Koman bann Témoin Jéova i oi lo divors ?
Nou lé dakor avèk sak la Bib i di dési lo mariaj èk lo divors. Bondié la mèt an plas lo mariaj, in lien ant in bonom é in madam, é li té vé ké sa i dur pou toultan. Lo sèl rézon ké nou trouv dan la Bib, k’i pous dé moun pou divorsé, sé kan néna péché sèksuèl (Matié 19:5, 6, 9).
Èské bann Témoin Jéova i èd bann domoun ké néna problèm dan zot mariaj ?
Oui, é zot i fé sa plizièr fason :
Nout bann publikasion. Laddan néna souvan bann zartik k’i èd bann moun marié ranfors lo lien ant zot, mèm si andiré i gingn pu fé rien. Par égzanp, gard bann zartik-la : « Tenir son engagement envers son conjoint », « Comment pardonner », « Comment rétablir la confiance entre conjoints ».
Bann rénion é bann zasanblé. Kan néna bann rénion é bann gran zasanblé, nou oi ansanm bann konsèy util dan la Bib pou bann moun marié.
Bann zansien. Zot i soutien bann moun marié, mé dapré lo bézoin ké chakèn néna, é surtou zot i atir latansion banna dési bann vèrsé la Bib, kom Éfézien 5:22-25.
Èské bann zansien i doi done zot lakor pou ké in Témoin i gingn divorsé ?
Non. Mèm si bann moun marié i domand lèd bann zansien, banna na poin lo droi di azot sak zot i doi fé (Galat 6:5). Parkont, si in moun i divors alork na poin okin rézon biblik pou fé sa, li lé pa lib romarié ali dapré la Bib (1 Timoté 3:1, 5, 12).
Kan dé moun marié i sépar azot, koman bann Témoin Jéova i oi sa ?
La Bib i ankouraj bann moun marié kontinié rès ansanm inn é lot, mèm si la situasion lé pa fasil (1 Korintien 7:10-16). Lé posib démay kont bann difikulté kan i pri èk in kèr sinsèr, kan i mèt an pratik bann prinsip la Bib é kan i fé mont lamour pou inn é lot (1 Korintien 13:4-8 ; Galat 5:22).
Malgrésa, kan néna bann situasion vréman grav, kom par égzanp bann zafèr ékri andsou-la, désèrtin krétien la désid sépar azot avèk zot mari ou zot madam.
Kan i done pa la famiy sak li la bézoin pou viv (1 Timoté 5:8).
Kan néna la violans vréman grav dan la famiy (Psom 11:5).
Kan lé klèr ké la foi inn dan la famiy é son lamitié èk Bondié, lé an danjé. Par égzanp, lo mari oubien lo madam i pé ésèy fors lot pou dézobéi Bondié. Alor sak lé an danjé i pé désid sépar ali, parské sé lo sèl moiyen « obéi Bondié olèrk bann zom » (Akt 5:29).