Dapré la Bib kosa i fo fé pou konèt in gayar vi d’fami ?

Sak la Bib i di

Dan la Bib néna bon konsèy i pe èd azot konèt in gayar vi d’fami. I gingn pa konté la kantité ménaj ke bann konsèy la, la rann sèrvis. Alon voir detroi :

1. Alé maryé devan la loi. Kan zot i maryé devan la loi zot i fé in langajman pou toultan é sa lé vréman inportan pou komans in gayar vi d’fami (Matieu 19:4-6).

2. Fémont lamour èk réspé pou inn é lot. Par égzanp, i fo ou fé bon manièr èk out madam oubien out mari kom ou voudré li fé èk ou (Matieu 7:12 ; Éfézien 5:25, 33).

3. Di pa dutou bann kozman i blès. Mèm si out mari oubien out madam la di ou la fé in nafèr la blès aou, koz èk jantiyès (Éfézien 4:31, 32). Dann Provèrb 15:1, la Bib i di : « In répons janti i fé fann la raj, mé in kozman i blès i fé mont la kolèr. »

4. Rès fidèl anvèr inn é lot. Rézèrv lamour ou néna dan out keur é bann lanvi séksuèl rienk pou out madam oubien out mari (Matieu 5:28). La Bib i di : « Tout domoun i doi réspèk maryaj. Le mari é le madam i doi rès fidèl anvèr inn é lot » (Ébreu 13:4, Parole de Vie).

5. Élèv zot bann marmay avèk lamour. Lès pa zot fé sak zot i ve, mé brutaliz pa zot non plu (Provèrb 29:15 ; Kolosien 3:21).