LESON 2

Koz kom tou lé jour

2 Korintien 2:17

POIN INPORTAN : Koz kom ou fé tou lé jour é koz èk le keur, pou montré kèl santiman le sujé ke lé choizi i fé nèt dan out keur, é sak ou resan pou domoun lapou ékout aou.

KOMAN I FO FÉ :

Prépar aou èk sèryeu é pri Jéova. Demann Jéova èd aou pou kal out latansion rienk su out mésaj, olèrk su ou mèm. Ésèy bien konprann bann zidé inportan ke ou doi koz desu. Ansèrv out bann mo aou, kan ou va di bann zidé ke néna dan le sujé ; kontant pa ou résit par keur mo par mo bann fraz ékri su in papié.

Si ou kont lir in vèrsé la Bib, ousoi in not publikasion, abitué aou bien avèk le tèks, pou ke ou tatonn pa tro kan ou lir. Si dan le vèrsé, nou raport bann parol ke in moun la di, lir sa avèk santiman, mé pa bezoin fé tro tro non plu.
Lès out keur kozé. Réfléchi pou kèl rézon i fo ke domoun i antan mésaj la. Rès kalé su zot. Alor, out fason tienbo aou, out bann jès é le fason ou fé out figur, va montré out vré santiman é out jantiyès.

Kan i di koz kom nou fé tou lé jour, sa i ve pa dir koz èk toupé. Koz klèrman é koz la lang in fason korèk, pou gard le réspé pou out mésaj.
Regard sak lapou ékout aou. Kan ou koz, regard domoun dann zieu in moman, si landroi ousa ou viv sa i chok pa. Kan ou fé in diskour, regard in moun inn par inn, olèrk regard tout domoun in kou, oubien jèt in zieu vitfé su banna.