Koman ou pe devnir kamarad Bondieu ?

1, 2. Sit bann non detroi kamarad Jéova.

KISA ou ve avoir kom kamarad ? Kèlkin ke ou ièm bien é avèk ki ou antan bien. Kèlkin ke néna in bon karaktèr é bann kalité ke ou aprési.

² Jéova i choizi sèrtin moun pou èt son bann kamarad. Par égzanp, Abraam lété in kamarad Jéova (Izai 41:8 ; Jak 2:23). Jéova té i ièm osi David. Li la di ke David lété « in moun ki fé vréman bann zafèr dapré son volonté » (Akt 13:22). É le profèt Danièl lété « kèlkin ke na in gran valeur » pou Jéova (Danièl 9:23).

3. Pou kosa Abraam, David é Danièl lété bann kamarad Jéova ?

³ Koman Abraam, David é Danièl lé devnu bann kamarad Jéova ? Jéova la di avèk Abraam : « Ou la ékout mon voi » (Jenèz 22:18). Jéova i devien Kamarad avèk sak i mèt pa zot su la oteur é ki obéi a li. Li pe mèm devnir Kamarad avèk tout in nasion. Li la ésplik avèk bann Zisraélit : « Obéi a moin, alor moin, ma devnir zot Bondieu, é zot, zot va devnir mon peup » (Jérémi 7:23). Si ou ve èt vréman kamarad Jéova, ou doi obéi a li.

JÉOVA I PROTÈJ SON BANN KAMARAD

4, 5. Koman Jéova i èd son bann kamarad ?

⁴ La Bib i di ke Jéova i rod tout moiyin pou èd bann domoun ki ièm a li èk tout zot keur (2 Kronik 16:9). Dan Psom 32:8, Jéova i promèt avèk son bann kamarad : « Mi va èd a ou bien konprann lé choz é mi va ansègn a ou kèl chemin ou doi suiv. Mi ve konsèy a ou, mon zieu bien kalé su ou. »

⁵ Nou néna in lènmi puisan ki ve pa ke nou lé kamarad avèk Bondieu. Mé Jéova i ve protèj a nou (lir Psom 55:22). Parske nou lé son bann kamarad, nou sèrv a li avèk tout nout keur. Nou rès a li fidèl, mèm kan lé difisil. É nou lé sur ke li va èd a nou, kom David, ke la ékri su Jéova : « Parske li lé a mon droit, mi va jamé tonbé » (Psom 16:8 ; 63:8). Kosa Satan i fé pou ke nou lé pu kamarad avèk Bondieu ?

SATAN LA AKUZ JÉOVA

6. Su kosa Satan i akuz bann zumin ?

⁶ Dann chapit 11, nou la aprann ke Satan la akuz Jéova é la lès antann ke li lé in manteur. Jéova la pa pèrmèt ke Adan é Èv i désid par zot mèm sak lété bien é sak lété mové. Alor, Satan la akuz Bondieu é la lès antann ke li lété pa jus. Le liv Job i aprann a nou ke li akuz osi bann zumin ki ve èt kamarad avèk Bondieu. Satan i di ke bann domoun i sèrv Bondieu rienk pou gingn in nafèr an retour, é non parske zot i ièm a li. Li prétan mèm ke li lé kapab pous ninport kèl moun pou rebèl kont Bondieu. Alon regard koman Jéova la protèj Job é kosa nou pe aprann su sak la ariv a li.

7, 8. a) Kosa Jéova té i pans de Job ? b) Kosa Satan la di su Job ?

⁷ Kisa lété Job ? Job lété in mesieu ke lété bon é ke té i viv néna 3 600 zan de sa. Jéova la di ke dann lépok la, lavé poin pèrsonn ke lété kom Job su la tèr. Job lavé in bonpe réspé pou Jéova, é li lavé la èn pou sak lé mal (Job 1:8). Li lété vréman kamarad avèk Bondieu.

⁸ Mé Satan la di ke Job té i sèrv Bondieu, parske li té i pans rienk a li touseul, parske li té i rod son prop zintéré. Li la di avèk Jéova : « Èske ou mèm ou la pa mont in mur protéksion otour son kaz é otour tout sak li néna ? Ou la béni tout sak son min i fé, é son bann zanimo la ogmanté in bonpe dan le péi. Pou chanjé, tann out min, é détrui tout sak li néna, é, san manké, li va modi a ou dan out figur » (Job 1:10, 11).

9. Kosa Jéova la pèrmèt Satan fé ?

⁹ Satan la akuz Job é la di ke li té i sèrv Jéova seulman parske li té i gingn bénédiksion. Satan la di osi ke li va ariv fé an sort ke Job i arèt sèrv Bondieu. Jéova lété pa dakor avèk Satan. Mé li la donn la pèrmision Satan pou fé subi Job bann zépreuv. Sa noré montré si Job té i ièm vréman Jéova.

SATAN I ATAK JOB

10. a) Koman Satan la atak Job ? b) Koman Job la réaji ?

¹⁰ Pou komansé, Satan la fé an sort ke tout bann zanimo ke Job lavé, lé volé oubien lé tué. Aprésa, li la fé mor prèske tout sèrviteur Job. Job la pèrd tout sak li lavé. Pou fini, Satan la mèm fé mor son bann 10 zanfan dan in gro kou d’van. Malgré tousa, Job la gard son fidélité pou Jéova. Li la jamé akuz Bondieu pou di li la fé bann zafèr ke lé mal (Job 1:12-19, 22).

11. a) Koman Satan la atak ankor Job ? b) Koman Job la réaji ?

¹¹ Satan la pa arèt la. Li la provok Bondieu kan li la di su Job : « Lèv out min pou fé mal son bann zo é son chèr, é, san manké li va modi a ou » (Job 2:5, 7). Alor Satan la fé tonm Job malad. Mé malgré son maladi ke té fé mal a li, Job la gard son fidélité pou Jéova. Li la di ke li va gard son fidélité pou Jéova juskatank li mor (Job 27:5).

12. Koman Job la prouvé ke Satan lé in manteur ?

¹² Job té i koné pa rien su bann zakuzasion Satan. Li té i koné pa non plu akoz li té i souf in bonpe komsa. Li té i pans ke Jéova lété loteur tout son bann problèm (Job 6:4 ; 16:11-14). Malgrésa, Job la kan mèm gard son fidélité pou Jéova. A partir d’la, navé pu okin dout : Job té i rod pa rienk son prop zintéré. Li lété kamarad avèk Bondieu parske li té i ièm a li. Tout bann zakuzasion Satan lété pa vré !

13. Kom Job la rès fidèl, kèl rézulta la doné ?

¹³ Mèm si Job té koné pa sak lété antrèn éspasé dann sièl, li la rès fidèl Bondieu é li la prouvé ke Satan lété kèlkin de mové. Jéova la rékonpans son kamarad pou son fidélité (Job 42:12-17).

SATAN I AKUZ A OU OSI

14, 15. Su kosa Satan i akuz tout bann zumin ?

¹⁴ Sak la ariv Job i aprann a nou bann zafèr inportan. Ojourdui, Satan i akuz a nou de sèrv Jéova parske nou pe gingn in nafèr èk li an retour. A lépok Job, Satan la di : « Tout sak in moun néna, li va échanj sa kont son vi » (Job 2:4). Donk, Satan la pa akuz seulman Job : li la akuz tout bann zumin de rod rienk zot prop zintéré. Plus 100 lané apré la mor Job, Satan i kontinué provok Jéova é i akuz son bann sèrviteur. Nou trouv la preuv dann Provèrb 27:11 ousa Bondieu la di : « Kondui a ou sajman, mon garson, é ranpli mon keur èk la joi, pou ke mi gingn réponn sak i provok a moin. »

¹⁵ Ou pe désid obéi Jéova, èt son kamarad é rès a li fidèl. Alor, ou va prouv ke Satan lé in manteur. Mèm si ou doi fé bann gran chanjman pou èt kamarad Bondieu, sé le pluméyeur désizion ke ou pe prann ! É sa lé in désizion inportan. Satan i di ke, si ou néna bann problèm, ou sar pa rès fidèl Bondieu. An plus, li ésèy tronp a nou pou kas nout fidélité. Koman li fé sa ?

16. a) Kèl taktik Satan i utiliz pou anpèch bann domoun sèrv Jéova ? b) Koman le Diab i pouré ésèy anpèch a ou sèrv Jéova ?

¹⁶ Satan i ansèrv in bonpe taktik pou détrui nout lamitié avèk Bondieu. Li atak a nou « kom in lion antrèn gronié », pou aval a nou (1 Pièr 5:8). Étonn pa ou : bann zami, sèrtin dan out fami oubien dot moun va petèt ésèy défann a ou étudié la Bib é fé sak lé bien. Alor, ou nora petèt linprésion èt « ataké »a (Jan 15:19, 20). An plus, Satan i dégiz a li kom in « lanj la lumièr » : li ésèy tronp a nou pou pous a nou dézobéi Jéova (2 Korintien 11:14). Anfin d’kont, pou défann a nou sèrv Jéova, li fé kroir a nou ke nou lé jamé asé bien pou Bondieu (Provèrb 24:10).

OBÉI JÉOVA

17. Kosa i pous a nou obéi Jéova ?

¹⁷ Kan nou obéi Jéova, nou prouv ke Satan lé in manteur. Kosa va èd a nou obéi Bondieu ? La Bib i di : « Ou doi èm Jéova out Bondieu avèk out keur an antié, avèk out lam an antié é avèk out fors an antié » (Detéronom 6:5). Nou obéi Jéova parske nou ièm a li. É plus nou va èm a li, plus nou nora lanvi fé tout sak li demann a nou. Lapot Jan la ékri : « Ala kosa i ve dir èm Bondieu : sé obéi son bann komannman. Pourtan, son bann komannman lé pa in fardo » (1 Jan 5:3).

18, 19. a) Jéova i di ke désèrtin zafèr lé mové. Kosa i lé ? b) Jamé Jéova i demann a nou fé linposib. Koman nou koné sa ?

¹⁸ Jéova i di ke désèrtin zafèr lé mové. Kosa i lé ? Le ti kad « Détès sak Jéova i détès » i sit detroi. Dann premié débu, petèt ou va pansé ke detroi zafèr parmi sak lé sité, lé pa si grav ke sa. Mé lir bann vèrsé la Bib ke lé sité, é pran le tan réfléchi desu. Alor ou va konprann pou kosa lé saj obéi bann loi Jéova. An plus, petèt ou va rann a ou kont ke ou doi fé bann chanjman dan out vi. Si ou fé sa, ou va konèt la pé é le boneur ke bann kamarad Bondieu i resan (Izai 48:17, 18). Mèm si lé pa fasil, ou pe gingn fé sa. Akoz nou pe èt sur de sa ?

¹⁹ Jamé Jéova i demann a nou de fé in nafèr inposib (Detéronom 30:11-14). Li lé in vré Kamarad é li koné a nou mieu ke nou mèm. Li koné nout tanpéraman é nout bann défo (Psom 103:14). Lapot Pol i ankouraj a nou komsa : « Bondieu lé fidèl, li va pa pèrmèt ke zot lé tanté plus ke sak zot lé kapab suporté é, kan la tantasion va arivé, li va prépar in moiyin pou ke zot i ansort a zot, pou ke zot i gingn tienbo ansanm » (1 Korintien 10:13). Nou pe èt sur ke Jéova va toujour donn a nou la fors pou fé sak lé bien. Li va donn a ou in « puisans ki dépas in fors normal », sétadir in puisans ki sort de lordinèr, pou èd a ou suport bann situasion difisil (2 Korintien 4:7). Dan bann malizé, Pol la resanti lèd Jéova. Sé pousa li la di : « Pou tout zafèr, moin néna la fors gras sak i donn a moin la puisans » (Filipien 4:13).

APRANN ÈM SAK BONDIEU I IÈM

20. Kèl joli kalité nou doi avoir ? É pou kosa ?

²⁰ Pou èt kamarad Jéova, i fo arèt fé sak li trouv ke lé mové. Mé sa i sufi pa (Romin 12:9). Bann kamarad Bondieu i ièm sak li ièm. I parl de zot dann Psom 15:1 juska 5 (lir). Zot i imit Jéova, zot i mont bann joli kalité kom « lamour, la joi, la pé, la pasians, la jantiyès, la bonté, la foi, la douseur é la kapasité kontrol a nou » (Galat 5:22, 23).

21. Kosa i pe èd a ou travay bann joli kalité ke Bondieu i ièm ?

²¹ Kosa i pe èd a ou travay bann joli kalité la ? Ou doi lir é étudié la Bib toultan pou aprann konèt sak Jéova i ièm (Izai 30:20, 21). Si ou fé sa, ou va èm ankor plus Jéova. É plus ou va èm a li, plus ou nora lanvi obéi a li.

22. Si ou obéi Jéova, kosa va éspasé ?

²² Kan ou fé bann chanjman ki fo dan out vi, sé kom tir bann vieu linj pou mèt bann linj neuv. La Bib i di ke nou doi tir « le vieu tanpéraman » é mèt « le nouvo tanpéraman » (Kolosien 3:9, 10). Mèm si lé pa fasil, si nou fé bann chanjman la é si nou obéi Jéova, li va donn a nou « in gran rékonpans » (Psom 19:11). Sé sak li la promèt. Donk, choizi obéi Jéova é prouv ke Satan lé in manteur ! Sèrv Jéova, pa pou ou gingn in rékonpans, mé parske ou ièm a li. Alor, ou sra vréman kamarad avèk Bondieu !