Le bon fason ador Bondieu

1. Kisa i pe di a nou kosa i lé le bon fason ador Bondieu ?

IN BONPE relijion i di ke zot i ansègn la vérité su Bondieu. Mé sa lé pa posib, parske bann relijion i ansègn bann zafèr vréman diféran su Bondieu é su le fason ador a li. Èske néna in moiyin pou konèt kosa i lé le bon fason ador Bondieu ? Oui. Mé, rienk Jéova i pe di a nou sa.

2. Koman konèt kosa i lé le bon fason ador Bondieu ?

² Jéova la donn a nou la Bib. Sé gras se liv la ke nou pe aprann kosa i lé le bon fason ador Bondieu. Alor, i fo étudié a li. Kom Jéova i ièm a ou, li va èd a ou gingn bann bienfé par lo bann zansègnman ke li donn (Izai 48:17).

3. Kosa Bondieu i ve ke nou fé ?

³ Désèrtin i di ke Bondieu lé dakor avèk tout bann relijion. Mé Jézu la pa ansègn sa dutou. Ala kosa li la di : « Lé pa tout sak i di a moin : “Sénieur, Sénieur”, ke va rant dan le roiyom dann sièl, mé rienk sak i fé la volonté mon Papa. » Donk, nou doi konèt kosa i lé la volonté Bondieu é mèt sa an pratik dan nout vi. Sa lé in nafèr vréman inportan, parske Jézu la di ke bann domoun i obéi pa Bondieu lé parèy bann kriminèl, sétadir bann domoun ki « pratik le mal » (Matieu 7:21-23).

4. Kosa Jézu la di su le fason ador Bondieu ?

⁴ Jézu la mèt an gard son bann disip é la di a zot ke i sré pa toultan fasil de fé la volonté Bondieu. Li la di : « Rant par la port ke lé séré ; parske la port ke lé larj é la rout ki amèn juska la déstruksion lé gran, é in bonpe i rant par la ; alor ke la port ke lé séré, é la rout ki amèn juska la vi lé peti, é inn tipe d’moun i trouv a li » (Matieu 7:13, 14). La rout ke lé séré, sétadir le bon fason ador Bondieu, i gid a nou juska la vi pou toultan. La rout ke lé larj, sétadir le mové fason ador Bondieu, i gid a nou juska la mor. Mé Jéova i ve pa ke pèrsonn i mor. Sé pousa ke li donn tout bann domoun le moiyin pou aprann konèt a li (2 Pièr 3:9).

LE BON FASON ADOR BONDIEU

5. Koman ou pe rekonèt sak i ador Bondieu le bon fason ?

⁵ Jézu la di ke lé posib rekonèt sak i ador Bondieu le bon fason. Pousa, i fo ke nou regard bien kosa i lé zot bann kroiyans é sak zot i fé osi. Li la di : « Zot va rekonèt banna par lo bann frui ke zot i donn. » É li la di ankor : « Tout piédboi ke lé bon i donn bann joli frui » (Matieu 7:16, 17). Sa i ve pa dir dutou ke bann vré sèrviteur Bondieu lé parfé. Mé zot i ésèy toultan fé sak lé bien. Alon voir koman rekonèt a zot.

6, 7. a) Pou kosa le vré relijion lé bazé su la Bib ? b) Kosa légzanp Jézu i aprann a nou ?

⁶ Nout fason ador Bondieu i devré èt bazé su bann zansègnman la Bib. La Bib i di : « Tout sak lé ékri dan la Bib lé inspiré par Bondieu é lé util pou ansénié, pou réprimandé, pou remèt droit sak i fo, pou aprann ajir avèk justis, pou ke le sèrviteur Bondieu lé vréman kalifié, ékipé kom ki fo pou fé bann bon zaksion » (2 Timoté 3:16, 17). Lapot Pol la ékri in lèt pou bann krétien ke i di : « Kan zot la resu la parol Bondieu ke nou la anons a zot, zot la aksèp a li, non pa kom la parol bann zumin, mé, kom sak li lé vréman : la parol Bondieu » (1 Tésalonisien 2:13). Le vré relijion i apui a li rienk su la Bib ke lé la Parol Bondieu. Li baz pa li su bann pansé bann zumin, li apui pa li non plu su bann tradision, ni su dot choz.

⁷ Tout sak Jézu la ansénié té i sort dan la Parol Bondieu (lir Jan 17:17). Dèk li lavé lokazion, li té i sit sak lété ékri dan lé Zékritur (Matieu 4:4, 7, 10). Bann vré sèrviteur Bondieu i suiv son légzanp : tout sak zot i ansègn i sort dan la Bib.

8. Dapré Jézu, kisa nou doi adoré ?

⁸ Nou devré ador rienk Jéova. Psom 83:18 i di : « A ou, ke i apèl Jéova, ou lé, a ou touseul, le Tré-O su tout la tèr ! » Jézu té i ve ke bann domoun té i aprann kisa le vré Bondieu i lé vréman, é li la fé konèt a zot son non (lir Jan 17:6). Li la di : « Sé Jéova out Bondieu ke ou doi adoré, é sé rienk a li seulman ke ou doi sèrvir » (Matieu 4:10). Bann vré sèrviteur Bondieu i suiv légzanp Jézu. Zot i ador Jéova seulman. Zot i ansèrv son non é zot i fé konèt a li. É zot i aprann lé zot sak Bondieu va fé pou tout domoun.

9, 10. Koman nou mont lé zot ke nou ièm a zot ?

⁹ Nou devré montré ke nou ièm vréman bann domoun èk le keur. Jézu la aprann son bann disip koman èm a zot inn é lot (lir Jan 13:35). Nou doi èm a nou, é sa, kèlke soi le péi ousa nou sort, nout lédukasion ou ke nou lé rich ou pov. Lamour ke nou néna pou inn é lot i doi uni a nou é nou doi mèm devnir kom bann frèr é seur (Kolosien 3:14). Sé pousa ke nou fé pa la gèr é nou tué pa domoun. La Bib i di ke nou rekoné « bann zanfan Bondieu é bann zanfan lo Diab » par rapor a sa : « sak i pratik pa la justis i sort pa koté Bondieu ; pa plus sak i ièm pa son frèr ». La Bib i di ankor ke i fo ke « nou ièm a nou inn é lot ; é pa èt kom Kain, ke té i fé sak té mové é ke la tué son frèr » (1 Jan 3:10-12 ; 4:20, 21).

¹⁰ Nou ansèrv nout tan, nout fors é sak nou néna pou ankouraj a nou é èd a nou inn é lot (Ébreu 10:24, 25). Nou « fé sak lé bien anvèr tout domoun » (Galat 6:10).

11. Pou kosa nou doi admèt ke sé rienk gras a Jézu ke nou pé èt sové ?

¹¹ Nou devré obéi Jézu, parske sé rienk gras a li ke nou pe èt sové. La Bib i di : « la poin moiyin èt sové par pèrsonn dot, parske la poin sou le sièl okin not non [...] par ki nou doi èt sové » (Akt 4:12). Dann chapit 5, nou la aprann ke Jéova la anvoiy Jézu su la tèr, é sa, pou ke li donn son vi kom ranson pou bann domoun ke lé obéisan (Matieu 20:28). Jéova la choizi Jézu pou èt Roi su la tèr. Sé pousa ke dan la Bib lé ékri ke, si nou ve viv pou toultan, alor nou doi obéi Jézu (lir Jan 3:36).

12. Pou kosa nou mèl pa nou dan la politik ?

¹² Nou devré pa mèl a nou dan la politik. Jézu sé kèlkin ke la pa mèl a li dan la politik. Le jour ousa li la été jujé par le chèf romin Pilat, li la di : « Mon roiyom lé pa dan se monn la » (lir Jan 18:36). Kom Jézu, nou mont nout fidélité anvèr Roiyom Bondieu, ke lé dann sièl. Sé pousa ke, dan ninport kèl landroi ousa nou abit, nou mèl pa nou dan la politik. Parkont, sak la Bib i demann a nou sé obéi « bann zotorité i dirij a nou », sétadir bann gouvèrnman (Romin 13:1). Nou obéi bann loi ke lé an plas dan le péi ousa nou abit. Mé kan dan nout péi, néna in loi ke lé an dézakor avèk bann loi Bondieu, alor, nou imit bann zapot, ke la di : « Nou doi obéi Bondieu olèrk bann zom » (Akt 5:29 ; Mark 12:17).

13. Kosa nou prèch su le Roiyom Bondieu ?

¹³ Nou devré kroir ke rienk le Roiyom Bondieu i gingn règ bann problèm ke néna dan le monn. Jézu la di ke la « bonn nouvèl se roiyom la » i sré préché dan le monn antié (lir Matieu 24:14). Na poin okin gouvèrnman ke lé kapab fé sak le Roiyom Bondieu i sar fé pou bann zumin (Psom 146:3). Jézu la aprann a nou koman priyé pou le Roiyom Bondieu, par bann parol la : « Ke out Roiyom i vien. Ke out volonté i réaliz su la tèr, kom dann sièl » (Matieu 6:10). La Bib i di ke le Roiyom Bondieu va détrui tout bann gouvèrnman ke néna su la tèr é ke li va duré pou toultan (Danièl 2:44).

14. Dapré ou, kisa i ador Bondieu le bon fason ?

¹⁴ Asteur, demann a ou : « Kisa i apui a li su la Bib dan son bann lansègnman ? Kisa i fé konèt le non Bondieu ? Bann domoun dan kèl relijion i mont ke zot i ièm a zot vréman inn é lot ? Kisa i kroi ke Bondieu la anvoiy Jézu su la tèr pou sov bann zumin ? Kisa i fé pa la politik ? Kisa i prèch pou montré ke rienk le Roiyom Bondieu i pe règ bann problèm bann domoun ? » Sé rienk bann Témoin Jéova ke i fé sa (Izai 43:10-12).

KOSA OU SAR FÉ ?

15. Pou ke Bondieu lé dakor avèk nout fason ador a li, kosa nou doi fé ?

¹⁵ I fo pa kontant a nou de konèt ke Bondieu i égzis. Bann démon osi i kroi ke Bondieu i égzis, mé zot i obéi pa li (Jak 2:19). Pou ke Bondieu lé dakor avèk nout fason ador a li, nou doi osi fé sak li demann.

16. Akoz nou doi rejèt bann fo relijion ?

¹⁶ Pou ke Bondieu lé dakor avèk nout fason ador a li, nou doi rejèt bann fo relijion. Le profèt Izai la ékri : « Sort anndan la, fé atansion rès pur » (Izai 52:11 ; 2 Korintien 6:17). Donk, sa i mont ke nou doi rejèt tout bann zafèr ke néna in lien avèk bann fo relijion.

17, 18. a) Kosa i lé « Gran Babilonn » ? b) Pou kosa i fo sort dan le fo relijion le plu vit posib ?

¹⁷ Kan nou di fo relijion, kosa nou antan par la ? Sé tout bann relijion ki aprann bann domoun ador Bondieu in fason ke lé pa an akor avèk sak la Parol Bondieu i ansègn. Dan la Bib, bann fo relijion i apèl « Gran Babilonn » (Révélasion 17:5). Pou kosa i apèl a li komsa ? Parske apré le Déluj, sé dan la vil Babilonn ke in bonpe bann fo lansègnman la komans aparèt. Aprésa, bann fo lansègnman la, la fini par répann partou su tout la tèr. Par égzanp, bann zabitan Babilonn té i ador bann dieu ke lété groupé par troi. Kan nou regard ojourdui, nou rann a nou kont ke in bonpe relijion i ansègn ke Bondieu lé in trinité. Mé la Bib lé klèr la d’su : néna in seul vré Bondieu, sé Jéova, é Jézu lé son Garson (Jan 17:3). Bann zabitan Babilonn, té i kroi in not zafèr : kan in moun té i mor, son léspri dan son kor i kontinué viv, parfoi dan lanfèr. Mé sa lé bann zafèr ke lé manteur (regard bann not n^o 14, 17 et 18).

¹⁸ Bondieu la anonsé ke bann fo relijion i sar èt détrui dann pa lontan (Révélasion 18:8). Èske ou konpran bien pou kosa lé urjan ke ou kit bann fo relijion la ? Jéova i demann a ou de fé sa avan ke lé tro tar (Révélasion 18:4).

19. Si ou désid fé la volonté Jéova, koman li va prann soin de ou ?

¹⁹ Si ou pran la désizion kit le fo relijion pou fé la volonté Jéova, bann zami é bann domoun dan out fami va petèt pa konprann sak ou la désid fé. Zot i pouré mèm juska mèt bann traka su out tèt. Mé Jéova va pa mèt a ou de koté. Ou va fé parti in gran fami ke lé dan le monn antié, ousa néna bann milion de pèrsonn ke i ièm a zot inn é lot vréman. Ou nora léspoir viv pou toultan dan le monn nouvo (Mark 10:28-30). É petèt ke in jour, out bann zami é sak i fé parti out fami ke lé pa dakor avèk out désizion, va fini par étudié la Bib osi.

20. Pou kosa lé inportan ador Bondieu le bon fason ?

²⁰ Dann pa lontan, Bondieu va fé disparèt la méchansté in bon foi pou tout, é son Roiyom va dirij la tèr (2 Pièr 3:9, 13). I sra vréman gayar konèt sa ! Toulmonn va ador Jéova kom li, li ve. Donk, lé vréman inportan ke koméla mèm, ou fé bann chanjman dan out vi pou ador Bondieu le bon fason.