LESON 8
Pou kosa Bondieu i pèrmèt le mal é bann soufrans ?
1. Koman le mal la komansé ?
Bondieu la lès bann zumin gouvèrné asé lontan, pou montré ke zot i pe pa anlèv bann problèm ke néna su la tèr.
Le mal la aparèt su la tèr kan Satan la di le premié kozman manteur. O komansman, Satan lété in lanj parfé, mé « li la pa tienbo dan la vérité » (Jan 8:44). Li lavé anvi èt adoré, alor ke rienk Bondieu i doi èt adoré. Li la ramas manteur avèk Èv, le premié madam. Sé komsa, ke li la gingn konvink a èl pou obéi a li, olèrk Bondieu. Adan la suiv Èv : li la dézobéi Bondieu. Son désizion la aport bann soufrans é la mor (Lir Jenèz 3:1-6, 19).
Kan li la pous Èv pou dézobéi, Satan la déklanch in latak kont la dominasion Bondieu (sétadir le droi ke Bondieu néna pou dirij son kréasion). In paké d’moun i suiv Satan : kom li, banna i ve pa ke Bondieu lé zot chèf. Sé komsa ke Satan lé devnu « le chèf le monn » (Lir Jan 14:30 ; 1 Jan 5:19).
2. Èske sak Bondieu la kréé lavé in défo ?
Tout sak Bondieu i fé, na poin okin défo. Bann domoun é bann zanj ke Bondieu la kréé, lété kapab obéi a li égzakteman kom i fo (Detéronom 32:4, 5). Li la donn a nou la libèrté pou choizi ant fé le bien ou le mal. La libèrté la, i pèrmèt a nou montré ke nou ièm a li (Lir Jak 1:13-15 ; 1 Jan 5:3).
3. Pou kosa Bondieu i pèrmèt ke bann soufrans i dur juska ojourdui ?
Juska ojourdui, Jéova i pèrmèt ke néna lopozision kont son dominasion. Akoz li pèrmèt sa ? Si li fé sa, sé pou montré ke, kan bann domoun i ésèy dirij a zot san li, sa i aport rien de bon (Éklézias 7:29 ; 8:9). I fé 6 000 an ke bann domoun i dirij a zot par zot mèm. É nou rann a nou kont de sa : sak néna le pouvoir ant zot min la pa gingn fé disparèt bann gèr, bann krim, linjustis é bann maladi (Lir Jérémi 10:23 ; Romin 9:17).
Kontrèrman bann gouvèrnman su la tèr, le gouvèrnman Bondieu i aport bann bienfé pou sak i soutien a li (Izai 48:17, 18). I tard pa, Jéova va détrui tout bann gouvèrnman ke lé su la tèr. Rienk bann domoun ki choizi èt dirijé par Bondieu va viv su la tèr (Izai 11:9 ; lir Danièl 2:44).
Regard le vidéo Poukosa Bondieu i pèrmèt bann soufrans ?
4. Kosa la pasians Bondieu i donn a nou lokazion d’fèr ?
Satan i prétan ke bann domoun i sèrv Jéova, parske zot i ve gingn in nafèr avèk li, é pa parske zot i ièm a li. Èske ou voudré prouvé ke sa lé manteur ? Oui lé posib ! Gras la pasians Bondieu, nou na lokazion d’montré si nou préfèr èt dirijé par Bondieu, oubien par bann zumin. Par nout fason d’viv, nou mont kisa nou choizi (Lir Job 1:8-12 ; Provèrb 27:11).
5. Koman nou pe choizi Bondieu kom Chèf ?
Nout bann désizion i mont si nou ve avoir Bondieu kom Chèf.
Koman choizi Bondieu kom Chèf ? Nou fé sa kan nou rod koman ador Bondieu la fason li aprouv, é kan nou mèt an pratik bann zansègnman ke lé dan son Parol la Bib (Jan 4:23). Nou mont ke nou choizi pa Satan kom chèf, kan, kom Jézu, nou mèl pa nou dan la politik é kan nou fé pa la gèr (Lir Jan 17:14).
Satan i ansèrv son pouvoir pou antrèn bann domoun pou komèt bann péché séksuèl, é pou fé in ta mové zafèr. Si nou rejèt tousa, lé posib ke nout bann kamarad oubien nout fami i ri a nou, ou i mont ke zot lé pa dakor avèk nou (1 Pièr 4:3, 4). Donk, nou néna in désizion pou prann : Èske nou va choizi kom kamarad bann domoun ki ièm Bondieu ? Èske nou va obéi son bann loi ke lé saj é ki mont ke li ièm a nou ? Si nou lé obéisan, nou va montré ke Satan la ramas manteur, kan li la di ke bann domoun noré pa obéi Bondieu kan zot noré bann problèm (Lir 1 Korintien 6:9, 10 ; 15:33).
Bondieu i ièm bann domoun, é lamour ke li resan pou nou, i asur a nou ke le mal é bann soufrans va disparèt. Sak i mèt zot foi an Bondieu, é i soutien son gouvèrnman, va viv pou toultan su la tèr (Lir Jan 3:16).