Koman la Bib i pé èd anou rèspèk la diférans lé zot ?
« Sé rienk kan nou rèspèk la diférans lé zot, ké la pé dan lo monn lé posib » (UNESCO Declaration of Principles on Tolerance, 1995)a.
Mé d’in not koté, kan nou rèspèk pa la diférans lé zot, i pé amèn anou fé vilin manièr é mèm détès lé zot. Souvan bann santiman komsa i pé vnir plis pir é pous anou done mové kozman, bord domoun su koté é agrès lé zot.
Mé domoun lé pa dakor su sak i vé dir rèspèk la diférans lé zot. Pou désèrtin, rèspèk la diférans lé zot, sé èt dakor èk tout kalité zafèr domoun i fé. Pou dot, mèm si zot lé pa dakor, chakèn néna lo droi fé sak li vé é kroir sak li la anvi. An vré, sé sak la Bib i di osi.
Èské la Bib i pé èd domoun pou rèspèk vréman la diférans lé zot jordi ?
Sak la Bib i di su lo rèspé la diférans lé zot.
La Bib i ankouraj anou rèspèk la diférans lé zot. Èl i di : « Fé an sort ké tout domoun i koné ké zot lé rézonab » (Filipien 4:5). Èl i pous anou konsidèr bien lé zot, rèspèk azot é trèt azot in bon fason. Sak i suiv konsèy-la, va lès lé zot fé sak zot la anvi, mé pétèt zot sra pa dakor èk sa, é zot va pa fé parèy.
An mèm tan, la Bib i di, ké Bondié la done bann règ pou ké toulmoun i viv bien. Èl i di komsa : « Aou bonom, Bondié la amont aou kosa lé bien » (Miché 6:8). Anndan-la, nou trouv bann konsèy Bondié la done anou pou viv lo méyèr fason posib (Izai 48:17, 18).
Bondié i done pa nou lo droi juj lé zot. La Bib i di anou : « Néna rienk in sèl k’i fé bann loi é k’i juj […] Mé aou, kisa ou lé, pou juj out kamarad ? » (Jak 4:12). Bondié i lès chakèn fé sak li vé, mé chakèn va rand kont pou li mèm (Détéronom 30:19).
Sak la Bib i di su lo rèspé
La Bib i domand anou : « Rèspèk tout domoun » (1 Pièr 2:17, Nouvelle français courant). Donk sak i choizi obéi ban règ la Bib i done, i trèt tout domoun avèk rèspé, kinport sak zot i kroir ou koman zot i viv (Luk 6:31). Mé sa i vé pa dir ké zot lé dakor avèk tout kalité kroiyans, tout zafèr domoun i pans oubien tout zafèr domoun i désid fé. Sèlman, zot va pa jamé fé vilin manièr oubien mank rèspé kik-so-soi. O kontrèr, zot va fé tout pou trèt lé zot parèy kom Jézu té fé.
Par ègzanp, in jour, Jézu la trouv in madam ké lété dann in rolijion li té pa dakor avèk. An plis ké sa, madam-la té i viv èk in bonom èl té pa marié avèk, é Jézu té pa dakor èk sa. Malgré-sa, kan li la koz èk èl, li la pa mank a-èl rèspé (Jan 4:9, 17-24).
Parèy kom Jézu, bann krétien lé paré pou koz su zot kroiyans avèk sak i vé bien ékout azot, mé toultan èk in « bonpé rèspé » (1 Pièr 3:15). La Bib i di ké bann krétien i doi pa oblij lé zot pans kom zot. Èl i di k’in disip Jézu « na poin pou batay mé i fo plito li aji èk dousèr anvèr tout domoun », mèm sak i kroir pa lo mèm zafèr ké zot (2 Timoté 2:24).
Détès lé zot : kosa la Bib i di ladsi ?
La Bib i di anou komsa : « rod la pé avèk toulmoun » (Ébré 12:14). In moun k’i rod la pé, i détès pa pèrsone. Li fé bonpé zéfor pou viv an pé èk lé zot, é sa, san larg son bann kroiyans (Matié 5:9). La Bib i di mèm ké bann krétien, i doi èm zot zènmi é pou sa, rand azot lo bien mèm si banna i trèt azot mal (Matié 5:44).
La Bib i di ké Bondié i « èm pa dutou », oubien i « détès », bann fason d’fé, k’i fé ont domoun oubien sak i fé mal azot (Provèrb 6: 16-19). Anndan-la, la Bib i utiliz lo mo « détès » pou amont anou koman Bondié lé si tan tèlman dégouté, kan domoun i fé bann mové zafèr. An mèm tan, la Bib i amont ké li lé paré pou pardoné, é ké li vé èd domoun k’i vé chanj zot fason d’viv é rèspèk son bann règ (Izai 55:7).
Bann vèrsé la Bib k’i koz su lo rèspé pou la diférans lé zot
Tit 3:2 : I fo ké zot « lé rézonab, é fé mont la dousèr anvèr tout domoun ».
Kan in moun i pans pa kom li, in moun rézonab, i énèrv pa, li rès janti. Sa i èd pou rèspèk inn é lot.
Matié 7:12 : « Donk, tout sak zot i vé ké bann domoun i fé pou zot, azot osi zot i doi fé parèy pou banna. »
Nou tout nou èm kan lé zot i rèspèk anou, é ké zot i fé in kont èk sak nou pans é sak nou néna dan nout kèr. Tout domoun i koné bien lamontraj Jézu-la, pou konèt plus su lo fason mèt ali an pratik, alé oir lartik « Qu’est-ce que la Règle d’or ? ».
Jozué 24:15 : « Choizi par zot mèm jordi kisa zot va sèrvi. »
Kan nou rèspèk lo droi lé zot fé sak zot i vé, sa i èd pou rès an pé.
Akt bann zapot 10:34 : « Bondié i fé pa préférans. »
Bondié i juj pa domoun dapré zot kiltur, zot ras, si zot lé in madam oubien in mésié, kèl péi zot i sort, oubien si zot lé rich ou mizèr. Sak i vé fé parèy Bondié i rèspèk tout kalité domoun.
Abakuk 1:12, 13: « [Bondié i] gingn pa suport la méchansté ».
Lo rèspé Bondié pou la diférans domoun lé pa san limit. Li va pa lès bann domoun malfondé fé lo mal pou toultan. Pou konèt plis, gard lo vidéo Poukosa Bondié i pèrmèt bann soufrans ?.
Romin 12:19: « Lès la kolèr Bondié aji ; parské lé ékri : « Jéovab i di : “La vanjans lé pou moin ; sé moin mèm va règ zot kont”. »
Jéova i done pa pèrsone lo droi vanj ali li mèm. Lèr k’li la prévu, li va fé an sort ké justis lé fé. Pou konèt plis ladsi, lir lartik « Y aura-t-il un jour la justice dans le monde ? ».
a An fransé, i ansèrv lo mo tolérance pou koz ladsi.
b Jéova sé lo non Bondié (Psom 83:18). Alé oir lartik « Kisa i lé Jéova? ».