Akoz néna si tèlman la èn dan lo monn : Kosa la Bib i di ladsi ?

Dan laktualité nou antan rienk bann kozman dési la èn, la violans ant bann ras, bann domoun i tué lé zot akoz la èn, oubien la gèr.

• « Su bann rézo sosial néna plizanpli kozman dési la èn akoz la gèr ant Israèl é lo Amas, é osi akoz domoun k’i sava in pé tro loin dan zot bann zidé » (The New York Times, 15 Novanm , 2023).

• « Dépi lo 7 oktob, partou dési la tèr, bann kozman dési la èn é bann violans otour la èn, la agrav plis ankor. É sa i trakas in bonpé » (Dennis Francis, prézidan Lasanblé jénéral Nasion zuni, 3 Novanm , 2023).

Lé pa rienk jordi nou antan bann kozman la èn, bann violans é bann gèr. La Bib i amont ké dann tan pasé, domoun ‘ té lans zot kozman parèy bann flèch pou fé mal lé zot ’, é ké zot té èm la violans èk la gèr (Psom 64:3 ; 120:7 ; 140:1). Mé la Bib i èsplik osi ké la èn ké nou oi jordi, i vé dir in nafèr inportan pou nou tout.

Nout lépok lé marké èk la èn

La Bib i done dé rézon k’i amont akoz néna si tèlman la èn jordi.

1. 1. Li lavé anons ké noré in lépok ousa « lamour in bonpé domoun va rofroidi » (Matié 24:12). Olèrk èm azot, domoun noré bann konportman k’i amèn la èn (2 Timoté 3:1-5).

2. 2. Si la èn lé partou komsa jordi sé akoz lo mové linfluans ké Satan néna dési domoun. La Bib i di ké lo « monn antié lé dirijé par lo méchan » (1 Jan 5:19 ; Révélasion 12:9, 12).

La Bib i di osi k’i tard pa, Bondié va fé disparèt tout bann zafèr k’i fé nèt la èn dann kèr domoun. É li va éfas tout bann soufrans ké la èn la amèné ant domoun. Ala kosa la Bib i promèt :

• Bondié va « ésui tout larm dan zot zié, é nora pu la mor ; nora pu okin dèy, ni okin plint, ni okin doulèr. Bann zafèr navé avan, la disparèt » (Révélasion 21:4).