Kosa la Bib i di su maryaj ant deu moun pa mèm ras ?
Sak la Bib i di
Bondieu i otoriz in bonom èk in madam pa mèm ras maryé ansanm parske devan li tout ras lé parèy. Dapré la Bib « Bondieu i fé pa préférans ant domoun [...], ninport kèl ras li lé » (Akt 10:34, 35, Parole vivante).
Tout ras lé égal. Alon regard kosa la Bib i di lad’su é su maryaj.
Tout ras néna mèm rasinn
Tout domoun lé désandan Adan, le premié bonom é Èv son madam, « le momon tout sak lé vivan » (Jenèz 3:20). Akoz sa mèm la Bib i di su Bondieu : « Apartir in seul bonom, li la kré tout nasion » (Akt 17:26). Ninport kèl ras kisoi, tout domoun i fé parti in seul fami. Si ousa ou viv, néna in ta diférans ant domoun akoz larjan, oubien si néna mové jujman su la ras, kosa ou va fé ?
Pou gingn pran in bon désizion, koz ansanm inn é lot
Bondieu i aksèp san problèm in maryaj ant deu moun pa mèm ras, seulman pa tout domoun i voi sa komsa (Izai 55:8, 9). Si ou na lintansion maryé avèk in moun pa mèm ras ke ou, koz ansanm li su bann késtion la :
Si zot fami oubien zot lantouraj i mèt présion su zot, koman zot i sa jèr sa ?
Koman zot va èd zot zanfan pas pardsu bann mové jujman ?
Kan zot va koz ansanm inn é lot su bann késtion komsa, zot va gingn ansort azot dan zot maryaj (Provèrb 13:10 ; 21:5).