Kisa i lé le Roi dann roiyom Bondieu ?

• Choizi par Bondieu. « Moin, ma la mèt an plas mon roi [...] Mi va donn aou bann nasion kom léritaj é la tèr juska son dèrnié bout kom propriété » (Psom 2:6, 8).

• In zéritié le roi David. « In zanfan lé né pou nou, la donn anou in garson [...]. Su le tronn David é dan son roiyom, son pouvoir sra plu gran é la pé sra san fin. Li sra la pou toultan » (Izai 9:6, 7).

• Li lé né dann Bètléèm. ‘O Bètléèm, sé de ché ou ke va sort pou moin sak i sra chèf. Son pouvoir va étann juska dèrnié bout la tèr’ (Miché 5:2, 4).

• Bann domoun la rejèt ali é la tué ali. « Li lété détésté é li lavé poin d’valeur pou nou. [...] La transpèrs ali pou nout bann péché, la rabès ali juska tèr pou nout bann fot » (Izai 53:3, 5).

• Li la été résusité é li la gingn loneur. « Ou va pa lès amoin dan la Tonm. Ou va pa pèrmèt ke le kor out fidèl i pouri. [...] Su out koté droit, néna le kontantman pou toultan » (Psom 16:10, 11).

Jézu Kris : le Chèf ki fo pou dirij anou

Anparmi tout domoun ke la viv su la tèr, néna rienk in seul moun i konkord bien avèk tout sak nou vièn dékri an o la, pou èt le Chèf ki fo pou dirij anou, se moun la, sé Jézu Kris. An vré, in lanj la di avèk Mari le momon Jézu ke : « Bondieu va donn ali le tronn le roi David son zansèt [...], é son roiyom va jamé fini » (Luk 1:31-33).

Kan Jézu lété su la tèr li la jamé dirij lé zot antank chèf. Sé depui dann sièl ke li va dirij tout la tèr antank Roi le roiyom Bondieu. Kosa i mont ke Jézu lé le Dirijan ki fo anou ? Gard kosa li la fé kan li lété su la tèr.

• Li la soulaj bann domoun. Jézu té i èd bann bonom, bann madam, bann marmay, bann gramoun, é sa, san gard kèl koté banna té i sort oubien si zot té rich ou pov (Matieu 9:36 ; Mark 10:16). Lavé in jour, in moun ke lavé la lèp la supli ali é la di : « Si ou ve, ou pe rann amoin pur », le keur Jézu lété plin d’pitié é li la géri le bonom (Mark 1:40-42).

• Li la ansègn domoun koman kontant le keur Bondieu. Jézu la di : « Zot i pe pa travay kom lésklav pou Bondieu é pou Larjan. » Li la di anou osi ke nou doi trèt lé zot kom nou voudré ke banna i trèt anou, sa lé in vérité biblik ki sra nomé Lansègnman an or. Li la montré ke Bondieu i regard pa rienk sak nou fé, mé osi sak nou pans dan nout tèt é sak nou resan. Donk, sa i mont ke pou kontant le keur Bondieu, nou doi kontrol nout bann santiman ke lé dann fon nout keur (Matieu 5:28 ; 6:24 ; 7:12). An plus ke sa, li la bien fé konprann ke pou gingn le vré kontantman, i fo aprann sak Bondieu i ve nou fé é aprésa fé sak li demann anou (Luk 11:28).

• Li la aprann anou sak i ve dir émé. Sak Jézu té i di é sak li té i fé, té i mark léspri domoun é i té touch zot keur. « La foul domoun lété étoné par son fason ansénié, parske li té ansègn kom in bonom ke na lotorité » (Matieu 7:28, 29). Li la ansègn domoun, ke « Zot i doi èm zot bann lènmi ». Li la priyé osi pou désèrtin ke lété dann ta, anparmi sak la fé tué ali : « Papa, pardonn banna, parske zot i koné pa sak zot i fé » (Matieu 5:44 ; Luk 23:34).

Jézu néna tout bann kalité ki fo pou èt le pluméyeur chèf pou dirij le monn, li lé in chèf toujour paré pou édé é li lé bon anvèr tout domoun. Mé kansa li va komans gouvèrné ?