La sékurité bann madam : Sak la Bib i di ladsi
Néna d’milion madam èk bann ti fi partou dési la tèr ké lé maltrèté. Èsk’aou osi la fine ariv aou ? Alon oir poukosa out sékurité lé inportan pou Bondié é kosa li sar fé èk sak i maltrèt bann madam.
« Kan mi té pti, tou lé jour, mon frèr té maltrèt amoin, li té tap amoin, li té done amoin bann mové kozman. Kan mi té fine marié mon bèlmèr la fé parèy. Zot dé mon bopèr té fé zèsklav èk moin. Mi té sobat pou pa susid amoin » (Madhu,a Lind).
Dapré Lorganizasion mondial la santé « partou dan lo monn néna bann madam lé maltrèté ». Dan zot vi, néna 1 madam su 3, i gingn lo kou oubien lé forsé pou fé bann zafèr séksuèl.
Si sa la fine ariv azot, zot i pé aoir pèr ké, partou ousa zot i sava zot i gout sa ankor. So bann maltrètans su bann madam i pouré amèn aou pansé ké, pou la plipar domoun, bann madam i vo pa rien. Mé pou Bondié, èské bann madam néna la valèr ?
La Bib i amont ké la sékurité bann madam i kont pou Bondié.
Koman Bondié i oi bann madam ?
Vèrsé : « Li la kré banna bonom èk madam » (Jénèz 1:27).
Sak i vé dir : Bondié la fé bann bonom é bann madam. Pou li, lé dé i mérit lo rèspé. An plis ké sa, li di lo mari « èm son madam kom li mèm » é rod pa abuz dési èl. Done pa èl bann mové kozman é tap pa aèl (Éfézien 5:33 ; Kolosien 3:19). Donk lé klèr, pou Jéova la sékurité bann madam lé vréman inportan.
« Kan mi lété pti, in moun mon famiy la oblij amoin fé bann zafèr sèksuèl ansanm li. Laj 17 an, mon patron la ménas amoin bat amoin déor, si mi té i rofiz kouch èk li. Inn foi marié, mon mari, mon famiy é mon bann voizin té rabès amoin.Mé aprésa moin la aprann konèt Jéova, lo Kréatèrb. Ali, li fé mont ké li néna rèspé pou bann madam, sa la rasur amoin ké li èm amoin é ké mi néna in bonpé la valèr pou li » (Maria, Larjantine).
Kosa i pé èd aou santi aou mié ?
Vèrsé : « Néna in vré dalon lé plis fidèl k’in frèr » (Provèrb 18:24).
Sak i vé dir : Bann vré dalon va soutien azot. Si zot i pans i pé èt util, koz èk in moun zot i fé konfians.
« Pandan 20 an, ma la pa di pèrsone ké moin lavé été forsé pou fé bann zafèr séksuèl. Akoz sa mèm, moin té souf in bonpé, moin té strès toultan é moin té dann dépitasion. Mé kan o final, ma Ia trouv in moun paré pou ékout amoin rakont tout sak lavé ariv amoin, lé inkroiyab koman ma la santi amoin soulajé » (Elif, Turki).
Vèrsé : « Jèt tout zot traka su li, parské li fé in kont ansanm zot » (1 Pièr 5:7).
Sak i vé dir : Kan zot i pri, Bondié i ékout azot vréman (Psom 55:22 ; 65:2). Parské li fé in kont èk zot, li pé èd azot konpran ké zot lé présié pou li.
« Aprann konèt Jéova la èd amoin géri mon bann blésir ké té o fon moin mèm. Astèr, mi pé di Bondié tout sak mi néna su lo kèr gras la priyèr. Sé vréman in kamarad k’i konpran vréman mon bann santiman » (Ana, Béliz).
Èské Bondié va arèt tout bann maltrètans su bann madam ?
Vèrsé : « Jéova [...] va rand la justis sak na poin papa momon é sak lé krazé, komsa na pu pèrsone su la tèr i fé pèr azot » (Psom 10:17, 18).
Sak i vé dir : Bondié va anlèv tout bann zinjustis an parmi bann zinjustis-la, néna bann zafèr kruèl é la violans ké désèrtin madam i subi.
« Sa la soulaj amoin aprann ké Jéova i va anlèv la maltrètans bann madam é bann ti fi. Ma la trouv la pé o fon d’moin » (Robèrta, Mèksik).
Pou aprann plis su lèspérans la Bib i done, su bann prèv ké nou pé aoir konfians dan son bann promès, é su lèd ké bann Témoin Jéova i pé aport azot gras la Bib jordi, domand in vizit gratui.
a Bann non la été chanjé.
b Jéova sé lo non Bondié (Psom 83:18) Agard lartik « Kisa i lé Jéova ? ».