LESON 05

La Bib lé le mésaj Bondieu pou bann zumin

Vèrsion inprimé

Jéova la fé anou in gayar kado : la Bib, 66 liv an tou. Mé riskab ou demann aou : « Koman la Bib la ariv juska nou ? Kisa la ékri la Bib ? » Pou réponn bann késtion la, alon voir detroi zafèr su la Bib.

1. Si sé bann zom la ékri la Bib, poukosa i di sé la Parol Bondieu ?

La Bib la été ékri par apepré 40 bonom, pandan anviron 1 600 zan, depui 1513 avan nout tan juska apepré 98 de nout tan. Bann zékrivin la, lavé poin le mèm vi. Anparmi zot, lavé bann gardien mouton, bann pécheur poison é bann roi. Pourtan, zot tout lété dakor. Mé koman sa lé posib ? Parske sé Bondieu la fé ékri la Bib (lir 1 Tésalonisien 2:13). Bann zékrivin la pa ékri sak zot té i pans, zot « la kozé de la par Bondieu » parske zot lété « pousé par léspri sina » (2 Pièr 1:21). Bondieu la ansèrv son léspri sin pou inspir bann zom, sétadir pou pous banna ékri son bann pansé (2 Timoté 3:16).

2. Kisa i pe avoir la Bib ?

Bann domoun « tout nasion, é tribu, é lang, é peup » i pe konèt le gayar nouvèl ke néna dan la Bib (lir Révélasion 14:6). Bondieu la fé ansort ke la Bib lé disponib dann in bonpe lang, plus ke tou lé zot liv. Dan ninport kèl landroi ousa li viv, oubien la lang li koz, prèske tout domoun i pe lir la Bib.

3. Koman Jéova la protèj la Bib ?

La Bib la été ékri su bann zafèr ke i dur pa lontan, kom le kuir èk papirus. Mé bann zom ke té ièm la Bib la kopié é la rekopié ali. Zot la aplik azot pou fé sa. É pandan ke bann domoun ke lavé lotorité, la ésèy fé disparèt ali, dot lété pré pou mor pou protèj la Bib. Jéova la pa lès rien é okin moun fé disparèt la Bib. La Bib i di : « La parol nout Bondieu i dur pou toultan » (Izai 40:8).

ALON APRANN PLUS

Alon voir in pe plu pré, koman Bondieu la inspir sak la ékri la Bib, koman li la protèj la Bib é sak li la fé pou ke tout bann zumin i gingn lir la Bib.

4. La Bib li mèm i di anou kisa la fé ékri ali

Gard le VIDÉO. Aprésa lir 2 Timoté 3:16 é koz su bann késtion ki vien apré.

VIDÉO : Kisa la ékri la Bib ? (inn ti morso) (2:48)

Si sé bann zom ke la ékri la Bib, poukosa i di ke sé la Parol Bondieu ?
Dapré ou, èske lé lojik kroir ke Bondieu la gingn fé konèt son bann pansé bann domoun ?

In patron i di son sekrétèr sak i fo ékri, é son sekrétèr i tap sa su lordinateur. — In sekrétèr i ékri in lèt, mé sé son résponsab i di ali kosa i fo ékri. Lé parèy, bann zom la ékri la Bib, mé sé le pansé Bondieu ke zot la ékri.

5. La Bib lé toujour la mèm, malgré bann zatak

Si vréman sé Bondieu la fé ékri la Bib, lé normal ke li protèj la Bib. Depui toultan, bann zom ke lavé lotorité, la ésèy détrui la Bib. Mèm bann chèf la relijion la ésèy anpèch domoun lir ali. Mé mèm si la drès kont zot é la rod pou tué azot, bonpe lavé pa peur afront la mor pou protèj la Bib. Pou konèt plus la d’su, gard le VIDÉO é koz su bann késtion ki vien apré.