LESON 09

La priyèr i pe rann plu for out lamitié avèk Bondieu

Vèrsion inprimé

La finn ariv aou ke ou koné pa kosa i fo fé dan in situasion ? Èske ou noré émé gingn le répons pou detroi késtion ? Èske ou la bezoin ki soulaj out keur ? Èske ou noré émé santi aou plu proch Jéova ? La priyèr i pe èd aou. Mé kosa i lé le bon fason priyé ? Èske Bondieu i ékout tout bann priyèr ? É kosa ou pe fé pou ke Bondieu i ékout out bann priyèr ? Sé sak ou sar voir dann leson la.

1. Kisa nou doi priyé é pou kèl zafèr ?

Jézu la ansénié ke nou doi pri rienk Jéova, nout Papa dann sièl. É sé sa mèm ke li la fé. Li la di : « Zot i doi donk priyé komsa : “Nout Papa ke lé dann sièl...” » (Matieu 6:9). Kan nou pri Jéova, nou rann plu for nout lamitié avèk li.

Nou pe priyé pou apepré tout zafèr. Lé sur, pou ke Bondieu i réponn nout bann priyèr, i fo ke sa lé an akor avèk son volonté. Bondieu « i ékout anou, kinport le zafèr ke nou demann ke lé an akor èk son volonté » (1 Jan 5:14). Jézu la donn bann zégzanp pou bann zafèr ke nou pe priyé (lir Matieu 6:9-13). Nou pe priyé pou bann zafèr i konsèrn anou, mé i fo pa nou oubli di mèrsi Bondieu pou sak li fé pou nou, é alon demann ali osi èd lé zot.

2. Koman nou doi priyé ?

La Bib i ankouraj anou ‘dévid nout keur devan Bondieu’ (Psom 62:8). Donk nout bann priyèr i doi èt sinsèr, zot i doi sort dann fon nout keur. Nou pe priyé ninport kan é ninport kèl landroi, for oubien dan nout keur, é dan ninport kèl pozision, tank lé réspéktueu.

3. Koman Bondieu i réponn nout bann priyèr ?

Li fé sa in bonpe fason. Jéova i donn anou son Parol, la Bib, ousa nou trouv souvan le répons pou nout bann késtion. Lir la Parol Bondieu i pe « rann saj sak i mank léspèryans » (Psom 19:7 ; lir Jak 1:5). Li pe donn anou la pé de léspri kan nou lé dan bann malizé. É li pe pous son bann zadorateur èd anou kan nou la bezoin.

ALON APRANN PLUS

Alon voir kèl priyèr i fé plézir Bondieu é poukosa la priyèr i fé anou du bien.

4. Bondieu i ékout nout bann priyèr sou désèrtin kondision

Kosa i fé ke Bondieu i ékout nout bann priyèr ? Gard le VIDÉO.

VIDÉO : Èske Bondieu i ékout tout bann priyèr ? (inn ti morso) (2:42)

Jéova i ve ke nou pri ali. Lir Psom 65:2 é koz su bann késtion la :

Èske ou pans ke Bondieu i ve ‘ékout out bann priyèr’ ? Akoz ou di sa ?

Pou ke Bondieu i ékout nout bann priyèr, i fo nou fé zéfor pou viv dapré son bann rekomandasion. Lir Miché 3:4 é 1 Pièr 3:12 é koz su késtion la :

Kosa nou doi fé pou ke Bondieu i ékout nout bann priyèr ?

Kan na in gèr, chak larmé i pri souvan pou gingn le batay. Mé èske lé lojik kroir ke Bondieu va réponn zot bann priyèr ?

5. Nout bann priyèr i doi sort dann fon nout keur

Désèrtin pèrsonn la aprann ke té falé répèt toultan le mèm zafèr kan zot té i pri. Mé èske Jéova i ve ke nou pri ali komsa ? Lir Matieu 6:7 é koz su késtion la :

Kosa i fo fé pou ‘pa toultan répèt le mèm zafèr’ dan nout bann priyèr ?

Tou lé jour, majinn in bon zafèr ke la ariv aou, aprésa di mèrsi Jéova pousa. Si ou fé sa pandan 1 semèn, ou nora priyé pou 7 sujé diféran san rabach toultan le mèm zafèr.

In garson i koz ansanm son bann paran. — In bon papa i ve ke son zanfan i koz èk li èk le keur. Jéova osi i ve ke nou koz èk li èk nout keur.

6. La priyèr lé in kado Bondieu

Dan bann gayar moman oubien dann malizé, koman la priyèr i pe donn anou la fors ? Gard le VIDÉO.

VIDÉO : La priyèr i pe èd anou suport avèk pasians in lépreuv (1:32)

La Bib i promèt, ke gras la priyèr, nou pe konèt le vré pé dann fon nout keur. Lir Filipien 4:6, 7 é koz su bann késtion la :

La priyèr i règ pa toultan nout bann problèm, mé koman li pe èd anou kan mèm ?
Pou kèl zafèr ou voudré priyé ?

Ou té koné sa ou ?

Le mo « amèn » i ve dir « ke i éspas kom la été di » oubien « nou lé dakor ». La Bib i mont ke depui bien lontan, bann zadorateur Bondieu i di « amèn » kan la fini la priyèr (1 Kronik 16:36).

7. Trouv le tan pou priyé

Nadfoi, nou lé tèlman okupé ke nou oubli priyé. Kosa i mont ke la priyèr lété inportan pou Jézu ? Lir Matieu 14:23 é Mark 1:35 é koz su bann késtion la :