BANN JEUN I POZ AZOT BANN KÉSTION
Kosa mon fason abiyé i amont dési moin ?
Poukosa i fo ou fé atansion sak ou mèt dési ou ? Parské nout linj i amont kèl kalité domoun nou lé. Kèl mésaj out linj i fé pasé ?
Troi gran gob é koman pa tonb anndan
Gob no 1 : Lès zémision télé, radio, lintèrnèt, di aou koman abiyé.
Theresa, in jèn fi, i rakont : « Défoi, mi èm bien désèrtin fason abiyé parské moin la vu in bonpé publisité té i koz dési. Kan out lèspri lé plin èk bann foto domoun ké néna in kalité linj su zot, lé difisil pou pa fé kom toulmonn. »
Lé pa rienk bann fi lé vizé par bann publisité. Dan lo liv The Everything Guide to Raising Adolescent Boys lé ékri : « Bann garson osi i pé aoir anvi suiv la mod. Mèm dépi tan pti, bann publisité i viz azot. »
In choi pli méyèr : La Bib i di : « In moun la poin lèspèrians i kroi tout sak i di, mé lom k’i fé atansion i survèy chakèn son bann pa » (Provèrb 14:15). Kom i mont dann prinsip la, aprann bien réfléchi su sak ou oi dan bann publisité. Par égzanp, kan sé bann publisité pou bann linj « sèksi », domand aou :
« Si mi suiv la mod la, kisa i an profit vréman ? »
« Kèl kalité d’vi banna va di moin néna ? »
« Èské lo kalité d’vi la i kol vréman avèk moin, amoin é mon fason pansé ? »
Konsèy dési la mod : Pran in somèn, rogard bien mèm bann publisité, bann zémision télé, radio, lintèrnèt, é dot zafèr ankor k’i égzis é k’i koz rienk su la mod. Kèl kalité d’vi banna i pous anou pou aoir ? Èské anndan la néna bann mésaj an misouk ké lé fé pou done aou lo santiman k’ou la bézoin suiv in mod ? In jèn fi, k’i apèl Karen i di : « Pou done lèr ké nou lé parfé, néna in bonpé présion i pèz su nou, pou ké nout fason abiyé lé parfé é pou fé dantèl èk in kor “parfé”. Kom bann domoun k’i fé publisité la fine Kom bann domoun k’i fé publisité la bien konpri lo zafèr, alor lé fasil pou zot trap bann jèn. »
Gob no 2 : Suiv la mod pou fé kom tout domoun.
Manuel in jèn garson i di : « Si in linj lé a la mod, alor tout domoun va mèt dési zot. Si ou fé pa parèy, domoun va juj aou. » Anna, in jèn fi, lé dakor èk sa : « Lo problèm sé pa la mod mé sé parské ou fé pa kom tout domoun. »
In choi pli méyèr : La Bib di : « Lès pu zot influansé par monn la » (Romin 12:2). Pou suiv konsèy la, gard bien out bann linj dann larmoir é domand aou :
« Kosa i pous amoin surtou choizi tèl ou tèl linj ? »
« Kèl linportans aoir in linj la mark néna pou moin ? »
« Èské mi rod pou fé dantèl dovan lé zot èk mon linj ? »
Konsèy dési la mod : Olèrk pans ké na rienk dé solusion— suiv la mod (é ké lé zot i aksèp amoin) oubien pa suiv la mod (é ké lé zot i rojèt amoin) — réfléchi su in troizièm solusion : aoir asé konfians an ou pou pa suiv lo fason pansé lé zot. Plis ou va santi aou a lèz, moin ou nora anvi suiv lé zot.
Gob no 3 : Pans « plis lé sèksi, plis lé gayar ».
Jennifer i di : « Pou koz fran, nadfoi i ral amoin mèt inn ti linj in pé sèksi, kom in linj tro kourt, tro kolan ou i fé mont mon bann form ».
In choi pli méyèr : La Bib i di : « Ké zot boté lé pa sak i oi [...], mé ké sa lé anndan lo kèr lo moun » (1 Pièr 3:3, 4). Pou suiv konsèy la, pans sak lé pli joli : in linj i atir lo zié oubien in moun èk joli kalité ?
Konsèy dési la mod : Kan nou fé pa romark anou par lé zot, sa lé kom in « linj » vréman joli ké nou mét su nou. Kan nou lé modès, sa lé kom in linj vréman joli ké nou port su nou. Jordi lé vré, domoun i èm fé romark azot in bonpé. Mé réfléchi su légzanp la :
Èské ou la fine koz èk in moun ké lé kom in radio san pil, li arèt pa kozé, li koz rienk su li mèm ? Lo pli maléré, somanké lo moun i rand pa li kont ké sak li fé i atir pa lé zot !
Bann linj, bann fason kozé, i pé atir latansion su ou si tèlman ké lé zot i fini par rojèt aou.
Kan ou abiy aou èk bann linj lé pa korèk, ou dévien kom lo moun i koz anlèr la. Out bann linj i fé pas kom mésaj « gard amoin », sa i pouré fé kroir domoun ké ou la poin konfians an ou oubien ké ou pans rienk aou, ou sinon lé dé. Sa i pouré fé kroir domoun ké ou lé paré pou fé tout, pou ké lé zot i rogard rienk aou, mèm sak ou voudré pa i rogard aou.
Olèrk fé publisité pou in zafèr ké ou vand pa, ésèy rès modès. Monica i di : « Èt modès i vé pa di ké ou doi abiy kom out mémé. Sa i vé jus dir ké ou néna rèspé pou ou é pou lé zot. »