Bann zopérasion sokour 2022 : lamour k’i aji ant bann frèr

La Bib lavé anonsé ké dan nout lépok nou noré bann gèr, bann tranbléman d’tèr, bann zépidémi é dot « zafèr k’i fé pèr » (Luk 21:10, 11). So bann profési la, la kontinié réalizé dan lané sèrvis 2022a. Par égzanp : Dann péi Lukrèn, la gèr la pété é la fé déga an parmi bann milion domoun. Dann monn antié, prèské tout bann péi té ankor antrinn sobat kont Kovid-19. An plis ké sa, bann katastrof naturèl la done paké é la touch in bonpé domoun. Par égzanp, tranbléman d’tèr Aiti é bann gro siklone Lamérik santral, Filipine é Sud Ès Lafrik. Koman bann Témoin Jéova la done in kou d’min bann frèr é sèr dann péi la ?

La ariv apépré 200 katastrof pandan lané sèrvis 2022 ! Nout lorganizasion la èd sak té touché. O final nou la dépans 12 milion dolarb pou bann zopérasion sokour la. Alon oir koman la utiliz in parti bann zofrann pou èd sak la sobat kont dé katastrof naturèl.

Tranbléman d’tèr Aiti

Lo 14 out 2021, in tranbléman d’tèr fors 7,2 la sokouy lo sud Aiti. Lé bien maléré mé nou la pèrd troi Témoin : dé sèr èk in frèr. Akoz tranbléman d’tèr la, sak la gingn sové, la sobat kont doulèr lo kor é doulèr lo kèr. In frèr k’i apèl Stephane, la di komsa : « Navé si tèlman domoun mor dan la vil, ké tou lé somèn navé in ta lantèrman, é sa, su dé moi amonté. » In not frèr k’i apèl Éliézer, i èsplik : « In bonpé d’frèr navé pu rien pou viv, ni in toi su zot tèt, ni in linj, mèm pa in soulié pou mèt dan zot pié. Kom chak instan bann sokous té arkomans, in bonpé té viv èk la pèr. »

Vitman, nout lorganizasion la sokour banna. La filial Aiti la done plis 53 tone manjé, èk bann tant, bach, matla, èk charjèr solèr pou gsm. An plis ké sa dan lané sèrvis 2022, la aranjé ou rofé an antié plis 100 kaz. Nou la dépans plis in milion dolar pou lopérasion sokour la.

Nout bann frèr é sèr i di gran mèrsi pou tousala. Lorette i rakont : « Lo tranblèman d’tèr la dégrèn nout kaz èk nout ti boutik. Navé pu rien pou nou manjé. Mé lorganizasion Jéova la pa lès anou tonbé. La done anou tout sak nou lavé bézoin. » Micheline i souvien : « Tranblèman d’tèr la, la kas lo ti payot ousa mi té viv èk mon dé garson. Mi té koné pu kosa té fo fé, apark prié pou gingn in lèd, é Jéova la répond amoin gras son lorganizasion. Astèr nou néna in kaz an dur. Mi lé pré pou fé tout sak mi gingn pou di mèrsi Jéova. »

Bann zotorité la bien romarké lo bann zopérasion sokour. Lo mèr Lazil la di komsa : « Bravo, parské zot la ariv vitman pou port sokour é osi parské zot la fé mont in gran rèspé pou bann zotorité. Moin lé kontan oir ké sak i intérès azot sé pa larjan. O kontrèr, zot i vé èd domoun. Sé zot lamour i pous azot fé sa. »

Lo siklone Ana la pas su Malaoui èk Mozanbik

Lo 24 janvié 2022, siklone Ana la travèrs Mozanbik apré sa la parti su Malaoui. La pli té arèt pa tonbé é lo van té souf for, juska 100 kilomètrèr. Siklone la, la kas bann poto lèstrisité èk bann pon. Dolo la monté é la inond partou.

Plis 30 000 Témoin Malaoui èk Mozanbik la soufèr èk siklone la. Charles, in frèr ké la done la min pou bann zopérasion sokour la, la di : « Mon dé bra la chapé kan moin la vu lo malizé bann frèr é sèr té dan, é tout sak zot lavé pèrd, é mon kèr la sénié. » Komsi té pa asé, lo ti pé manjé zot lavé mèt su koté é tout sak zot lavé ramasé dan zot plantasion, lo van la parti avèk. In bonpé la pèrd zot kaz. Lé bien maléré, in frèr la pèrd son madam èk son dé fi, kan lo bato sokour zot té dan, la chaviré, é zot la noiyé.

Siklone la té sèrié, té fé vréman pèr. Gran matin 1 èr, Malaoui, in landroi i apèl Nchalo, la famiy Sengeredo la antand in gro dézord parèy in kaskad : lété dé ravine té i désand. Kan li la vu sa, frèr Sengeredo la désid kit son kaz èk tout son famiy. Érèzman li la fé sa, parsk’akoz tout dolo la, in instan lavé pu d’kaz. Sak zot lavé, soi té abimé soi dolo la parti avèk. Banna la désid alé la sal. Normalman, a pié, 30 minit la asé pou arivé, mé la, zot la mèt dé zèr d’tan dépi zot kaz. Kan zot la arivé zot té bien mouyé é fatigé, mé omoin zot té sové.

Vitman, bann filial Malaoui èk Mozanbik la komans organiz bann zopérasion sokour. Zot la di bann rèsponsab sirkonskripsion èk bann zansien, kalkul kosa bann frèr é sèr rèskapé lavé bézoin, rékonfort azot é aport azot in lèd èspirituèl. La mèt an plas détroi komité sokour pou organiz bann zopérasion sokour. Vitman, sa la pèrmèt bann frèr é sèr gingn manjé èk dot zafèr ké zot lavé bézoin. La utiliz plis 33 000 dolar pou lèd umanitèr, é plis 300 000 dolar la sèrv pou répar é pou rofé bann kaz.

Bann komité sokour la bien kalkulé pou utiliz bann zofrann é sa té inportan parské la vi lé vnu vréman chèr. Par égzanp, kan bann zopérasion sokour la komansé, pandan sèt moi lo pri soso mai la monté 70 %, alor ké banna i manj sa tou lé jour. Lo pri lésans osi la mont an flèch. Pou fé d’zékonomi bann frèr la achèt an gro : manjé èk matèrièl konstruksion é zot la rod sa sur plas. Sé komsa k’zot la gingn in bon pri é lavé pa bézoin pèy transpor.

Bann zopérasion sokour la, la touch lo kèr bann frèr é sèr. Felisberto, in frèr Mozanbik, i di : « Moin la jamé vu in lorganizasion k’i done èk gran kèr komsa : matèryèl konstruksion, transpor, bann volontèr pou konstruksion, manjé é bann konsèy ranpli èk lamour. La nou la vréman vu kouk k’sé k’lamour ant frèr é sèr kom Jézu la an parlé dann Jan 13:34, 35. » Ester, in sèr Malaoui k’lo mari la fine mor la pèrd son kaz. Èl la di : « Mi té o bout, parské moin navé poin asé larjan pou fé in not kaz. Donk kan bann frèr é sèr lé vnu fé in kaz nèv pou moin, ondiré mi té déja dann paradi. »

Avèk lo monn nouvo k’i ariv, nou koné nora plizanpli katastrof (Matié 24:7, 8). Malgrésa, nou lé sur ké sak i sèrv Jéova va toujour gingn lèd zot la bézoin, parské zot i èm doné. Su donate.jw.org zot va trouv bann zinformasion su tout sort fason zot i pé doné. Mèrsi in bonpé pou tout sak zot i done.