Kosa i lé in profési ?

Sak la Bib i di

In profési lé in parol inspiré par Bondié, é donk sé in révélasion ké Bondié la doné. Dan la Bib lé ékri, « sé lèspri sin la pous » bann profèt pou ké zot i « di bann parol Bondié » (2 Pièr 1:20, 21). Donk, in profèt sé in moun k’i gingn lo mésaj Bondié é li fé konèt sa, èk lé zot (Akt 3:18).

Koman bann profèt, la gingn bann zinformasion-la èk Bondié ?

Bondié la ansèrv diféran fason pou transmèt son pansé èk bann profèt :

• La gingn lo mésaj par ékri. La ariv in lokazion, Bondié la fé sa, li la done Moiz lé dis komandman ké lété ékri (Égzod 31:18).

• La ansèrv bann zanj pou di lo mésaj. Par égzanp, Bondié la ansèrv in lanj pou done Moiz lo mésaj li té doi transmèt lo Faraon péi Léjip (Égzod 3:2-4, 10). Kan lété vréman inportan choizi kèl mo i falé utilizé, lèr-la, Bondié la ansèrv bann zanj pou di son mésaj, par égzanp kan li la di Moiz : « I fodra ou ékri bann parol-la, parské dapré bann parol-la, mi pas in lakor avèk ou é avèk Israèl » (Égzod 34:27)a.

• Bann vizion. Nadfoi, lo profèt té gingn in vizion alor ké li té révéyé é bien konsian sak té i èspas (Izai 1:1 ; Abakuk 1:1). Défoi, désèrtin vizion, lavé lèr si tèlman vré, ké sak té oi sa, té vé aji pou fé kèkchoz dan lo vizion (Luk 9:28-36 ; Révélasion 1:10-17). Dan dot ka, lo moun té gingn in vizion, alor ké li lété kom dan in rèv évéyé (Akt 10:10, 11 ; 22:17-21). Bondié la osi fé konèt son mésaj par lo moiyen bann rèv, alor ké lo profèt lété dan in gro somèy (Danièl 7:1 ; Akt 16:9, 10).

• La dirij zot pansé. Bondié la aji dési la pansé son bann profèt pou ké zot i transmèt son mésaj, kom i di dann vèrsé-la : « Toute l’Écriture est inspirée de Dieu. » Kan i di « inspirée de Dieu » sa i vé dir osi « soufflée par Dieu » (2 Timoté 3:16 , lo ti not, Bible avec notes et références). Bondié la utiliz son lèspri sin, ou la fors ké li ansèrv pou fé son volonté, pou « souffler » son bann zidé dan la pansé son bann sèrvitèr. Bondié té i done lo mésaj, é lo profèt té transmèt sa, dan son prop fason kozé (2 Samuèl 23:1, 2).

Èské bann profési sé rienk pou fé konèt sak va arivé dan lavnir ?

Non, bann profési la Bib lé pa fé sèlman pou anons sak va èspasé pli dovan. Parkont, la plipar bann mésaj ké Bondié la fé konèt, lé pou lavnir, mèm si lé pa di in fason dirèk. Par égzanp, bann profèt Bondié, plizièr kou, zot la mèt an gard bann Zisraélit kont bann mové chemin zot té i pran. Bann profèt té avèrti lo pèp, an mèm tan zot té anons bann bénédiksion ké banna té sar gingné si zot té obéi Bondié, mé osi bann malèr té sar arivé si zot té obéi pa (Jérémi 25:4-6). Lavnir bann Zisraélit té dépan kèl chemin zot té sar choizi (Détéronom 30:19, 20).

Désèrtin profési la Bib lé pa bann parol pou prédi lavnir

• In kou, kan bann Zisraélit la domand lèd Bondié, li la anvoiy in profèt pou èsplik azot ké, kom zot la vé pa obéi son bann komandman, li té sar pa èd azot (Juj 6:6-10).

• Kan Jézu la koz èk lo madam samaritin, li la di aèl plin zafèr su son vi pasé, bann zafèr li té koné, parské Bondié lavé fé konèt ali. Lo madam samaritin la rokonèt ké jézu lété in profèt, mèm si li lavé pa fé bann prédiksion (Jan 4:17-19).

• Kan la èspas lo prosé Jézu, son bann zènmi la kouv son figur, la tap ali é la di ali : « Si toué lé in Profèt ! Di kisa la tap aou ? » Zot té vé pa ké Jézu té prédi lavnir, mé ké li té ansèrv la puisans Bondié pou di kisa lavé tap ali (Luk 22:63, 64).