Kisa i lé larkanj Michèl ?

Sak la Bib i di

Michèl, ké désèrtin rolijion i apèl « Sin Michèl », sé in non k’i done Jézu avan é apré son vi su la tèr.a Michèl la disput ansanm Satan apré k’Moiz té fine mor, é li la èd in lanj pou transmèt profèt Danièl in mésaj Bondié (Danièl 10:13, 21 ; Jud 9). Michèl i port bien son non, k’ i vé dir « Kisa lé kom Bondié? » parské li soutien la dominans Bondié é li batay kont son bann zènmi (Danièl 12:1 ; Révélasion 12:7).

Ala détroi zafèr k’i amont bien ké Jézu sé larkanj Michèl.

• Michèl sé « larkanj ». (Jud 9) Lo tit « larkanj », k’i vé dir « chèf bann zanj », i trouv ali rienk dann dé vèrsé la Bib. Chak foi, i di ‘in larkanj’ é pa ‘bann larkanj’, sa i vé dir néna rienk in sèl lanj néna so tit la. Inn an parmi bann vèrsé la, i di ké lo Ségnèr Jézu résusité va « désand dépi lo sièl avèk in kri pou komandé, avèk in voi larkanj » (1 Tésalonisien 4:16). Jézu néna « in voi larkanj » parské sé li larkanj, Michèl.

• Michèl i komand in larmé bann zanj. « Michèl é son bann zanj la konbat lo dragon », Satan (Révélasion 12:7). Michèl néna in gran pouvoir dann sièl, parské i apèl ali « inn an parmi bann gran prins » é « lo gran prins » (Danièl 10:13, 21 ; 12:1). So bann tit la i amont ké li lé « lo chèf k’i komand tout bann zanj », dapré David Aune, lèspésialis Nouvo Tèstaman.

  Dapré la Bib, anplis Michèl, néna rienk in not moun i komand su in larmé d’zanj. Èl i di komsa « lo Sègnèr Jézu va révèl ali avèk son bann zanj puisan dann in gran fé k’i flanb, kan li va fé vnir son vanjans » (2 Tésalonisien 1:7, 8 ; Matié 16:27).Jézu « la mont dann sièl, é la done ali dominans su bann zanj é bann zotorité é bann puisans » (1 Pièr 3:21, 22). Lé pa posib kroir ké Bondié noré mèt Jézu èk Michèl pou komand bann sin zanj, kom dé ladvèrsèr. Okontrèr, lé pli lojik ké Jézu èk Michèl, sé lo mèm moun.

• Michèl « va lèvé » pandan « lépok (...) in détrès » ké la jamé arivé (Danièl 12:1). Dann liv Danièl, i ansèrv souvan bann mo « va lèvé » pou koz su in roi k’i mèt ali dobout pou fé in zafèr èspésial (Danièl 11:2-4, 21). Jézu Kris, k’i apèl « La Parol Bondié », va fé in zafèr èspésial kom « Roi bann roi » kan li va fini èk tout bann zènmi Bondié, é k’li va protèj son pèp (Révélasion 19:11-16). Li va fé sa kan nora in « gran détrès kom la jamé vu dépi k’lo monn la komansé » (Matié 24:21, 42).