Viv èk in maladi ki trèn : èske la Bib i pe édé ?

Sak la Bib i di

Oui. Bondieu i trakas in bonpe pou son bann zadorateur ke lé malad. Su inn anparmi zot, nou lir dan la Bib : « Jéova va soutien ali [...] pandan son maladi » (Psom 41:3). Si ou viv èk in maladi ki trèn, ala troi lidé ki poura èd aou :

1. Demann la fors Bondieu pou suport out situasion. Ou pe gingn « la pé ke Bondieu i donn, ke lé bien plu gran ke tout sak in moun i pe konprann ». Avèk sa, ou sra moin trakasé é ou va suport ankor mieu la maladi (Filipien 4:6, 7).

2. Gard in bon moral. La Bib i di : « In keur ke lé kontan i èd pou géri, mé la tristès i fé pèrd aou tout out fors » (Provèrb 17:22, Bible en français courant). Rès pa tro sèryeu, ri, plézant in pe, sa va éklèr out bann journé noir. An plus, sra bon pou out santé.

3. Rann plu for out léspérans dann lavnir. Mèm si ou na in maladi ki trèn, in léspérans ke lé sur i pe èd aou gard out joi (Romin 12:12). La Bib i di ke, i tard pa nou sa viv in lépok ousa « okin moun i abit su la tèr va di : “Moin lé malad” » (Izai 33:24). Lèrla, Bondieu va fé disparèt tout bann maladi ki trèn ke bann dokteur i gingn pa géri jordi. An plus ke sa, mèm sak lé vieu va arni jeun. Konsèrnan le moun ke lé finn vieu, la Bib i di : « Son chèr i sra plu fré ke kan li té inn ti marmay ; li va artourn kom dann tan li té jeun » (Job 33:25, Darby).

Inn ti remark : Mèm si zot lé konvinku ke Bondieu i èd azot vréman, bann Témoin Jéova i aksèp bann trètman médikal pou soign bann maladi ki trèn (Mark 2:17). Mé seulman, zot i konsèy pa pèrsonn pran in trètman o lieu d’in not ; pou zot, chakèn i doi fé son choi dann domèn la.