LESON 4

Sak i fo di avan lir bann vèrsé

Matieu 22:41-45

POIN INPORTAN : Avan lir in vèrsé, di detroi ti parol bien choizi pou ke domoun i komans réfléchi desu.

Di akoz ou lir vèrsé la. Avan lir in vèrsé, di kékchoz in fason pou atir latansion domoun su lidé inportan ou ve mèt an valeur.

Pran an kont tout sak lé ékri avan é apré le vèrsé. Kan ou sit bann vèrsé, di kisa i koz. Kan ou sit in liv la Bib, di kisa la ékri sa.
Mont ke la Bib lé in gid ke lé sur. Kan ou koz èk domoun i kroi an Bondieu, atir zot latansion su la Bib é di ke li lé « la Parol Bondieu », pou montré ke la Bib sé le méyeur liv ousa nou gingn la sajès.
Donn lanvi konèt plus su le vèrsé. Poz in késtion ke le vèrsé i réponn, koz su in problèm ke le vèrsé i donn in solusion oubien sit in vérité biblik pou gid anou, é mont koman bann vèrsé la Bib i èd anou konprann sa.

Pran an kont sak domoun i koné déja su le vèrsé é lidé ou sar koz desu. Mèm si domoun i koné bien le vèrsé, di detroi ti parol bien choizi avan lir ali, fé sa in fason ki donn azot lanvi konèt plus é èd azot dékouv le vèrsé in nouvo fason.