Èske bann Témoin Jéova lé bann vré krétien ?

Bann Témoin Jéova lé sur ke zot lé bann vré krétien. Poukosa ? Pou 3 rézon inportan : la baz nout bann kroiyans, le non ki démark anou é lamour ke nou néna pou inn é lot.

1. Su kosa bann Témoin Jéova i baz zot kroiyans ?

Jézu la di : ‘La parol Bondieu lé vérité’ (Jan 17:17). Kom Jézu, bann Témoin Jéova la toultan baz zot kroiyans su la Parol Bondieu. Par égzanp, gard sak la éspasé su la fin 19^èm sièk. Dan bann zané 1870, in group domoun la komans étudié la Bib avèk sèryeu. Zot la baz zot kroiyans su sak la Bib i di, mèm si té pa parèy sak bann Zégliz té ansègn. Aprésa, zot la komans koz bann vérité biblik la avèk domouna.

2. Poukosa nou apèl anou « Témoin Jéova » ?

Jéova i apèl son bann zadorateur son bann « témoin » parske zot i fé konèt la vérité desu li (Ébreu 11:4 – 12:1). Par égzanp, dann tan lontan, Bondieu la di èk son peup : « Zot lé mon bann témoin » (lir Izai 43:10). I apèl Jézu « le Témoin fidèl » (Révélasion 1:5). Donk an 1931, nou la pran le non Témoin Jéova. Nou lé fièr port le non la.

3. Koman bann Témoin Jéova i imit lamour Jézu ?

Jézu té ièm tèlman son bann disip ke li té konsidèr azot kom son fami (lir Mark 3:35). Lé parèy, bann Témoin Jéova i form in fami uni, su tout la tèr. Sé pousa ke ant nou, nou apèl anou « frèr é seur » (Filémon 1, 2). Nou obéi osi komannman la : « Èm tout lasanblé bann frèr » (1 Pièr 2:17). Nou fémont se lamour in bonpe fason. Par égzanp, nou èd nout bann frèr é seur ke la bezoin, é sa dan ninport kèl péi ousa zot i viv.

ALON APRANN PLUS

4. Nout bann kroiyans lé bazé su la Bib

Jéova lavé anonsé ke bann vérité ke néna dan la Bib, i sré bien konpri. Lir Danièl 12:4 é le ti not é koz su késtion la :

• Kosa noré an grann kantité pou bann sèrviteur Bondieu, furmezur ke zot noré étudié la Bib ?

Alon voir koman in group zétudian la Bib, ke Charles Russell té fé parti, la étudié la Parol Bondieu. Gard le VIDÉO é koz su le késtion ki vien apré.

VIDÉO : Zot la redékouv bann vérité biblik (7:45)

• Kèl métod le group Charles Russell la suiv pou étudié la Bib ?

Ou té koné sa ou ?

Nadfoi, nou la chanj detroi nout bann kroiyans. Poukosa ? Kom solèy kan i lèv i fémont tipe tipe bann détay la natur, Bondieu la fé konprann son Parol ti lanp ti lanp (lir Provèrb 4:18). Donk, mèm si la Bib i chanj pa, furmezur nou konpran ali plus, nout bann kroiyans i devien plu klèr.

5. Nou aji an akor avèk nout non

VIDÉO : In non ki fémont kisa nou lé (2:40)

• Poukosa le non Témoin Jéova lé bien choizi ?

Poukosa Jéova la choizi bann domoun pou èt son bann témoin ? Pou ke zot i fé konèt, ke li lé le vré Bondieu, é ke zot i dévoil bann zafèr manteur ki di desu li. Alon voir 2 mansonj.

Bann relijion i ansègn ke Bondieu i ve ke nou ador ali avèk bann zobjé, kom bann léstatu oubien bann zimaj. Lir Lévitik 26:1 é koz su bann késtion la :

• Kosa i lé la vérité su bann zidol ? Kosa Jéova i pans de bann zidol ?

Bann relijion i ansègn ke Jézu sé Bondieu. Lir Jan 20:17 é koz su bann késtion la :

• Kosa i lé la vérité su Bondieu é Jézu ? Èske lé 2 sé le mèm moun ?

• Kosa i fé aou konèt ke Jéova la anvoiy son bann Témoin prèch la vérité su li é su son Garson ?

6. Nou ièm anou inn é lot

La Bib i konpar bann krétien èk diféran parti le kor umin. Lir 1 Korintien 12:25, 26 é koz su bann késtion la :

• Koman bann vré krétien i réaji, kan zot bann frèr é seur i souf ?

• Dapré sak ou la vu, koman bann Témoin Jéova i fémont zot lamour pou inn é lot ?

Kan bann Témoin Jéova dan in péi i souf, lé zot dan le monn antié i réaji vitman. Gard le VIDÉO é koz su le késtion ki vien apré.

VIDÉO : Aiti lé touché par le siklonn Matthew (5:29)

• Koman bann zopérasion sekour bann Témoin i prouv zot lamour ?

SAK NOU LA APRANN

Bann Témoin Jéova lé bann vré krétien. Nou form in fami su tout la tèr, nout bann kroiyans lé bazé su la Bib é nou fé konèt la vérité su Jéova.

Alon révizé

• Poukosa nou la pran le non Témoin Jéova ?

• Koman nou konsidèr anou inn é lot ?

• Èske ou pans ke bann Témoin Jéova lé bann vré krétien ?

GARD SA OSI

In fim su listoir bann Témoin Jéova.

Les Témoins de Jéhovah. La foi en action, 1^re partie : La sortie des ténèbres (1:00:53)

Ala in zafèr manteur dan la relijion ke lé dévoilé par bann Témoin Jéova.

Le peup ki rann gloir le non Bondieu (7:08)

Bann répons pou bann késtion ke ou poz aou petèt su bann Témoin Jéova.

« Questions fréquentes sur les Témoins de Jéhovah » (paj jw.org)

Stephen lavé la èn dan son keur. Sa la pous ali fé bann mové zafèr. Sak li la vu ché bann Témoin Jéova la pous ali chanjé.

« Ma vie allait de plus en plus mal » (La Tour de Garde, 1^er juillet 2015)