Bann konstruksion ke la niabou fini avan le pandémi

Kom tou lé zan na plus san mil moun i fé batiz azot, nou la bezoin pluzanplus batiman pou nou ador Bondieu. Sé pousa bann sèrvis lokal dévlopman-konstruksion ki égzis dann monn antié té doi fé oubien refé plus 2 700 batiman pou ador Bondieu dann kouran lané sèrvis 2020a.

Lé bien regrétan, mé le pandémi Kovid-19 la chanboul bann projé la. Pou protèj nout bann frèr é seur é pou réspèk bann désizion gouvèrnman, le Komité pou lédision (in komité Kolèj santral) la fé arèt la plupar bann projé konstruksion partou su la tèr. Mé kan mèm sa, na plus 1 700 batiman pou ador Bondieu ke la été fé ou refé avan le pandémi, dann kouran lané sèrvis 2020. An plus ke sa, la gingn achèv fé plus san projé ki konsèrn bann zaktivité bann filial. Alon oir koman deu anparmi bann projé la la rann sèrvis nout bann frèr.

La filial Kamroun. Dann la vil Douala, la filial lavé bann vieu batiman ke té tro pti é té fo bann gro travo pou refé azot. Le Komité pou lédision té prévoi refé bann lokal la, mé le bann travo noré kout plu chèr ke le bann batiman an li mèm. Banna lavé majinn osi soi achté in nouvo térin, soi achté bann batiman ke lété déja la é refé azot, mé la pa fé ni inn ni lot.

An mèm tan ke sa, bann frèr la aprann ke dann nor la vil Douala, bann zotorité sur plas té prévoi aranj in chemin akoté inn nout bann sal lasanblé. Gras chemin la, noré gingn ariv san problèm juska su térin lasanblé é noré té plu fasil pou rakord anou su tout bann rézo. Té sa mèm mèm la filial lavé bezoin ! Sé pousa le Kolèj santral la donn son lakor pou konstrui bann nouvo batiman su in parsèl térin la sal lasanblé.

Bann Témoin èk bann zantrepreneur la mèt la min ansanm pou projé la ; gras se fason fé nou la gingn fé zékonomi su le tan èk larjan. Du kou, le projé la ariv moin chèr ke nou té pans : la gingn fé in lékonomi apepré 1 700 000 euro. La fami Bétèl la gingn rant dann bann nouvo batiman in ti pe tan avan le pandémi la komansé.

Astèr bann bétélit Kamroun i viv mieu é zot kondision pou travayé lé plu gayar ; pou banna, nouvo filial la lé in kado Jéova. In frèr èk son madam i di komsa : « Vréman nou la anvi travay plu dur pou mont ke nou aprési kado la pou son vré valeur. »

Lantèn traduksion tojolabal (Mèksik). Depu in bon bout tan, lékip traduksion tojolabal lété dann la filial Lamérik santral, akoté mèksiko. Mé soman, sé surtou dann bann vil Altamirano é Las Margaritas, ke té koz se lang tojolabal. Se bann vil la té apepré 1 000 kilomèt la filial. Du kou bann tradukteur té gingn pa suiv lévolusion se lang la. É navé poin asé d’frèr é seur gabié akoté la filial pou ni tradui an tojolabal é pou fé bann zanrejistreman.

Akoz sa mèm le Komité rédaksion (in komité Kolèj santral) la désid déplas lékip traduksion dann in landroi ousa i koz lang la. Sé pou sa, la filial la préfèr achté in batiman é refé ali, sa té revien moin chèr ke konstrui ou loué bann buro.

In traduckteur i ésplik kèl kontantman li la gingné : « Depu di zan ke moin lété tradukteur la filial, moin lavé jamé trouv in seul fami dann zalantour ke té koz mon lang. Zordi, nout lantèn traduksion lé an plin milieu le landroi ousa i koz tojolabal. Tou lé jour mi trouv domoun i koz tojolabal. Sa la èd amoin aprann plus de mo é la rann mon travay plu gabié ankor. »

Kèl projé néna pou lané sèrvis 2021 ?

Pou lané sèrvis 2021, si lé posib, i prévoi fé ou refé 75 lantèn traduksion é bann sant pou bann lékol biblik. Nou va kontinué donn paké su uit projé la filial ke lé inportan, kom par égzanp le nouvo projé buro mondial Ramapo (Léta New York), mé osi le projé pou déménaj la filial Larjantinn èk sak Litali. An plus ke sa, la bezoin plus 1 000 sal du Roiyom, i fo ranplas 6 000 batiman pou ador Bondieu parske zot i konvien pu, é i fo refé osi 4 000 sal du Roiyom.

Ousa i trouv larjan pou fé tout bann projé la ? Frèr Lázaro González, in frèr la filial Lamérik santral, la réponn késtion la kan li té pou koz su projé lantèn traduksion tojolabal. Li la di komsa : « Dann téritoir nout filial, nou na poin bonpe larjan. Donk nou noré pa gingn konstrui bann lantèn traduksion pou bann patoi lokal, san lèd nout bann frèr é seur partou su la tèr. Gras bann zofrann ke nout bann frèr é seur su tout la tèr i fé, astèr bann tradukteur lé plu pré bann domoun ki koz la lang ke lantèn i tradui. Nou di vréman gran mèrsi tout nout fami su la tèr pou zot gran keur. » An rézon, i gingn fé bann projé konstruksion la gras zot bann zofrann pou laktivité ke lé fé su tout la tèr. É sé surtou su le sit donate.jw.org ke i fé bann zofrann la.