Kan i done : kosa la Bib i di ladsi ?
Sak la Bib i di
Done èk bon kèr é pou bann bon rézon, ala kosa la Bib i ankouraj anou fé. Li mont ké sa i kontant sak i gingn mé osi sak i done (Provèrb 11:25 ; Luk 6:38). Jézu la di : « Néna plis kontantman kan i done ké kan i gingn » (Akt 20:35).
Kan nou done é k’i fé plézir Bondié
Bondié i èm sak i ral pa pou doné. La Bib i di : « Ké chakèn i fé kom li la désidé dan son kèr, pa avèk rogré ou parské li san ali oblijé, parské Bondié i èm sak lé kontan doné » (2 Korintien 9:7).
Dan lo « ladorasion » ké Bondié lé dakor avèk, lé vréman inportan done èk bon kèr (Jak 1:27). In moun k’i èd èk gran kèr sak na poin gran choz, i travay min dan la min ansanm Bondié. É kan li fé sa, pou Bondié sé kom si lo moun la fé ali krédi (Provèrb 19:17). La Bib i fé mont, sé Bondié li mèm va ranbours lo moun k’i done (Luk 14:12-14).
Kan nou done é k’i fé pa plézir Bondié
Kan nou done é k’lé fé par intéré, kom par égzanp :
Pou fé romark anou (Matié 6:2).
Pou gingn in zafèr an échanj (Luk 14:12-14).
Pou gingn la vi pou toultan (Psom 49:6, 7).
Kan nou done é k’i ankouraj bann fason d’fé ké Bondié lé pa dakor avèk. Par égzanp, i sré pa bon done in moun larjan pou k’li sa joué avèk, pou k’li drog ali, oubien pou k’li boir plis k’i nanfo (1 Korintien 6:9, 10 ; 2 Korintien 7:1). Lé parèy, i fodré pa nou done larjan in moun k’i vé pa travay, alor k’li lé kapab (2 Tésalonisien 3:10).
Kan nou done é k’i anpèch anou andos bann rèsponsabilité ké Bondié la done anou. La Bib i amont ké sak néna lotorité dan la famiy i doi done banna sak zot la bézoin pou viv (1 Timoté 5:8). I sré pa bien k’li done bonpé lé zot, é k’apré sa, i rès pu ali asé pou son prop famiy. Dayèr Jézu la kondane sak té rofuz utiliz zot larjan pou pran soin zot bann paran ké té fine vié, soidizan parské tout sak zot lavé lété « in lofrann ké lété pou Bondié » (Mark 7:9-13).