Kèl projé Bondieu néna pou bann zumin ?

1. Kèl projé Bondieu néna pou bann zumin ?

BONDIEU néna in gayar projé pou bann zumin (regard la not n^o 6). Li la kré le premié bonom é le premié madam, Adan é Èv, pou ke zot i viv dan in joli jardin. Son projé lété ke banna i fé bann zanfan, ke zot i chanj tout la tèr an paradi é i okup bann zanimo (Jenèz 1:28 ; 2:8, 9, 15).

2. a) Koman nou koné ke Jéova va fé sak li la prévu ? b) Dapré la Bib, kisa va viv pou toultan su la tèr ?

² Èske ou pans ke in jour nou va viv dan in paradi ? Jéova la di : « Moin la kozé [...], é moin va fé vréman sak moin la di » (Izai 46:9-11 ; 55:11). Donk, li va fé sak li la prévu, é na poin rien i pe arèt a li. Li ésplik a nou ke li la pa kré la tèr « pou rien » (Izai 45:18). Li ve ke la tèr lé abité. Par kisa ? É pou konbien d’tan ? La Bib i réponn : « Sak i obéi Bondieu nora la tèr pou zot, é zot va viv desu pou toultan » (Psom 37:29 ; Révélasion 21:3, 4).

3. Kan nou voi ke bann zumin i tonm malad é i mor, kèl késtion nou pe poz a nou ?

³ Ojourdui bann zumin i tonm malad é i mor. Dan in bonpe péi, zot i fé la gèr ant zot é zot i tué inn é lot. Mé lé pa sak Bondieu té i ve. Alor kosa la arivé ? Néna rienk la Bib ki ésplik sa.

BONDIEU NÉNA IN LÈNMI

4, 5. a) Kisa la ansèrv in sèrpan pou koz avèk Èv ? b) Koman kèlkin ke lé onèt i pe devnir in voleur ?

⁴ La Bib i di ke Bondieu néna in lènmi. Sé in lanj ke i apèl « Diab » é « Satan » (regard la not n^o 7). Satan la ansèrv in sèrpan pou koz avèk Èv dann jardin Lédèn (Révélasion 12:9 ; Jenèz 3:1). Li la fé kroir a èl ke lété le sèrpan té i koz.

⁵ Kisa la kré Satan le Diab ? Èske sé Bondieu ? Non ! Kan Bondieu la aranj la tèr pou Adan é Èv, lavé in bonpe zanj dann sièl (regard la not n^o 8). Parmi bann zanj la, lavé inn ke la chanjé é li lé devnu le Diab (Job 38:4, 7). Koman sa lé posib ? Alon pran in légzanp : Koman kèlkin ke lé onèt i devien in voleur ? Kan li lé né, li lé pa in voleur. Mé in jour, li ve gingn in nafèr ki apartien pa li. Kom li tir pa sa dan son tèt, son mové lanvi i devien ankor plu for. Aprésa, kan li néna lokazion, li vol sak li té ve ganié. Li la chanjé : li lé devnu in voleur (lir Jak 1:13-15).

6. Koman in lanj lé devnu in lènmi Bondieu ?

⁶ Sé sa mèm ke la ariv lanj la. Kan Jéova la kré Adan é Èv, li la di a zot fé bann zanfan é « ranpli la tèr » (Jenèz 1:27, 28). Petèt lanj la té i pans : « Olèrk ador Jéova, tout bann zumin la noré pu ador a moin ! » Plus li té i pans sa, plus li té ve sak i apartien Jéova. Li té ve bann zumin i ador a li. Alor li la ramas manteur avèk Èv é li la tronp a èl (lir Jenèz 3:1-5). Sé komsa li lé devnu Satan le Diab, in lènmi Bondieu.

7. a) Pou kosa Adan é Èv lé mor ? b) Pou kosa nou viéyi é nou mor ?

⁷ Adan é Èv la dézobéi Jéova é zot la manj le frui (Jenèz 2:17 ; 3:6). Zot la péché kont Jéova (regard la not n^o 9). É zot lé mor, kom Jéova lavé di (Jenèz 3:17-19). Kom bann zanfan Adan é Èv lété pécheur, zot lé mor osi (lir Romin 5:12). Pou konprann pou kosa bann zanfan Adan é Èv lété pécheur, alon pran in légzanp : Si ou fé bann gato dan in moul kabosé, bann gato nora le mèm bos ke le moul. Kan Adan la dézobéi Jéova, li lé devnu pécheur. Kom Adan lé nout zansèt, nout tout nou lé pécheur. Nou nana le mèm « bos » ke li. É kom nout tout nou lé pécheur, nou viéyi é nou mor (Romin 3:23).

8, 9. a) Kosa Satan té i ve fé kroir Adan é Èv ? b) Pou kosa Jéova la pa tué bann rebèl toutsuit ?

⁸ Satan la komans rebèl a li kont Jéova, kan li la pous Adan é Èv dézobéi Bondieu. Li té ve fé kroir a zot ke Jéova té in manteur, ke li lété in mové chèf é ke li té ve pa zot boneur. Satan la di ke bann zumin la pa bezoin ke Bondieu i di a zot sak zot i doi fé. Li la di osi ke Adan é Èv té i doi désid par zot mèm sak lé bien é sak lé mové. Kosa Jéova té sar fé ? Li noré pu tué a zot pou fé arèt lopozision bann rebèl la. Mé èske sa noré prouvé ke Satan lé in manteur ? Non !

⁹ Sé pousa ke Jéova la pa tué bann rebèl toutsuit. Li la lès bann zumin le tan pou dirij a zot touseul. Sa noré prouvé ke Jéova i koné sak lé mieu pou bann zumin é ke Satan lé in manteur. Le chapit 11 i mont tousa an détay. Mé kosa ou pans sak Adan é Èv la désid fé ? Èske zot lavé rézon kroir Satan é dézobéi Jéova ? Jéova la donn a zot tout zafèr : in vi parfé, in joli landroi pou viv é in gayar travay. Parkont, Satan lavé rien fé pou zot. Kosa ou noré fé si ou lété zot plas ?

10. Kèl choi inportan nout tout nou doi fé ?

¹⁰ Ojourdui, kom Adan é Èv, nout tout nou doi prann in désizion. Le choi ke nou va fé va donn a nou la vi oubien la mor. Nou pe choizi Jéova kom Chèf é prouvé ke Satan lé in manteur. Oubien nou pe choizi Satan kom chèf (Psom 73:28 ; lir Provèrb 27:11). Na poin in bonpe domoun i obéi Bondieu. An vré, Bondieu lé pa le chèf le monn. Mé si lé pa Bondieu, kisa i lé ?

KISA I LÉ LE CHÈF LE MONN ?

11, 12. a) Kosa Satan la propoz Jézu ? É kosa sa i aprann a nou ? b) Kèl vèrsé i mont ke Satan lé le chèf le monn ?

¹¹ Jézu té koné kisa i lé le chèf le monn. In jour, Satan la « mont a li tout bann roiyom le monn é zot gloir ». Aprésa, li la promèt Jézu : « Tout bann zafèr la, mi va donn a ou si ou tonm a jenou devan moin é si ou ador a moin » (Matieu 4:8, 9 ; Luk 4:5, 6). Si tout bann roiyom la té apartien pa li, èske li noré pu donn sa Jézu ? Non. Donk, tout bann gouvèrnman i apartien Satan.

¹² Somanké ou di a ou : « Satan i pe pa èt le chèf le monn ! Sé kan mèm Jéova, le Bondieu Toupuisan, ke la kré lunivèr ! » (Révélasion 4:11). Lé vré, Jéova lé le Kréateur. Mé Jézu lété fran : li la apèl Satan « le chèf le monn » (Jan 12:31 ; 14:30 ; 16:11). Lapot Pol la apèl Satan « le dieu se monn la » (2 Korintien 4:3, 4). É lapot Jan la ékri ke « le monn antié lé dirijé par le méchan » (1 Jan 5:19).

KOMAN LE MONN SATAN I SRA DÉTRUI ?

13. Pou kosa nou la bezoin in monn nouvo ?

¹³ Le monn i devien ankor plus danjereu. Partou, na bann gèr, la violans, domoun malonèt é ipokrit. Bann zumin i fé in bonpe zéfor pou règ bann problèm la, mé zot i ariv pa. I tard pa, Bondieu va détrui se monn mové, kan nora la gèr Armagédon. Li va ranplas se monn la par in monn nouvo é jus (Révélasion 16:14, 16) (regard la not n^o 10).

14. a) Kisa Jéova la choizi pou èt le Roi son roiyom ? b) Kosa la Bib la anonsé su Jézu ?

¹⁴ Jéova la choizi Jézu pou èt le Roi son roiyom, sétadir son gouvèrnman dann sièl (regard la not n^o 11). Néna bann milié d’zané, la Bib la anonsé ke Jézu i sré le « Prins la pé » é ke se gouvèrnman va dur pou toultan (Izai 9:6, 7). Jézu la amont son bann disip in fason priyé pou se gouvèrnman la, li la di : « Ke out roiyom i vien. Ke out volonté i réaliz su la tèr, kom dann sièl » (Matieu 6:10). Kom nou va voir dann chapit 8, le roiyom Bondieu va ranplas tout bann gouvèrnman su la tèr (lir Danièl 2:44). Aprésa, li va chanj la tèr an paradi.

IN MONN NOUVO I TARD PA !

15. Kosa i lé le « nouvo tèr » ?

¹⁵ La Bib i promèt : « Nou atann in nouvo sièl é in nouvo tèr é ladan nora la justis » (2 Pièr 3:13 ; Izai 65:17). Défoi, dan la Bib le mo « tèr » i ve dir bann domoun ki viv su la tèr (Jenèz 11:1). Donk, le « nouvo tèr » ke lé jus, sé tout bann zumin ki obéi Bondieu é ki resoi son bénédiksion.

16. a) Kèl gayar kado Bondieu va doné pou sak i sar viv dan le monn nouvo ? b) Kosa nou doi fé pou gingn kado la ?

¹⁶ Jézu la promèt ke bann zumin ki sar viv dan le monn nouvo va gingn la « vi pou toultan » (Mark 10:30). Kosa nou doi fé pou gingn kado la ? Pou konèt sa, lir Jan 3:16 é Jan 17:3. Alon regard sak la Bib i di su la vi dan le paradi su la tèr.

17, 18. Partou su la tèr, nora la pé é bann domoun i sra an sékurité. Koman nou koné sa ?

¹⁷ Nora pu rien d’mové, ni bann gèr, ni bann krim, ni la violans. Nora pu dutou domoun mové su la tèr (Psom 37:10, 11). Bondieu « va fé arèt bann gèr » (Psom 46:9 ; Izai 2:4). Su la tèr nora rienk domoun ki ièm Bondieu é ki obéi a li. Nora la pé pou toultan (Psom 72:7).

¹⁸ Bann domoun va viv an sékurité. Kan bann Zisraélit té obéi Bondieu, Bondieu té protèj a zot é zot té i viv an sékurité (Lévitik 25:18, 19). Dann paradi, nora poin rien, ni okin moun pou fé peur a nou. Nou sra toultan an sékurité (lir Izai 32:18 é Miché 4:4).

19. Pou kosa nou pe èt sur ke nora manjé an grann kantité ?

¹⁹ Nora manjé an grann kantité. « Nora le grin an kantité su la tèr » é « juskan o bann montagn » (Psom 72:16). Jéova, « nout Bondieu, va béni a nou » é la tèr va donn kantité manjé (Psom 67:6).

20. Koman nou koné ke la tèr va devnir in paradi ?

²⁰ Tout la tèr va devnir in paradi. Bann domoun nora bann joli kaz é bann gayar jardin (lir Izai 65:21-24 é Révélasion 11:18). Tout la tèr i sra joli kom jardin Lédèn. Jéova va donn a nou toultan tout sak nou la bezoin. Ala sak la Bib i di su Jéova : « Ou rouv out min é ou kontant vréman le keur tout sak lé vivan » (Psom 145:16).

21. Koman nou koné ke nora la pé ant bann zumin é bann zanimo ?

²¹ Nora la pé ant bann domoun é bann zanimo. Bann zanimo va pu atak bann domoun. Bann ti marmay nora pu peur kos koté bann zanimo ke lé danjereu ojourdui (lir Izai 11:6-9 é Izai 65:25).

22. Kosa Jézu va fé pou sak lé malad ?

²² Pèrsonn i sra pu malad. Kan Jézu lété su la tèr, li la géri in bonpe domoun (Matieu 9:35 ; Mark 1:40-42 ; Jan 5:5-9). Mé an tank Roi le roiyom Bondieu, li va géri tout bann domoun. Jamé pu pèrsonn va di : « Moin lé malad » (Izai 33:24 ; 35:5, 6).

23. Kosa Bondieu i sar fé pou bann mor ?

²³ Bann mor va reviv. Bondieu i promèt ke li va résusit domoun par milion. « Nora in rézuréksion otan pou bann moun jus ke pou bann moun injus » (lir Jan 5:28, 29 ; Akt 24:15).

24. Èske ou èmré viv dann paradi ? Pou kosa ?

²⁴ Nout tout, nou doi fé in choi. Nou pe aprann konèt Jéova é fé sak li ve. Oubien nou pe fé sak nou ve. Si nou choizi fé sak Jéova i ve, nou nora in gayar lavnir. In jour, in mesieu la di avèk Jézu, oubli pa li, apré son mor. Jézu la promèt a li : « Ou sra avèk moin dann paradi » (Luk 23:43). Dan bann chapit i vien apré, nou va aprann ankor plus su Jézu. Nou va dékouv koman li va réaliz bann gayar promès Bondieu.