BANN JEUN I POZ AZOT BANN KÉSTION
Kosa i fo fé si in kamarad la blès amoin ?
Sak i fo konèt
Kom nou lé toultan an kontak ansanm inn é lot, lé oblijé néna problèm. Kom nou lé inparfé, in kamarad — pétèt osi in moun ké ou konsidèr kom out méyèr kamarad — i pé di oubien i pé fé in zafèr k’i blès aou. Mé aou osi, ou lé inparfé é pou èt onèt, èské la jamé ariv aou blès in moun ? (Jak 3:2).
Dési lintèrnèt, lé pli fasil èt blèsé. David, in jènjan, i di : « Kan ou sava dési lintèrnèt é ou tonb dési bann foto in kamarad ké lé dan in fèt, ou pé domand aou, akoz ou lé pa invité. É lèr-la, pétèt ou san aou trayi é ou lé tris »
Ou pé aprann jèr lo problèm.
Sak ou pé fé
Réfléchi dési ou mèm. La Bib i di : « Fach pa ou pou inn ti rien ditou ; parské sé rienk domoun bèt i fé lo gro kèr » (Éklézias 7:9).
« Nadfoi, i fo in pé d’tan pou rand anou kont, ké lo zafèr la kontray anou, lé inn ti rien ditou » (Alyssa).
Kosa ou pans ? Èské ou lé in pé gro kèr ? Èské ou gingn travay dési ou, pou suport bann défo lé zot ? (Éklézias 7:21, 22).
Réfléchi su bann bienfé lo pardon i aport. La Bib i di : « In moun [...] i mérit in gran rèspé kan li pas dési in blèsur » (Provèrb 19:11).
« Mèm si ou néna in bon rézon pou plingn aou, lé bien ké ou pardone èk gran kèr. Sa i vé dir ké la pa bézoin, rapèl anou toultan sak lot moun la fé, pou fors ali èskuz ali, chak foi ou fé rolèv lo zafèr. Kan ou pardone, ou arvien pi dési » (Mallory).
Kosa ou pans ? Èské lé vréman grav sak la arivé ? Èské ou gingn pardoné é kontinié rod la pé ? (Kolosien 3:13).
Kan ou néna in kamarad, é ké ou koz su chak problèm zot i rankont, sé komsi nou arèt pa rouvèr é fèrm la port dan la piès ké lé chofé é nou fé rant lèr fré anndan.
Majine lot moun. La Bib i di : « É rod pa rienk zot zintéré azot, mé osi bann zintéré lé zot » (Filipien 2:4).
« Kan dé moun lé kamarad ansanm, néna lamour é lo rèspé, sa sé bann bon rézon pou règ vitman bann problèm, parské lé dé la travay pou aoir dalon komsa. La fine fé gro zéfor pou fé grandi lamitié-la é nou vé pa pèrd sa » (Nicole).
Kosa ou pans ? Èské ou trouv néna in bon lidé, dan sak lot moun i pans ? (Filipien 2:3).
Dé ti mo pou fini : Kan in moun i blès aou, si ou aprann jèr out bann santiman, sa va bien ansèrv aou kan ou sra pli gran. Akoz ou komans pa aprann fé sa dépi koméla mèm ?