In lèd pou bann madam maltrèté
« NÉNA d’milion madam èk bann ti fi partou dési la tèr ké la été maltrèté. Èsk’aou osi la fine ariv aou ? Alon oir poukosa out sékurité lé inportan pou Bondié é kosa li sar fé èk sak i maltrèt bann madam ».
Sé komsa sa mèm i komans lo lartik « La sékurité bann madam : Sak la Bib i di ladsi » dési jw.org. Su la fin la paj lintèrnèt i gingn télécharj lartik-la an PDF, komsa ou pé inprim ali é pli ali an kat. Stacy in sèr Zéta zuni i rakont : « Ma la inprim plizièr trak, é èk in sèr, nou la parti dépoz sa dan in foiyé pou fanm batu dann téritoir nout lasanblé. »
In madam k’i travay laba, la domandé si èl té pé aoir dot trak pou gingn done sa bann madam k’i viv la. Rézulta, nout dé sèr la distribué 40 trak an plis avèk 30 ti kart jw.org. In pé pli tar kan zot la rovni, sak i okip lo foiyé la di k’i sré bien si i amont tout sak i abit la, koman i èspas in létud la Bib.
Stacy èk dé sèr la gingn lo mèm rézulta dan in not foiyé. Laba zot la lès sink trak é la rodomand azot dot an plis. In madam k’i travay laba la di : « Ti trak-la i sa èd bann madam i abit tèr la. » Èl la rajouté : « Sé sa mèm nou lavé bézoin. » Kan bann sèr la rovni dan lo foiyé, néna détroi madam té vé konèt koman i èspas in létud la Bib, é néna dé an parmi té vé alé la sal lo ouikèn té ariv.
Stacy i di : « Nou la rès baba kan nou la vu koman domoun té kontan lir joli ti lartik-la. Sa sé in gayar manièr partaj lo mésaj lo Roiyom èk so bann madam ké té maltrèté. Sa la touch anou vréman oir koman banna té kontan gingn bann zankourajman-la. Nou lé présé oir osi, koman Jéova va béni bann zéfor nou fé pou ké lo gayar nouvèl i touch zot kèr. »