LESON 07

Jéova : son pèrsonalité é son bann kalité

Vèrsion inprimé

Koman ou imajinn aou Bondieu ? Èske pou ou sé in moun pou kisa ou néna bonpe réspé, mé andiré ou gingn pa kos koté li, komsi li lé loin kom in zétoil dann sièl ? Oubien èske ou pans ke Bondieu lé in fors vréman puisan mé na poin pèrsonalité, in pe parèy in siklonn ? Kisa i lé vréman Jéova ? Dan son Parol, la Bib, Jéova i fé konèt son bann kalité. Li fé konprann osi ke li fé in kont ansanm ou.

1. Poukosa nou pe pa voir Bondieu ?

« Bondieu lé in Léspri » (Jan 4:24). Jéova na poin in kor kom lé not. Sé in léspri i viv dann sièl, in landroi ke nou pe pa voir.

2. Kosa i lé detroi kalité ke Jéova néna ?

Nou pe pa voir Jéova, mé kan nou aprann konèt ali, nou ièm ali, parske sé in moun ki égzis vréman avèk bann joli kalité. La Bib i di : « Jéova i ièm la justis, é li va pa larg son bann fidèl » (Psom 37:28). Li lé osi « plin laféksion èk tandrès é la mizérikord », surtou pou bann domoun i souf (Jak 5:11). « Jéova lé a koté sak néna le keur brizé ; li sov sak la pèrd kouraj » (Psom 34:18). É èske ou koné ke sak nou fé néna in léfé su li ? Kan in moun i désid fé sak lé mové, sa i chagrinn é i fé mal le keur Bondieu (Psom 78:40, 41). Mé kan in moun i désid fé sak lé bien, sa i kontant le keur Bondieu (lir Provèrb 27:11).

3. Koman Jéova i fémont ke li ièm anou ?

Le plu gran kalité Jéova néna sé lamour. An vré, « Bondieu lé amour » (1 Jan 4:8). Jéova i fémont anou son lamour dan la Bib, mé osi dan bann zafèr ke li la kréé (lir Akt 14:17). Réfléchi in kou su le fason ke li la fé anou. Li la donn anou la kapasité voir bann joli kouleur, ékout bann gayar ti muzik é gout bann bon zafèr ki aranj la bouch. Li ve ke nou profit bien la vi.

ALON APRANN PLUS

Alon voir kosa Jéova i ansèrv pou fé bann zafèr ke lé inkroiyab. É alon voir osi koman Jéova i fémont son bann joli kalité.

4. Léspri sin lé la fors Bondieu ki aji

Montaj : Bann zafèr ke Bondieu la kréé gras son léspri sin. 1. Bann planèt é lunivèr. 2. In lékrivin la Bib i ékri su in roulo bann zidé ke Bondieu la inspir ali.

Pou travay, nou ansèrv nout min ; Jéova li, li utiliz son léspri sin. La Bib i ésplik ke léspri sin lé pa in moun, mé sé la fors ke Bondieu i utiliz kan li ve fé in nafèr. Lir Luk 11:13 é Akt 2:17 é koz su bann késtion la :

Jéova i ‘répann’ son léspri sin su bann domoun ki demann ali sa. Alor, èske léspri sin i pe èt in moun ? Poukosa ?

Jéova i ansèrv son léspri sin pou fé bann zafèr ke lé inkroiyab. Lir Psom 104:30 é 2 Pièr 1:20, 21 é koz su késtion la :

Kosa Jéova la fé gras son léspri sin ?

5. Jéova néna in pèrsonalité ki atir

Mèm si Moiz té ador Jéova depui lontan, la ariv in moman, li la resanti le bezoin konèt ankor plus son Kréateur. Dukou li la demann Jéova : « Siouplé, si mi néna out faveur, fé konèt amoin out bann manièr aji, pou ke mi koné aou » (Égzod 33:13). Alor Jéova la fémont Moiz detroi kalité ke li néna. Lir Égzod 34:4-6 é koz su bann késtion la :

Anparmi bann kalité ke Jéova néna, kèl li la fémont Moiz ?
Kèl kalité ke Jéova néna, i atir aou le plus ?

6. Jéova i fé in kont èk bann zumin

Bann Zébreu lété le peup Bondieu dann tan lontan. Zot lété zésklav dann péi Léjip, é zot la souf in bonpe. Kosa Jéova la resanti kan li la vu sa ? Pran Égzod 3:1-10 é ékout lanrejistreman oubien lir bann vèrsé la. Aprésa, koz su bann késtion ki vien apré.

LODIO : Jéhovah se souciait de leurs souffrances (2:45)

Kosa zistoir la Bib la, i aprann aou su sak Jéova i resan, kan li voi bann zumin soufèr ? (gard bann vèrsé 7 é 8).
Èske ou pans ke Jéova i ve vréman èd bann zumin é ke li lé kapab fé sa ? Poukosa ou di sa ?