Kosa bann Témoin Jéova i pans dési lantèrman ?
Nout bann kroiyans ladsi, é sak nou fé kan néna in lantèrman, lé bazé dési bann prinsip la Bib. Ala détroi poin :
Lé normal nou plèr, kan in moun nou èm i mor. Bann disip Jézu té i plèr osi, kan zot té i pèrd in moun zot lantouraj (Jan 11:33-35, 38 ; Akt 8:2 ; 9:39). É donk, pou nou, in lantèrman lé pa in lokazion pou fé la fèt (Éklézias 3:1, 4 ; 7:1-4). Kan néna in lantèrman, sé plis in lokazion pou partaj la doulèr é soutien sak la pèrd kèlkin (Romin 12:15).
Bann mor i koné pu rien. Kinport landroi nou abit ou nout kiltir, nou rojèt bann koutum ou bann pratik bazé su in kroiyans, ké na poin dan la Bib, k’i amont ké bann mor i kontinié viv é ké zot lé kapab aji dan la vi bann domoun (Éklézias 9:5, 6, 10). Bann koutum-la, sé kan i fé la véyé pou lo mor, kan i fé bann gran sérémoni pou lo mor, kan i fèt la dat lanivèrsèr lo moun mor, kan i done sakrifis pou bann mor, kan i koz avèk bann mor oubien i domand azot pou égzos in zafèr, é kan i fé sérémoni pou sak lé vèv. Nou rojèt tout bann koutum é bann pratik-la, parské nou vé obéi lo komandman biblik-la : « Sépar azot, [...] é touch pu lo zafèr souyé » (2 Korintien 6:17).
Néna in lèspoir pou sak lé mor. La Bib i amont ké nora in rézurèksion é in jour va arivé ousa nora pu la mor (Akt 24:15 ; Révélasion 21:4). Parèy kom bann promié krétien, gras lèspérans-la, lo fason nou fé bann zantèrman lé plin d’rèspé, lé modès é i kontant Bondié (1 Tésalonisien 4:13).
La Bib i ankouraj anou pou èt modès (Provèrb 11:2). Nou profit pa in lantèrman pou « fé lo vantar » par rapor larjan nou néna oubien nout pozision sosial (1 Jan 2:16). Nou organiz pa bann supèr gran zantèrman rienk pou lamuzman oubien pou fé mont ké lo sèrkèy la kout gro larjan ou pou fé oir ké nou mèt bann gro linj la mark vréman chèr, tousa pou ké domoun i rès baba dovan nou.
Nou ésèy pa fors domoun pou aksèp nout bann kroiyans. An rapor èk sa, nou suiv prinsip la Bib-la : « Chakèn d’nou va rand kont Bondié pou li mèm » (Romin 14:12). Mé, si nou néna lokazion, nou ésèy èsplik nout bann kroiyans « avèk dousèr é in gran rèspé » (1 Pièr 3:15).
Koman i èspas lantèrman in Témoin Jéova ?
Landroi : Si in famiy i vé, li pé choizi kèl landroi i fé lantèrman, kom in Sal lo Roiyom, in sant funérèr, la kaz in moun, dan in sant krématoir oubien in simitièr.
Diskour souvnir : In diskour lé fé pou rékonfort sak lé an dèy é pou èsplik sak la Bib i di su bann mor é su lèspérans la rézurèksion (Jan 11:25 ; Romin 5:12 ; 2 Pièr 3:13). Lo diskour i pé rapèl bann joli kalité ké lo moun mor lavé, é tir osi bann loson ankourajan su la vi lo moun, ké la rès fidèl juska la fin (2 Samuèl 1:17-27).
I pé chant osi inn ti chanté bazé su la Bib (Kolosien 3:16). É i fini lo diskour, par in priyèr, k’i rékonfort sak lé la (Filipien 4:6, 7).
Fo done in moné oubien i fé la kèt : Bann zévènman kom lo batèm, lo mariaj, ou dot zafèr ankor, lé gratuit, mèm pou bann zantèrman. Nou fé pa la kèt osi pandan bann rénion ou bann zasanblé (Matié 10:8).
Kisa i pé vni : Nou lé kontan akèy bann domoun ké lé pa Témoin Jéova é k’i vé vni lantèrman dan in Sal lo Roiyom. Parèy kom nout bann rénion é nout bann zasanblé, ninport kèl moun i pé vni ékout lo diskour ké lé fé pou in lantèrman.
Èské bann Témoin i sava lantèrman dot rolijion ?
Chak Témoin i doi désid par li mèm si li vé alé in lantèrman in not rolijion, é pou sa li va baz ali su son konsians gidé par bann prinsip la Bib (1 Timoté 1:19). Mé par rapor tout sak lo rolijion i organiz pou lantèrman, nou va fé okin zafèr ké lé an dézakor èk la Bib (2 Korintien 6:14-17).