Kosa la Bib i di si i ariv ke la natur i sakaj tout zafèr ?

Sak la Bib i di

Si néna in siklonn, si la mèr i débord ou dot choz ke i sakaj tout zafèr zordi, lé pa Bondieu ke lé dèryèr sa, mé li sousi ali pou bann domoun i subi tousala. Kan la natur i détrui tout zafèr, sa i fé souf bann domoun, é le roiyom Bondieu va fé disparèt tousala. Pou lèr, Bondieu i soulaj bann domoun ki subi bann déga ke la natur i fé (2 Korintien 1:3).

• Kan la natur i sakaj tout zafèr, akoz nou pe èt sur ke sa lé pa in punision Bondieu ?

• Kan la natur i sakaj tout zafèr, èske sa i prouv ke nou viv bann dèrnié jour ?

• Kan la natur i sakaj tout zafèr, koman Bondieu i èd sak i subi tousala ?

• Èske la Bib i pe èd anou pou prépar anou, avan la natur i sakaj tout zafèr ?

• Bann vèrsé la Bib ki soulaj le keur

Kan la natur i sakaj tout zafèr, akoz nou pe èt sur sa lé pa in punision Bondieu ?

Dan la Bib, nou lir ke défoi, Bondieu i ansèrv bann fors la natur pou aplik son bann jujman. Mé sa, na okin lien avèk bann déga ke la natur i fé.

• Kan la natur i sakaj tout zafèr, ninport kisa lé tué é blésé. O kontrèr, dapré la Bib, Bondieu i aplik son bann jujman rienk su sak lé mové. Par égzanp, kan li la détrui bann vil Sodom é Gomor, li la sov Lot, in bon moun, é son bann 2 fiy (Jenèz 19:29, 30). Bondieu la lir dann keur bann domoun té viv dann tan la, é li la détrui rienk sak li té juj kom mové (Jenèz 18:23-32 ; 1 Samuèl 16:7).

• Kan la natur i ve sakaj tout zafèr, li prévien pa kan li ariv. Parkont, avank li ansèrv bann fors la natur pou détrui bann mové moun, Bondieu té prévien azot chak foi. Tout sak té ékout son bann rapèl, la été sové (Jenèz 7:1-5 ; Matieu 24:38, 39).

• Si i ariv ke la natur i sakaj tout zafèr, lé osi akoz bann domoun. Poukosa ? Parske zot i gat lanvironnman é zot i konstrui dan bann zandroi ousa néna tranbleman d’tèr, ousa de lo i débord é ousa néna bann gro chaleur, siklonn, volkan i pèt é dot zafèr ankor (Révélasion 11:18). Bondieu lé pa résponsab bann désizion ke bann domoun i pran (Provèrb 19:3).

Kan la natur i sakaj tout zafèr, èske sa i prouv ke nou viv bann dèrnié jour ?

Oui. La Bib lavé anonsé lontan avan, ke dann tan « la fin se monn la », oubien « dan bann dèrnié jour », noré bann gro déga (Matieu 24:3 ; 2 Timoté 3:1). Par égzanp, par rapor nout lépok, Jézu la di : « Nora bann faminn é bann tranbleman d’tèr dan in landroi apré lot » (Matieu 24:7). I tard pa, Bondieu va anlèv su la tèr tout kalité zafèr i fé souf bann domoun, é osi bann déga ke la natur i fé (Révélasion 21:3, 4).

Koman Bondieu i èd sak la subi bann déga la natur ?

• Gras son Parol la Bib, Bondieu i soulaj sak la subi bann déga la natur. La Bib i promèt ke Bondieu i sousi ali pou nou é ke li resan nout soufrans (Izai 63:9 ; 1 Pièr 5:6, 7). Li di osi ke Bondieu i promèt anou, ke nou va viv in lépok ousa la natur va pu fé bann déga (gard le ti kad « Bann vèrsé la Bib ki soulaj le keur »).

• Bondieu i ansèrv son bann sèrviteur pou èd sak la subi bann déga la natur. Bondieu i ve ke son bann sèrviteur i imit légzanp Jézu. Kom lété anonsé a lavans, Jézu té soulaj « sak [lavé] le keur déchiré » é « tout sak lé an deuy » (Izai 61:1, 2). Bann sèrviteur Bondieu i éfors azot fé parèy ke li (Jan 13:15).

  An plus ke sa, Bondieu i ve ke son bann sèrviteur i èd sak la subi bann déga la natur (Akt 11:28-30 ; Galat 6:10).

Èske la Bib i pe èd anou pou prépar anou, avan la natur i sakaj tout zafèr ?

Oui. Mèm si la Bib lé pa in liv ki di anou koman rès vivan ankak la natur i fé déga, li donn bann konsèy ki pe èd anou pou prépar anou pou afront tousala. Par égzanp :

• Prépar anou avan la natur i sakaj tout. La Bib i di : « Le moun saj i voi sak lé danjereu é li kachièt ali » (Provèrb 22:3). Lé saj ke nou prépar in sak pou rès an vi, mèt ali paré pou amèn èk nou, é i fo nou prépar in plan sekour ki prévoi osi in landroi ousa nout fami i pouré alé ankak la natur i fé bann déga.

• Mont ke la vi i kont plus ke bann bien matèryèl. Sak la Bib i di lé vré : « Nou la pa aport rien dan le monn, é nou gingn pa anport rien èk nou non plu » (1 Timoté 6:7, 8). Nou devré èt paré pou lès nout kaz é nout bien pou sov nout vi. Oubli jamé ke la vi na plus la valeur ke bann bien matèryèl (Matieu 6:25).