rand anou tris. Nora pu la maladi èk la mor (Rév. 21:3, 4). « Sak i boit va sot kom in sèrf » (Izai 35:5, 6). Nou va pu soufèr akoz la viéyès oubien parské nou oi sak nou èm antrinn viéi ou antrinn soufèr akoz la maladi. É sa, parské « nou va pu rapèl anou bann zafèr dann pasé » (Izai 65:17). Juskatank Jéova va réaliz son bann joli promès, nou pé èt vréman sur ké li sra toujour la pou èd anou. Si nou kontinié kont dési li pou nou gingn la fors, li va toujour èd anou « tienbo for mèm avèk pasians é joi » (Kol. 1:11).