Bann zinondasion i fé gro déga : Kosa la Bib i di ladsi ?

Partou dési la tèr, bonpé domoun lé touché par bann zinondasion k’i fé bann gro déga. Sé sak bann zartik-la i di :

•  « Bann dèrnié jour i vièn pasé, la kapital la Chine, la anrojis son pli gran kantité la pli, é i fé 140 zané la pa ariv sa [...]. La tonb 744,8 milimèt dolo ant lo samdi é lo mèrkrédi » (AP News, Out 2, 2023).

•  « Jédi té lo dézièm jour ousa lo siklone Khanun la fé grèn la pli an kantité avèk bann gro rafal lo van dann sud Japon, dé moun lé mor akoz sa [...]. Nou prévoi ké lo siklone i sa fé tonb jiska 600 milimèt dolo an plin dan lé o Tayouane » (Deutsche Welle, Out 3, 2023).

•  « Dan lo ouikèn dèrnié lavé bann zinondasion an [ Nouvèl - Ékos ] akoz la pli ké la done lo grin plis ké dabitud dan la réjion Kanada Atlantik é sa i fé 50 an la pa ariv sa » (BBC News, Julié 24, 2023).

Kosa la Bib i di su bann katastrof komsa ?

In sign « bann dèrnié jour »

La Bib i amont ké nou viv in lépok k’i apèl « bann dèrnié jour » (2 Timoté 3:1). Néna lontan d’sa, Jézu lavé di ké dan nout lépok, nou té sa oir bann « zafèr i fé pèr » oubien bann zévènman ké va fé gingn anou la tranblad (Luk 21:11). Bann chanjman klima la amèn bann gro katastrof k’i fé vréman pèr é k’i tonb dési nou san ké nou atand, é sa i ariv plizanpli souvan é plizanpli for ankor.

Sak i done anou lèspoir

La Bib i di ké bann kalité zafèr i ariv dési la tèr koméla, an vré sa i done anou in rézon pou èspèr ké domin sra pliméyèr. Poukosa ? Parské Jézu la di : « Lé parèy, kan zot va oir bann zafèr-la arivé, i tard pa roiyom Bondié i ariv » (Luk 21:31 ; Matié 24:3).

Bann chanjman klima ké nou oi koméla i amont ké biento lo roiyom Bondié nora lo pouvoir kontrol bann zafèr k’i touch lanvironnman kom lo roulman dolo (Job 36:27, 28 ; Psom 107:29).

Pou konèt plis su la fason lo roiyom Bondié va règ bann problèm lanvironnman, gard lartik « Qui sauvera la terre ? »