Fumé : èske lé in péché ?

Sak la Bib i di

La Bib i parl pa su sigarèt ni lé zot fason konsom le tabaa. Parkont, èl i donn bann prinsip ki mont ke Bondieu lé pa dakor èk bann mové zabitud ki détrui la santé : donk pou Bondieu, fumé sé in péché.

Le réspé pou la vi. « Bondieu [...] i donn tout domoun la vi é le souf » (Akt 17:24, 25). Parske la vi lé in kado Bondieu, nou doi pa fé rien ki anpèch anou viv le plu lontan posib, kom par égzanp fumé. Fumé, sé inn anparmi bann zafèr ki tué le plus dan le monn, alor ki pe èt évité.
Lamour pou nout prochin. « Ou doi èm out prochin kom ou mèm » (Matieu 22:39). Kan in moun i fum anparmi dot moun, li mont ke li na poin lamour pou lé zot. Sak i fum pa, mé ki réspir souvan la fumé sigarèt lé zot, ou dot produi, i pe gingn plus ankor bann maladi ke bann fumeur i gingn.
I fo èt sin. « Prézant zot kor kom in sakrifis ke lé vivan, sin é ke Bondieu i pe aksépté » (Romin 12:1). « Alon rann anou pur de tout sak i sali le kor èk léspri, pou vni de pluzanplus sin dan la krint Bondieu » (2 Korintien 7:1). Le kor lé pa fé pou fumé é sa i akord pa avèk sak i demann anou, èt sin sétadir pur, parske sak i konsom taba i pran éspré bann poizon ki détrui zot santé.

Pran zamal oubien dot drog jus pou le plézir. Èske la Bib i parl de sa ?

Dan la Bib i parl pa zamal (ki apèl osi « zèrb ») ni dot drog komsala. Mé èl néna bann prinsip, ki kondane pran jus pou le plézir, bann drog ki rann anou ésklav. An plus ke sak nou vièn voir, ala dot prinsip ke i aplik pousa :

Lé inportan kontrol nout bann kapasité pou réfléchi. « Ou doi èm Jéova out Bondieu [...] èk out pansé an antié » (Matieu 22:37, 38). « Gard tout zot rézon » (1 Pièr 1:13). Kan in moun i drog ali, lé pa posib bien kontrol son bann kapasité pou réfléchi. In ta d’moun i vien mèm ésklav de sa. Zot i pans rienk pou rod le drog é konsom ali, olèrk kal zot léspri su bann zafèr ke lé bon (Filipien 4:8).
Réspèk bann loi. « Obéi bann gouvèrnman é bann zotorité » (Tit 3:1). Dan bonpe péi, la loi i intèrdi konsom la drog. Si nou ve fé plézir Bondieu, nou doi obéi bann zotorité (Romin 13:1).

Le taba èk zot santé

L’Organizasion mondial la santé i pans ke bann maladi i gingn kan i fum i tué tou lé zan apepré 6 000 000 d’moun, ladan néna plus 600 000 moun i fum pa ke i mor akoz zot i réspir la fumé sigarèt lé zot. Ala detroi mové léfé taba su la santé bann fumeur é su sak zot lantouraj :

Kansèr. Dan la fumé taba néna plus 50 zéléman chimik ki donn kansèr. L’Encyclopædia Britannica i ésplik ke la fumé la « i sré résponsab 90 % bann ka kansèr poumon ». Li pe donn osi bann kansèr dot zorgane kom la bouch, la traché, lezofaj, la gorj, le larinks, le foi, le pankréa èk la vési.

Bann maladi ki anpèch bien réspiré. La fumé taba i pe fé gingn plus bann maladi ki anpèch bien réspiré kom la pnemoni èk la grip. Pou bann marmay, réspir la fumé sigarèt lé zot i provok lasm é in tou ki pas pa, é i anpèch bann poumon bien dévlopé é fé zot travay.

Bann maladi le keur èk la sirkulasion le san. Bann fumeur i riskab plus fé in l’AVC oubien gingn bann maladi le keur. Lé fasil pou le monoksid karbonn ke lé produi par le taba, pas dan bann poumon pou alé dan le san, ousa li pran la plas loksijèn. Pou ranplas loksijèn ki mank dan le kor, le keur i doi travay plus ankor.

Bann zéfé ke néna su la grosès. Le bann ti bébé ke le momon i fum kan li lé ansint, i riskab plus nèt avan tèrm, èt chétif kan li nèt oubien gingn bann malformasion kom in bèk lièv. Bann bébé la, i pe soufèr osi akoz zot i gingn pa bien réspiré oubien zot i pe mor toudinkou san èt malad.

a Tèrla fumé i ve dir réspir éspré la fumé sigarèt, sigar, la pip oubien pip a o. Mé bann prinsip la, lé valab osi pou taba pou maché oubien sak i aspir par le né, bann sigarèt éléktronik ke néna la nikotinn dedan é dot zafèr komsa.