Sou le dominans Bondieu, tout la kréasion va viv soudé ansanm é an pé.

Poukosa nou la bezoin le roiyom Bondieu ?

Depui le komansman listoir bann premié zumin, nout Kréateur, ke i apèl Jéova, lété le seul Chèf pou dirij tout zafèr. Li té gouvèrn tout zafèr avèk in bonpe lamour. Li lavé fé pou tout bann domoun, in joli ti landroi pou viv, ke té i apèl jardin Lédèn. Li la donn azot manjé an grann kantité. Li la donn azot osi in gayar travay pou fé (Jenèz 1:28, 29 ; 2:8, 15). Bann domoun noré viv an pé, si zot lavé aksèp le dominasion Bondieu ke lé bazé su lamour.

Adan i tienbo dan son min le frui ke lavé pa le droi manjé ke Èv i vièn donn ali. — Adan é Èv la rejèt lotorité Bondieu.

La Bib i fé konèt anou ke in lanj rebèl, ki sra aplé Satan le Diab apré, la drès ali kont le droi ke Bondieu néna pou gouvèrné. Li la fé kroir ke bann domoun sré plus ereu san la diréksion Bondieu é san son bann konsèy. Lé bien malereu, mé Adan é Èv, nout bann premié paran, la suiv mèm chemin ke Satan : zot la drès azot kont Bondieu (Jenèz 3:1-6 ; Révélasion 12:9).

Kom zot la rejèt lotorité Bondieu, Adan é Èv la pèrd zot joli ti paradi ousa zot té i viv, é zot la pèrd léspoir viv pou toultan avèk in gayar santé (Jenèz 3:17-19). Zot désizion la osi aport bann problèm pou zot zanfan, ke lé né apré zot péché. Kom Adan la péché, la Bib i di ke « le péché lé rantré dan le monn é le péché la amèn la mor » (Romin 5:12). Le péché la amèn in not gro maleur : « Lom i dominn lom pou son maleur » (Éklézias 8:9). Tousa pou di, ke kan bann domoun i dirij dot moun, lé oblijé ke sa i amèn problèm.

KAN LOM I KOMANS DOMINN LOM

Nèmrod i debout kom in moun fièr. É par dèryèr, domoun i konstrui in batiman. — Nèmrod la rebèl ali kont Jéova.

La Bib i di ke le premié bonom ke la komans dirij dot moun té apèl Nèmrod. Se bonom la, la drès ali kont le dominans Jéova. Depui lépok Nèmrod, bann moun ke na lotorité i utiliz zot pouvoir pou abuz su lé zot. Na 3 000 an d’sa, le roi Salomon la ékri : « Ma la vu bann larm sak i subi loprésion, é lavé poin pèrsonn pou konsol azot. Sak té abuz su zot lavé le pouvoir » (Éklézias 4:1).

Zordi, la situasion lé komsa osi. Dann lané 2009, bann Nasion Zuni la ékri ke plus i sa va plus i konsidèr ke « le mové fason gouvèrné », lé « inn anparmi bann premié rézon poukosa néna tout bann soufrans dan le monn ».

LEUR LA ARIVÉ POU CHANJÉ !

Le monn la bezoin bann bon chèf pou dirij ali é in méyeur gouvèrnman. É sé sa mèm mèm nout Kréateur i promèt anou !

In tralé zimaj : Bann konsékans le fason gouvèrné bann zumin. 1) In madam chinoi lé asiz atèr dann in chemin sal, li tienbo dan son bra son zanfan ki pleur. 2) In vieu mesieu malad lé su in li lopital. 3) Bann solda lé in landroi ousa na la gèr, lapou tir bann kou d’bal. 4) Bann domoun an kolèr lé antrèn manifésté é i tienbo bann pankart. 5) Kan zot la ariv zot kaz, in madam é son fiy i rann azot kont ke la vit la port la été kasé. 6) In vil avèk bann cheminé luzinn é bann poto éléktrik, dan in gro fumé noir. — Mèm bann pluméyeur gouvèrnman ke i égzis su la tèr, la pa gingn trouv bann solusion pou bann problèm grav ke néna partou dan le monn.

Bondieu la mèt an plas in roiyom, oubien in gouvèrnman. Se gouvèrnman va ranplas tout bann gouvèrnman su la tèr é « li touseul va dur pou toultan » (Danièl 2:44). Ala kosa i lé le gouvèrnman Bondieu, ou le roiyom Bondieu, pou kosa domoun par milion i pri (Matieu 6:9, 10). Mé se gouvèrnman la i sra pa dirijé par Bondieu li mèm. Bondieu la mèt an plas kom Chèf pou dirij se gouvèrnman, kèlkin ke la viv su la tèr. Kisa li la choizi ?