LESON 10
Koman rekonèt le vré relijion ?
1. Èske néna rienk in vré relijion ?
« Méfié a zot bann fo profèt » (MATIEU 7:15).
Jézu la ansègn rienk in seul relijion son bann disip, le vré relijion. Li la di ke le vré relijion lé kom in chemin ki amèn juska la vi pou toultan é ke « la poin bonpe domoun i trouv a li » (Matieu 7:14). Bondieu lé dakor rienk avèk le relijion ki apui a li su son Parol parske anndan la, néna la vérité. Tout bann vré sèrviteur Bondieu lé uni ansanm dan zot fason ador a li é dan zot bann kroiyans (Lir Jan 4:23, 24 ; 14:6 ; Éfézien 4:4, 5).
Regard le vidéo Èske Bondieu lé dakor avèk tout bann relijion ?
2. Kosa Jézu la di su bann fo krétien ?
« Zot i di devan domoun ke zot i koné Bondieu, mé zot i trayi a li par zot bann zaksion » (TIT 1:16).
Jézu la prévien son bann disip ke bann fo profèt té sar sali le relijion ke li lavé ansègn a zot. Bann fo profèt la, i fé lèr ke zot lé bann vré sèrviteur Bondieu. É zot bann Légliz i di ke zot lé krétien. Mé lé posib rekonèt bann fo krétien la. Sé rienk le vré relijion i produi bann vré krétien. É nou pe rekonèt bann vré krétien, par bann bon manièr ke zot néna é par sak zot i fé (Lir Matieu 7:13-23).
3. Koman ou pe rekonèt bann vré sèrviteur Bondieu ?
Ala 5 poin pou èd a ou rekonèt kisa i lé bann vré sèrviteur Bondieu :
Bann vré sèrviteur Bondieu i réspèkt la Bib. Pou zot, sé la Parol Bondieu. Zot i ésèy vréman mèt an pratik bann zansègnman biblik. Donk, le vré relijion lé pa parèy tout lé zot relijion, ki apui a zot su bann zansègnman ki vien dé zom (Matieu 15:7-9). Bann vré sèrviteur Bondieu i prèch pa in nafèr pou alé fé le kontrèr apré (Lir Jan 17:17 ; 2 Timoté 3:16, 17).
Bann vré disip Jézu i donn loneur le non Bondieu, Jéova. Jézu la donn loneur le non Bondieu é pousa, li la fé konèt se non otour d’li. Li la èd bann domoun konèt Bondieu, é li la aprann banna koman priyé pou rann sin le non Bondieu (Matieu 6:9). Dann landroi ousa ou viv, kèl relijion i fé konèt le non Bondieu ? (Lir Jan 17:26 ; Romin 10:13, 14).
Bann vré krétien i prèch le roiyom Bondieu. Bondieu la anvoiy Jézu su la tèr pou prèch le gayar nouvèl su le Roiyom. Le roiyom la, lé le seul léspoir pou tout domoun. Jézu la koz su le roiyom juska tank li mor (Luk 4:43 ; 8:1 ; 23:42, 43). Li la di ke son bann disip osi té sar prèch se roiyom. Èske néna in moun la finn kos koté ou, pou koz su le roiyom Bondieu ? Dapré ou, dan kèl relijion li lé surman ? (Lir Matieu 24:14).
Bann vré disip Jézu i may pa zot èk se monn mové. Koman rekonèt bann vré disip ? Zot i may pa zot dan la politik é zot i rant pa dann ralé pousé la sosiété (Jan 17:16 ; 18:36). An plus ke sa, zot i rejèt bann mantalité é bann mové konportman ke bann domoun néna dan se monn la (Lir Jak 4:4).
Bann vré krétien néna in lamour inkroiyab pou inn é lot. Gras la Parol Bondieu, zot i aprann réspèkt bann domoun dan ninport kèl péi. Souvandéfoi, bann fo relijion i soutien in bonpe bann gèr, tandik bann vré sèrviteur Bondieu i ve pa fé la gèr dutou (Miché 4:1-3). Olèrksa, zot i utiliz bonpe zot tan é sak zot néna pou èd é ankouraj bann domoun (Lir Jan 13:34, 35 ; 1 Jan 4:20).
4. Dapré ou, kèl relijion lé vré ?
Kèl relijion i apui a li su la Parol Bondieu dan tout son bann zansègnman ? Kèl relijion i donn loneur le non Bondieu ? Kèl relijion i prèch ke le roiyom Bondieu lé rienk le seul léspoir pou bann domoun ? Dan kèl relijion, bann domoun i ièm vréman inn é lot é i fé pa la gèr dutou ? Kosa ou pans ? (Lir 1 Jan 3:10-12).