CHAPIT 17
La priyèr : in loneur ke Bondieu i fé a nou
Le Kréateur le sièl é la tèr i ve ékout nout bann priyèr (Psom 115:15).
1, 2. a) Dapré ou, pou kosa la priyèr lé in kado tèlman si gayar ? b) Pou kosa lé inportan konèt sak la Bib i di su la priyèr ?
LA TÈR lé vréman ti giginn koté lunivèr. Kan Jéova i regard la Tèr, bann nasion lé parèy in gout do lo pou li (Psom 115:15 ; Izai 40:15). Mèm si nou lé vréman peti koté lunivèr, Psom 145:18 é 19 i di : « Jéova lé a koté tout sak i kri vèr li, tout sak i pri a li avèk vérité. Li va égzos le soué tout sak na la krint pou li, li va antann kan zot i kri o sekour, é li va sov a zot. » Donk, sa i mont ke Jéova, le Kréateur toupuisan, i ve èt proch de nou : li ve èt nout Kamarad ! É li ve ékout nout bann priyèr ! La priyèr lé vréman in kado inkroiyab é lé in gran loneur ke Jéova i akord chakèn d’nou.
2 Mé Jéova va ékout a nou rienk si nou koz èk li la fason ke li aprouv. Pou konprann sa, alon voir sak la Bib i di su la priyèr.
AKOZ I FO PRIYÉ JÉOVA
3. Pou kosa ou doi priyé Jéova ?
3 Sé Jéova li mèm i ve ke ou koz ansanm li dan la priyèr. Par koman nou koné sa ? Lir Filipien 4:6 é 7. Kalkul in kou sak Bondieu i ankouraj a ou pou fé : Le Souvrin lunivèr i fé vréman in kont èk ou, é li ve ke ou koz èk li, pou di a li kosa ou resan o fon out keur é osi bann problèm ke ou néna.
4. Si ou pri Jéova toultan, out lamitié avèk li va ranfors ankor plus. Pou kosa ?
4 Gras la priyèr, out lamitié avèk Jéova va ranfors ankor plus. Kan bann kamarad néna labitud di ansanm inn é lot, sak zot i pans, zot bann sousi é sak zot i resan, zot lamitié i ranfors ankor plus. Lé parèy kan domoun i pri Jéova. Dan la Bib, Jéova i di a ou sak li pans, sak li resan é sak li kont fé dan lavnir. Ou pe koz èk li toultan, ou pe mèm di a li sak ou resan dann fon out keur. Si ou fé komsa, out lamitié avèk li va ranfors ankor plus (Jak 4:8).
KOSA NOU DOI FÉ POU KE BONDIEU I ÉKOUT A NOU ?
5. Koman nou koné ke Jéova i ékout pa ninport kèl priyèr ?
5 Èske Jéova i ékout ninport kèl priyèr ? Non. Dann tan le profèt Izai, Bondieu la di èk bann Zisraélit : « Zot i pri a moin in bonpe, mé mi ékout pa ; zot min lé ranpli èk le san » (Izai 1:15). Si nou fé pa atansion, nou pouré fé bann zafèr, ke va fé pèrd nout lamitié èk Jéova. Dan in ka komsala, li va pa ékout nout bann priyèr.
6. a) Pou kosa la foi lé tèlman si inportan ? b) Koman ou pe montré ke ou na la foi dan Bondieu ?
6 Si nou ve ke Jéova i ékout nout bann priyèr, nou doi mèt nout foi an li (Mark 11:24). Lapot Pol i ésplik : « Si nou la poin la foi, lé pa posib kontant Bondieu, parske sak i aproch koté Bondieu i doi kroir ke li égzis, é ke li devien le Bondieu ki rékonpans sak i rod a li èk tout zot keur » (Ébreu 11:6). Mé i fo pa kontant a nou di ke nou na foi dan Bondieu. Nou doi prouv sa kan nou obéi a li chak jour (lir Jak 2:26).
7. a) Kan nou pri Jéova, akoz nou doi pa mèt a nou su la oteur é nou doi mont nout réspé anvèr li ? b) Koman nou pe montré ke nout keur lé antié kan nou pri ?
7 Kan nou pri Jéova, nou doi pa mèt a nou su la oteur é nou doi mont nout réspé anvèr li. Akoz sa ? Si nou té i doi koz èk in roi oubien in prézidan, nou noré abord a zot èk le réspé ki fo. Jéova lé le Toupuisan. Donk, nou doi koz ansanm li avèk plus réspé ankor é san prann a nou su la oteur (Jenèz 17:1 ; Psom 138:6). Nou doi osi pri Jéova pou di a li sak nou néna o fon nout keur. Si nout keur lé antié, nou va pa répèt toultan le mèm kozman (Matieu 6:7, 8).
8. Kan nou pri pou in nafèr, kosa nou doi fé ?
8 Kan nou pri pou in nafèr, sak nou fé i doi osi alé dan le sans nout bann priyèr. Par égzanp, si nou demann Jéova donn a nou sak nou la bezoin pou viv, nou pe pa lès la parès mont su nou. Nou pe pa atann ke Bondieu i donn a nou tout zafèr, alor ke nou pe travay. Nou doi travay dur é èt pré pou aksèpt ninport kèl travay ke nou lé kapab fé (Matieu 6:11 ; 2 Tésalonisien 3:10). É si nou pri Jéova pou èd a nou arèt fé kékchoz ke lé mové ? Dan in ka komsala, nou doi évit mèt a nou dan bann situasion ousa nou pouré èt tanté (Kolosien 3:5). Asteur, alon réponn detroi késtion ke domoun i poz souvan su la priyèr.
DETROI KÉSTION KE I POZ SOUVAN SU LA PRIYÈR
9. a) Kisa nou doi priyé ? b) Kosa Jan 14:6 i aprann a nou su la priyèr ?
9 Kisa nou doi priyé ? Jézu la aprann a nou priyé « nout Papa dann sièl » (Matieu 6:9). Li la di osi : « Mi lé le chemin, é la vérité, é la vi. La poin pèrsonn i pe alé vèr mon Papa san pas par moin » (Jan 14:6). Donk, nou doi pri rienk Jéova. É kan nou pri, nou doi pas par Jézu, oubien pri an son non. Kosa sa i ve dir ? Pou ke Jéova i aksèpt nout bann priyèr, nou doi mont nout réspé pou le rol ke li la donn Jézu. Kom nou la finn vu, Jézu la ni su la tèr pou libèr a nou le péché èk la mor (Jan 3:16 ; Romin 5:12). Jéova la osi mèt Jézu en plas kom Gran Prèt é Juj (Jan 5:22 ; Ébreu 6:20).
Ou pe priyé ninport kan.
10. Èske nou doi mèt a nou dan in pozision éspésial pou priyé ?
10 Èske nou doi mèt a nou dan in pozision éspésial pou priyé ? Non. Kan nou fé la priyèr, Jéova i demann pa ke nou mèt a nou a jenou, ke nou rès asiz ou ke nou debout. La Bib i ansègn a nou ke nou pe priyé dan ninport kèl pozision, tank lé réspéktieu (1 Kronik 17:16 ; Néémi 8:6 ; Danièl 6:10 ; Mark 11:25). Sak i kont pou Jéova, sé pa nout pozision, mé nout fason pansé. Nou pe priyé for oubien dan nout keur, ninport kèl landroi ousa nou lé, é ninport kèl eur dan la journé ou dan la nuit. Nou pe èt sur ke Jéova va ékout a nou, mèm si la poin dot pèrsonn i antan a nou (Néémi 2:1-6).
11. Kosa nou pe di èk Jéova ?
11 Pou kèl zafèr nou pe priyé ? Nou pe pri Jéova pou tout kalité zafèr, tank sak nou demann i akord èk son volonté. La Bib i di : « Li ékout a nou, pou ninport kèl zafèr nou demann ke lé an akor èk son volonté » (1 Jan 5:14). Èske nou pe priyé pou in nafèr ki konsèrn a nou ? Oui. Kan nou pri Jéova, sé komsi nou lapou koz èk in vré kamarad. Nou pe koz èk li su bann zafèr ki trakas a nou é di a li tout sak nou resan (Psom 62:8). Nou pe demann a li donn a nou son léspri sin ke lé puisan, pou fé le bien (Luk 11:13). Nou pe osi demann a li la sajès pou prann bann bon désizion é la fors pou afront bann problèm ke nou rankont (Jak 1:5). Nou doi demann a li pardon pou nout bann péché (Éfézien 1:3, 7). Nou doi osi priyé pou lé zot, par égzanp pou nout fami é pou bann frèr é seur dann lasanblé lokal (Akt 12:5 ; Kolosien 4:12).
12. Dan nout bann priyèr, su kosa nou doi koz an premié ?
12 Dan nout bann priyèr, su kosa nou doi koz an premié ? Sé Jéova é son volonté ke nou doi mèt an premié. Nou doi remèrsié a li tout nout keur pou tout sak li fé pou nou (1 Kronik 29:10-13). Koman nou koné sa ? Kan Jézu lété su la tèr, li la aprann son bann disip koman priyé (lir Matieu 6:9-13). Li la di ki fo dabor priyé pou ke le non Bondieu lé sanktifié (sétadir ke son non lé konsidéré kom sin ou sakré). Aprésa, i fo priyé pou ke son Roiyom i vien é pou ke son volonté i réaliz su la tèr. Li la éspliké ke nou doi dabor priyé pou so bann zafèr inportan la, aprésa, nou pe priyé pou nout bann prop bezoin. Kan nou fé nout bann priyèr, é ke nou koz su Jéova é son volonté an premié, nou mont ke tousala lé bann zafèr plus inportan pou nou.
13. Nout bann priyèr i doi èt ti ou gran ?
13 Nout bann priyèr i doi èt ti ou gran ? La Bib i di pa rien la d’su. Nout bann priyèr i pe èt ti ou gran, mé sa i dépan la situasion. Par égzanp, avan manjé, bann priyèr i pe èt kourt. Mé i pe èt plu gran kan nou remèrsi Jéova oubien kan nou dévid nout keur pou di a li nout bann problèm (1 Samuèl 1:12, 15). Nou ve pa fé bann gran priyèr rienk pou fé romark a nou devan lé zot, kom désèrtin té i fé dann tan Jézu (Luk 20:46, 47). Bann priyèr komsala na poin léfé su Jéova. Sak lé inportan pou li, sé ke nout bann priyèr i sort dann fon nout keur.
14. Èske nou doi priyé toultan ? É kosa sa i aprann a nou su Jéova ?
14 Kèl kantité d’foi nou doi priyé ? Jéova i ankouraj a nou prann labitud koz ansanm li. La Bib i di ke nou doi « kontinué priyé », « kontinué priyé ankor » é « pri toultan » (Matieu 26:41 ; Romin 12:12 ; 1 Tésalonisien 5:17). Jéova lé toultan paré pou ékout a nou. Tou lé jour nou pe di a li mèrsi pou lamour ke li néna pou nou é pou tout sak li fé pou nou. Nou pe osi demann a li gid a nou, konsol a nou é donn a nou la fors ke nou la bezoin. Si pou nou, la priyèr lé in gran loneur, alor nou va pri a li chak foi ke nou néna lokazion.
15. Pou kosa nou doi di « amèn » kan in priyèr i fini ?
15 Pou kosa nou doi di « amèn » kan in priyèr i fini ? « Amèn » i ve dir « nou lé dakor » oubien « ke i éspas kom la été di ». Kan nou di « amèn » nou mont ke nou koz èk nout keur, é ke nou pans vréman sak nou la di (Psom 41:13). La Bib i aprann a nou osi ke lé bien di « amèn » (soi for ousoi dan nout keur) a la fin in priyèr prononsé devan in bonpe domoun, é sa pou montré ke nou lé dakor èk sak lété di (1 Kronik 16:36 ; 1 Korintien 14:16).
KOMAN BONDIEU I RÉPONN NOUT BANN PRIYÈR ?
16. Èske Jéova i réponn nout bann priyèr ?
16 Èske Jéova i réponn nout bann priyèr ? Oui. La Bib i di ke li lé Sak « ki ékout la priyèr » (Psom 65:2). Domoun par milion i pri Jéova èk in keur antié, li ékout zot bann priyèr é li réponn a zot in tralé fason.
17. Koman Jéova i ansèrv bann zanj é son bann sèrviteur su la tèr pou réponn nout bann priyèr ?
17 Pou réponn nout bann priyèr, Jéova i ansèrv bann zanj é son bann sèrviteur su la tèr (Ébreu 1:13, 14). Par égzanp, lé déja arivé ke in bonpe d’moun la pri Bondieu pou konprann la Bib, é la pa tardé, in Témoin Jéova la ni voir a zot. La Bib i amont ke bann zanj i fé osi zot ti travay dan la prédikasion pou la « bonn nouvèl » (lir Révélasion 14:6). An plus ke sa, bonpe parmi nou la priyé pou in problèm ousoi pou in nafèr éspésial, é aprésa, in frèr ou in seur la aport a nou lèd ke nou lavé bezoin (Provèrb 12:25 ; Jak 2:16).
Jéova i pe réponn nout bann priyèr é pousa li utiliz bann krétien pou èd a nou.
18. Koman Jéova i ansèrv son léspri sin é la Bib pou réponn nout bann priyèr ?
18 Pou réponn nout bann priyèr, Jéova i ansèrv osi son léspri sin. Kan nou demann a li lèd pou afront in problèm, li ansèrv son léspri sin pou gid a nou é pou donn a nou la fors ke nou la bezoin (2 Korintien 4:7). Li ansèrv osi la Bib pou réponn nout bann priyèr é èd a nou pran bann bon désizion. Kan nou lir la Bib, nou pe trouv bann vèrsé ke va èd a nou. An plus, pandan in rénion, Jéova i pe pous in moun donn in répons pou di sak nou lavé bezoin antann. Oubien alor, li pe pous in ansien dann lasanblé lokal pou koz èk nou su in parol la Bib ke va ansèrv a nou (Galat 6:1).
19. Nadfoi, nou pe avoir le santiman ke Jéova i réponn pa nout bann priyèr. Pou kosa ?
19 Mé nadfoi, nou pouré demann a nou : « Akoz Jéova i tard pou réponn mon bann priyèr ? » Jéova i koné kansa é koman réponn nout bann priyèr. Épimèm li koné kosa nou la bezoin. Dotfoi, nou doi kontinué priyé pou mont a li ke nou pans vréman sak nou di é ke nou néna vréman foi an li (Luk 11:5-10). Parfoi, li réponn nout bann priyèr in fason ke nou atann pa dutou. Par égzanp, si nou pri pou in situasion difisil ke nou lapou viv, olèrk anlèv nout problèm, li pe donn a nou la fors pou tienbo ansanm èk pasians (lir Filipien 4:13).
20. Pou kosa nou doi priyé Jéova souvan ?
20 Sé in vré loneur koz èk Jéova dan la priyèr ! Nou pe èt sur ke li ékout a nou (Psom 145:18). Plus nou va pri a li avèk in keur antié, plus nout lamitié èk li va devnir plu for.