Bann prézantoir « kom in témoiniaj pou tout bann nasion »

I fé plis dizan, domoun lé atiré par nout bann prézantoir. Zot lé fasil pou rokonèt, kinport ousa nou sava. Zot lé fé d’inn manièr lé fasil pou ansèrvir. Surman, zot i sra dakor èk in sèr an Pologn, Asenata, k’i di : “Bann prézantoir lé sinp, mé lé joli. Lé fasil mèt azot an plas é débouj azot.”

Èské ou la fine domand aou koman bann prézantoir la lé fé ?

In modèl jus kom k’i fo

An 2001, lo Kolèj Santral la di zot lété dakor pou ké bann frèr é sèr la Frans, i komans tès détroi nouvo fason préché dan bann zandroi piblik. An parmi, navé prézantoir. Zot la tès détroi modèl. Par égzanp, zot la aranj bann valiz èk bann chario komision, pou èspoz nout bann liv é pou aoir détroi sou la min. O final, la filial la Frans la choizi in sèl modèl, é la ansèrv ali kèkzané.

Bann frèr la Frans lété tro kontan oir bann bon rézulta sa la doné. Sé pou sa, an 2011, dan la vil Nou York (Zéta Zuni), lo Kolèj Santral la désid fé parèy k’an Frans, avèk bann prézantoir é bann tab. Vitman, bann pionié k’la fé sa, la rand azot kont ké bann ti kariol la, lété bien pratik, surtou kan té falé débouj azot. Zot la mèm done détroi zidé pou rand bann prézantoir pli méyèr. Kom lo bann promié lété fé min, an boi, zot lété lour. Lété difisil débouj azot kan navé lèskalié. Sé pou sa, banna la fé in modèl pli léjé, mé pa tro, pou k’lo van i chavir pa li. Lo bann rou lété pli gro, pou amorti lo chok, surtou dan bann chemin kaskasé. É la rajout inn ti konpartiman pou mèt détroi liv an plis.

Tès la, la vréman bien marché ! Pou sa mèm, an 2012, lo Kolèj Santral la désid ké, dann monn antié, va ansèrv bann prézantoir. La fé in laranjman avèk in fabrikan, pou komand in gran kantité, mé pli léjé é pli solid.

Firmézur, la fé détroi ti chanjman su lo bann prézantoir. Par égzanp, an 2015, la rajout in kapuchon an plastik transparan. Dina, k’i abit an Jéorji, i èm ali bien. Èl i di ké komsa, « lo prézantoir néna son prop “kapuchon” pou anpar bann liv, kan la pli i tonb ». An 2017, la gingn ansèrv bann zafich èk léman dèrièr, é sa dan in paké lang. Tomasz, in frèr an Pologn, i di : « Avan, pou chanj lo bann zafich, lété konpliké. Bann zafich èk léman dèrièr, sa lé vréman bèl sa. » An 2019, la chanj lo fason fabrik bann prézantoir, pou rand azot ankor pli solid.

Koman i fabrik bann prézantoir

Néna in sèl lantropriz i fabrik bann prézantoir é i anvoy sa dann monn antié. Jordi, in prézantoir i kout 43 dolar amérikin (dizon 40 €), san kont lo pri lèspédision é lé zot taks. Juska lèr, la fine dépans 16 milion dolar amérikin (a pépré 15 000 000 €) pou pèy bann prézantoir, é la fine anvoy plis 420 000 pou bann zasanblé dann monn antié.

Pou èt sur k’i ansèrv bien bann zofrand, i komand bann ti kariol la an gro. An plis ké sa, kan inn i kas, bann zasanblé i gingn komand bann piès rochanj pou aranj azot. Sa i évit arkomand in nèv.

Ansèrv bann prézantoir pou préché

Bann frèr é sèr dann monn antié, i èm ansèrv bann prézantoir pou préché. Martina, k’i abit Gana, i di : « La plipar d’tan, kan nou prèch, sé nou k’i sava dovan domoun. Sak mi èm èk lo prézantoir, sé domoun i vien oir anou. Mèm sak i pas san arété, zot i oi lo mésaj. »

Dan in not péi Lafrik, in bonom la vnu koté prézantoir é li la gingn bann liv dan son lang. La somèn ansuit, li la rovni é li la di : « Moin la fine lir tout lo bann liv. Tout sak néna dédan lé vréman inportan. Mi sava mon vilaj pou rakont sa tout mon famiy. » Té falé fé plis 500 kilomèt pou ariv dan son vilaj. Dé moi pli tar, kan li la rotourné, li la di : « Domoun mon vilaj la lir tout lo bann ti liv, é zot la trouv sa tro valab. Zot tout i vé rant Témoin Jéova. Mé zot néna in ta kèstion. Par égzanp, zot la konpri k’i fo plonj azot sou dolo pou batiz azot. Mé koté zot i abit, na poin d’rivièr. Èské nou doi vni isi, pou nou èt batizé ? » Bann frèr é sèr la mèt ali an kontak avèk in pionié k’i koz son lang. Astèr, zot i diskit souvan ansanm inn é lot.

Lé ankourajan oir k’i ansèrv bann prézantoir pou prèch « su tout la tèr, kom in témoiniaj pou tout bann nasion. » (Matié 24:14) Ousa i tir larjan pou pèy bann prézantoir la ? Sé gras zot bann zofrand, ké souvan lé fé su donate.jw.org. Mèrsi bien pou zot gran kèr.