LESON 58
Rès fidèl Jéova
In krétien va pa lès rien ni pèrsonn kas son relasion avèk Jéova. Sé sak ou ve osi. Out fidélité néna in bonpe la valeur pou Jéova (lir 1 Kronik 28:9). Kèl situasion i pouré tès out fidélité ? É koman fé fas situasion la ?
1. Koman désèrtin i ésèy détourn anou de Jéova ?
Bann moun i voudré amèn anou arèt sèrv Jéova. I pe èt bann moun ke la kit la vérité, é ki fann zafèr manteur su lorganizasion Jéova, pou kas nout foi. Sé bann zaposta. Néna osi bann chèf la relijion ki propaj bann zidé manteur su nou, pou tronp bann krétien san méfians. Lé danjereu fé déba avèk bann moun la oubien fé in ka avèk sak zot i di dan zot liv, zot blog, zot sit Intèrnèt, zot vidéo... Par rapor bann moun ki ésèy kas nout fidélité, Jézu la di : « Lès azot. Sé bann gid aveug. É si in laveug i gid in laveug, zot deu va tonm dan in trou » (Matieu 15:14).
2. Koman nout bann choi i fémont nout fidélité ?
Par amour pou Jéova, nou nora okin lien avèk le fo relijion. Sa i konsèrn nout travay, nout bann zaktivité, mé osi tout bann lasosiasion, bann lorganizasion ke nou lé dedan. Kan li koz su le « Gran Babilonn », Jéova i di anou bien : « Sort anndan la, mon peup » (Révélasion 18:2, 4).
ALON APRANN PLUS
Alon voir koman rejèt sak i pouré afébli nout fidélité pou Jéova, é alon voir kosa i ve dir ‘sort anndan le Gran Babilonn’.
3. Fé atansion bann fo lansénian
Koman i fo réaji si nou antan in moun kritik lorganizasion Jéova ? Lir Provèrb 14:15 é koz su késtion la :
Poukosa i fo pa kroir tout sak nou antan ?
Lir 2 Jan 9-11 é koz su bann késtion :
Koman nou doi konport anou devan bann zaposta ?
Mèm si nou na poin kontak èk bann zaposta, par koman zot bann zidé i pe ariv juska nou ?
Dapré ou, kosa Jéova noré resanti si nou ékout, sak i di mové zafèr desu li é desu son lorganizasion ?
4. Kan in frèr i fé in péché
Si nou dékouv ke in moun dan lasanblé la fé in péché grav, kosa nou doi fé ? Pou konèt, alon étudié in vèrsé dan la Loi ke Bondieu la donn bann Zisraélit. Lir Lévitik 5:1.
Dapré prinsip la, si nou koné ke in moun la komèt in péché grav, nou doi koz èk bann zansien. Mé avan, nou va fémont nout bonté anvèr le pécheur é nou va ankouraj ali alé konfès li mèm son péché èk bann zansien. Si li fé pa, nout fidélité pou Jéova va pous anou mèt bann zansien o kouran. Koman sak nou va fé, va fémont nout lamour fidèl pou...
Jéova ?
le moun ke la péché ?
lé zot dan lasanblé ?
Si in frèr la fé in péché grav, fé sak i fo pou èd ali.
5. Rès loin le Gran Babilonn
Lir Luk 4:8 é Révélasion 18:4, 5 é réponn bann késtion la :
Èske mi na toujour in lien avèk mon lansien relijion ?
Èske mi fé parti in lorganizasion ke na in lien avèk in not relijion ?
Èske mon travay i soutien le fo relijion ?
Èske néna in not zafèr dan mon vi, ki fémont ke le fo relijion i influans amoin ankor ?
Si moin la réponn oui, inn anparmi bann késtion la, kèl chanjman mi doi fé ?
Antouka, pran bann désizion ke va fémont out fidélité pou Jéova é ke va pèrmèt aou gard in bon konsians.
In lasosiasion lié èk la relijion i demann aou fé in don. Kosa ou va fé ?
NADFOI DOMOUN I DI : « Pou défann la vérité, i fo konèt sak bann zaposta i di su bann Témoin Jéova. »
Èske ou pans ke sé in bon lidé ? Poukosa ?
SAK NOU LA APRANN
Par fidélité pou Jéova, nou va pa frékant sak i ésèy détourn anou de li.
Alon révizé
Poukosa i fo pa ékouté sak bann zaposta i di ?
Kosa nou doi fé si nou aprann ke in frèr ou in seur la fé in péché grav ?
Koman in krétien va montré ke li lé pu dan le fo relijion ?
GARD SA OSI
Koman i fo réaji kan nou antan bann zafèr manteur su bann Témoin Jéova ?
« As-tu vraiment tous les faits ? » (La Tour de Garde, août 2018)
Kosa i fo fé si in travay oubien in laktivité i amèn anou soutien le Gran Babilonn ?
Juska ousa detroi nout bann zopozan lé pré pou alé, pou kas nout foi ?
Le zistoir in prèt chinntois ke la koup tout lien avèk son relijion (son zistoir « Je recherchais Dieu depuis mon enfance »).
« La Bible transforme des vies » (La Tour de Garde, 1er juillet 2011)