Август

Приметин дуј важна буќа сој пишиме ко акава стихо: 1) Е праведна манушен ка овел лен неволје. 2) О Јехова спасинела амен таро амаре неволје. Сар спасинела амен о Јехова? Јекх начин тано аѓаар со поможинела аменге те хаљова кај амаро живото авдиве нане те овел бизо проблемија. Адава со о Јехова ветинела аменге кај ка ова радосна џикоте служинаја леске на значинела кај панда акана ка овел амен живото бизо секирацие (Иса. 66:14). О Јехова мангела те овел амен шукар живото, адалеске охрабринела амен те концентририна амен ки иднина кеда ка уживина ко живото засекогаш (2. Кор. 4:16-18). Џи тегани, ов поможинела аменге понадари да те служина леске (Плач 3:22-24). Со шај те сикљова таро верна слуге е Јеховаскере таро пурано време хем таро амаро време? Шај ка овен амен проблемија со на очекујнаја лен. Ама, ако иси амен доверба ко Јехова тегани ов секогаш ка овел аменцар (Пс. 55:22; w23.04 14-15, пас. 3-4)

Шај бут те сикљова таро пример е Јосифескоро хем е Маријакоро кола со сине спремна те шунен е властен чак кеда на сине ленге локхо (Лука 2:1-6). Кеда и Марија сине ко ењато масек кхамни, о Август, о Римско императори заповединѓа ки цело Римско територија те керел пе попис. Адалеске о Јосиф хем и Марија ваљанѓе те џан ко Витлеем кова со сине дур 150 километрија а ко друмо сине бут брегија. Адава друмо ни хари на сине локхо, посебно е Маријаке. Ола сигурно секиринена пе сине ма те случинел пе нешто лаја или е бебеа. Со ако астарена ла о дукха? Сепак, ко воги пхиравела сине е бебе кова со ваљани сине те овел о Месија. Дали акава шај сине те овел ленге оправдување те на шунен о закони? Иако е Јосифе хем е Марија сине лен шукар причине те секиринен пе, сепак ола сине послушна ко адава закони. О Јехова благословинѓа лен баши ленгири послушност. И Марија ресља састи ко Витлеем хем бијанѓа јекхе састе бебе, чак поможинѓа те исполнинел пе јекх библиско пророштво! (Мих. 5:2; w23.10 8, пас. 9; 9, пас. 11-12).

Со ако чак адава со размислинеа те коментирине ко состанокија керела те овел тут трема? Шај те поможинел туке адава со ка спремине тут шукар (Изр. 21:5). Со пошукар пенџареа о материјали, добором полокхе ка овел туке те коментирине. Исто аѓаар де кратка коментарија (Изр. 15:23; 17:27). Со пократко тано тло коментари, добором похари ка овел тут трема. Адалеа со кратко коментиринеа тле лафенцар сикавела кај сиан шукар спремимо хем кај шукар хаљовеа о материјали. Со ако применинеа несаве таро акала предлогија ама иси тут панда трема те коментирине повише таро јекх или дуј пути? Ов уверимо кај о Јехова ка ценинел тло трудо те кере адава со шај (Лука 21:1-4). Те де тло најшукар на значинела те чхиве туке товар со нашти те пхираве ле (Фил. 4:5). Размислин со шај те кере, чхив туке цел те кере адава хем молин тут башо андруно мир. Ко почеток тли цел шај те овел те де јекх кратко коментари (w23.04 21, пас. 6-8).

О апостол Павле спорединела амен војниконцар кола сој спремна хем уравде борбаке. Таро јекх војнико очекујнела пе ко секова време те овел спремно кеда иси војна. Слично тано аменцар да. Кеда пхираваја о оклоп е веракоро хем е мангипаскоро хем о шлеми баши надеж тегани амен сием спремна башо е Јеховаскоро диве. О оклоп заштитинела е војникоскоро вило, а и вера хем о мангипе заштитинена амаро симболично вило. Акала особине ка поможинен амен понадари да те служина е Девлеске хем те џа пало Исус. И вера уверинела амен кај о Јехова ка наградинел амен адалеске со родаја ле цело амаре вилеа (Евр. 11:6). Акава ка поттикнинел амен те ачхова верна амаре Водаческе, е Исусеске, чак ако ваљани те истрајна ко несаво пхарипа. Кеда размислинаја башо искуствија таро пхраља хем пхења кола со ачхиле верна иако сине лен прогонство или финансиска проблемија, адава шај те бајрарел амари вера те шај амен да те издржина кеда ка овел амен пхарипа. Исто аѓаар ако џаја пало пример околенгоро со поедноставинѓе пумаро живото хем чхивѓе о Царство ко прво тхан, адава ка поможинел аменге да те на чхива о материјална буќа ко прво тхан (w23.06 10, пас. 8-9).

И самоконтрола тани способност те контролирине тле чувствија хем постапке. Ој ваљани аменге те шај те поттикнинел амен те исполнина амаре целија, посебно кеда адава тано пхаро или нане амен желба те кера адава. Ма бистре кај и самоконтрола тани јекх таро особине со авена таро свети дух, адалеске молин е Јехова преку пло свети дух те поможинел тут те развине акаја важно особина (Лука 11:13; Гал. 5:22, 23) Ма аџикер те овен тут совршена условија. Ко акава свето веројатно никогаш нане те овен амен совршена условија. Ако аџикераја адава шај никогаш те на исполнина амари цел. Шај нане амен желба адалеске со амари цел дикхјола аменге пхари хем адалеске мислинаја кај нашти те исполнина ла. Ако ту да мислинеа аѓаар, дали шај тли цел те одвојне ла ко потикне целија? На пример, ако тли цел тани те развине несави особина, соске на пробинеа прво те сикаве ла ко потикне буќа? Ако иси тут цел те читине цело Библија, соске на почминеа аѓаар со ка читине похари материјали? (w23.05 29, пас. 11-13).

Џикоте трајнена о последна диве о Јехова преку пли организација дела амен редовно духовно храна те шај те поможинел аменге понадари да те џа ко „Свето Друмо“ (Иса. 35:8; 48:17; 60:17). Шај те вакера кај кеда некој почминела те проучинел и Библија, ов почминела те џал ко „Свето Друмо“. Несаве ачхона само кратко време ко адава друмо хем пало адава икљона лестар. А јавера тане одлучна те ачхон ко адава друмо џикоте на ресена ки пли цел. Која тани ленгири цел? Окола со иси лен небесно надеж, о „Свето Друмо“ ингарела лен ко е „Девлескоро рај“ ко небо (Отк. 2:7). А окола со иси лен надеж те живинен ки пхув адава друмо ингарела лен џи ко крајо таро милја берша кеда сарине ка овен совршена. Ако сиан ко адава друмо ма иран тут палал те дикхе о буќа со мукхљан лен хем ма икљов лестар џикоте на ресеа ки тли цел ко нево свето (w23.05 17, пас. 15; 19, пас. 16-18).

Кеда размислинеа башо са адава со керѓа туке о Јехова, сиан благодарно хем мангеа те де ле лафи кај ка служине леске цело живото (Пс. 116:12-14). Бут точно тано адава со вакерела и Библија, кај „секова шукар хем совршено поклон“ авела таро Јехова (Јак. 1:17). На постојнела побаро поклон тари откупно жртва лескере Чхавескири е Исусескири. Размислин кобор шужо поклон тани и откупнина. Преку лате шај те ова паше е Јеховаја. Ов исто аѓаар дела амен прилика те живина вечно (1. Јов. 4:9, 10). Адава со ка де завет е Јеховаске тано најшукар начин сар шај те сикаве кај сиан леске благодарно башо најбаро мангипе со сине некогаш сикавдо хем башо са о јавера благословија со добинѓан лен лестар (5. Мој. 16:17; 2. Кор. 5:15; w24.03 5, пас. 8).

Кеда дикхаја кобор бут руминдиле о мануша авдиве осетинаја амен исто сар о праведно Лот. Леске сине бут пхаро башо безобразно понашибе е лошно манушенгоро, соске ов џанља кај амаро небесно Дад мрзинела асавко понашибе (2. Пет. 2:7, 8). Адалеске со хор поштујнела сине хем мангела сине е Девле, ов мрзинела сине о неморално понашибе е манушенгоро со сине околу лесте. Амен да авдиве живинаја машкар о мануша кола со бут хари или ич на поштујнена е Јеховаскере мерилија. Сепак, амен шај те ачхова морално чиста ако понадари да бајрараја амаро мангипе спрема о Девел хем иси амен исправно дар лестар. Те шај те кера адава, о Јехова охрабринела амен преку о лил Изреки. Са е христијанен, бизи разлика дали мурша или џувља, терне или пхуре, шај те овел лен корист таро мудра советија со аракхљона ко акава лил. Кеда дараја таро Јехова, нане те дружина амен околенцар со керена лошна буќа (w23.06 20, пас. 1-2; 21, пас. 5).

Шај тли фамилија противинѓа пе туке или шај жртвујнѓан нешто ко материјално поглед те шај те чхиве е Девлескоро Царство ко прво тхан ко тло живото (Мат. 6:33). Ако тано аѓаар, тегани шај те ове сигурно кај о Јехова дикхља са адава со керѓан баши лесте (Евр. 6:10). Веројатно хем коркори уверинѓан тут кобор тане точна е Исусескере лафија: „Ни јекх на мукхља кхер, или пхраља, или пхења, или даја, или даде, или чхавен, или ниве баши манде хем башо шукар хабери, а те на дел пе леске акана ко акава време 100 пути повише: кхера хем пхраља хем пхења хем даја хем чхаве хем ниве, ама заедно акалеа хем прогонство, а ко време со авела хем вечно живото“ (Мар. 10:29, 30). О благословија со добинѓан лен тане бут побаре тари било која жртва со керѓан ла (Пс. 37:4; w24.03 9, пас. 5).

Кеда сине баро бокхалипе ки Јудеја о пхраља тари Антиохија одлучинѓе секој спрема пле можностија те бичхален помош е пхраленге со живинена ки Јудеја (Апо. 11:27-30). Иако о пхраља тари Јудеја живинена сине бут дур, о христијања тари Антиохија мангле те поможинен ленге (1. Јов. 3:17, 18). Амен да шај те сикава сочувство кеда дознајнаја кај амаре пхраља тане погодиме тари несави катастрофа. Амен сикаваја кај сием спремна одма те поможина аѓаар со пучаја е старешинен дали иси нешто со шај те кера, даја прилог башо активностија со керена пе ко цело свето или молинаја амен околенге сој погодиме таро природна катастрофе. Амаре пхраленге хем пхењенге исто аѓаар шај ка ваљани помош те шај те овен лен о основна буќа. Кеда амаро Цари о Христос Исус ка авел те анел осуда, амен мангаја те аракхел амен сар сикаваја сочувство хем те канинел амен те наследина о Царство (Мат. 25:34-40; w23.07 4, пас. 9-10; 6, пас. 12).

О Исус сине разумно исто сар о Јехова. Ов сине бичхалдо ки пхув те шај те проповединел е нашавде бакхренге таро Израел. Ама џикоте керела сине пли задача, ов сикавѓа кај тано разумно. На пример, ки јекх прилика јекх џувли која со на сине Израелка, молинѓа ле те сасљарел лакере чхаја соске сине ла демони хем бут мучинела пе сине. Поттикнимо таро сочувство, о Исус керѓа адава башо со молинѓа ле и џувли (Мат. 15:21-28). Те дикха панда јекх пример. Ко почеток тари пли служба, о Исус вакерѓа: „Секој со на признајнела... кај верујнела ки манде, ме да... нане те признајнав кај тано мло ученико“ (Мат. 10:33). Ама, дали о Исус откажинѓа пе таро Петар, иако трин пути на признајнѓа кај тано лескоро ученико? На, соске о Исус џанља кај е Петареске пело бут жал башо адава со керѓа хем кај сине леске верно. Откеда воскреснинѓа, о Исус појавинѓа пе е Петареске хем најверојатно уверинѓа ле кај простинѓа леске хем кај мангела ле (Лука 24:33, 34). Хем о Јехова хем о Исус Христос тане разумна. Сар тано аменцар? О Јехова очекујнела амен да те ова разумна (w23.07 21-22, пас. 6-7).

Соске шај те ова сигурна кај и пхув ка овел рај? Со шај те вакера е јаверенге те шај те уверина лен кај акава ка овел чаче? Прво, о Јехова лично денѓа акава ветување. Ко лил Откровение пишинела: „Окова со бешела ко престол вакерѓа: ’Дикх! Керава са о буќа неве‘“. Ле иси ле мудрост, сила хем желба те исполнинел пло ветување. Дујто, о Јехова тано добором сигурно кај ка исполнинел пе акава ветување, со керела лафи сар те пхене више исполнинѓа пе. Ов вакерѓа: „Ко акала лафија шај те верујнел пе хем тане чачутне!... ола исполнинѓе пе“. Трито, ништо нашти те чхинавел е Јехова те завршинел адава со почминѓа, адалеске ов вакерѓа: „Ме сиум алфа хем омега“ (Отк. 21:6). О Јехова ка докажинел кај о Сатана тано ховавно хем кај на успејнѓа те чхинавел е Јехова те исполнинел пли намера. Значи, кеда некој вакерела туке: „Акате бут шукар пишинела, ама на верујнава кај акава ка овел чаче“, тегани шај те читине хем те објаснине о Откровение 21:5, 6. Објаснин сави гаранција денѓа о Јехова кај ка исполнинел пло ветување адалеа со, сар те пхене, чхивѓа пло потпис (Иса. 65:16; w23.11 7, пас. 18-19).

О Јехова денѓа акава ветување кеда е Аврааме сине ле 75 берш хем панда на сине ле чхаве. Дали о Авраам дикхља сар исполнинела пе акава ветување? На целосно. Откеда накхља и река Еуфрат хем аџикерѓа 25 берш, е Авраамеске бијандило о Исак, а пало 60 берш бијандиле лескере унукија о Исав хем о Јаков (Евр. 6:15). Ама о Авраам никогаш на дикхља сар лескоро потомство уло баро народо хем сар наслединѓе и Ветими пхув. Сепак, акава верно слуга сине ле паше амалипе пле Створителеа (Јак. 2:23). Кобор ка радујнел пе о Авраам кеда ка воскреснинел хем кеда ка дознајнел кај баши лескири вера хем стрпливост сине благословиме са о народија (1. Мој. 22:18). Со сикљоваја таро акава? Џикоте сием џивде шај нане те дикха сар исполнинела пе секова ветување со денѓа ле о Јехова. Ама, ако сием стрплива сар о Авраам, шај те ова сигурна кај панда акана о Јехова ка наградинел амен а панда повише ко нево свето (Мар. 10:29, 30; w23.08 24, пас. 14).

Кеда сине терно, о цари о Озија сине понизно. Ов сиклило „те дарал таро чачутно Девел“. О Озија живинѓа 68 берш хем побаро дело таро лескоро живото о Јехова благословинѓа ле (2. Лет. 26:1-4). Ов побединѓа буте душманен хем керѓа о Ерусалим те овел заштитимо (2. Лет. 26:6-15). О Озија сигурно сине радосно башо са адава со поможинѓа ле о Јехова те керел (Проп. 3:12, 13). Сар цари, о Озија сине навикнимо те вакерел е јаверенге со те керен. Шај адалеске мислинѓа кај шај те керел са со ка мангел. Јекх диве о Озија кхувѓа ко е Јеховаскоро храми хем дрско мангља те тхарел темјани ко жртвенико, иако е царенге адава на сине дозволимо (2. Лет. 26:16-18). О првосвештенико о Азарија пробинѓа те вакерел леске кај на смејнела те керел адава, ама ов бут хољанѓа башо адава. Жално тано со о Озија на ачхило верно е Јеховаске хем адалеске о Јехова казнинѓа ле лепраја (2. Лет. 26:19-21). Кобор пошукар ка овел сине лескоро живото те ачхол сине понизно! (w23.09 10, пас. 9-10).

О апостол Петар мора сине те боринел пе пле слабостенцар чак кеда уло помазимо. Ко 36-то берш а.е. о Девел бичхалѓа е Петаре ко Корнелиј кова со на сине Евреи. Ки адаја прилика о Девел помазинѓа е Корнелија хем адава сине доказ кај о Девел „нане пристрасно“ хем кај окола со нане Евреија шај сине те овен дело таро христијанско собрание (Апо. 10:34, 44, 45). Пало адава настан, о Петар почминѓа те хал заедно маро околенцар со нане Евреија, нешто кова со никогаш на би керела сине англедер. Ама, несаве Евреија со сине христијања мислинена сине кај ола хем окола со нане Евреија на ваљани те хан заедно. Кеда несаве со сине лен асавко стави але ки Антиохија, о Петар чхинавѓа те хал заедно е пхраленцар со на сине Евреија, адалеске со најверојатно дарандило те на вреџинел е христијанен со сине Евреија. Кеда о апостол Павле дикхља со керѓа о Петар, ов укоринѓа ле англо јавера (Гал. 2:13, 14). Иако керѓа акаја грешка о Петар на откажинѓа пе (w23.09 22, пас. 8).

Ако искрено испитинеа тут шај ка дикхе кај иси тут несаве слабостија, ама ма обесхрабрин тут. Амаро Господари о Исус тано шукар хем ов ка поможинел туке те кере о потребна промене (1. Пет. 2:3). О апостол Петар уверинела амен: „О Девел... целосно ка обучинел тумен, ка керел тумен зорале“. Ко почеток о Петар мислинела сине кај на заслужинела те овел е Исусескоро ученико (Лука 5:8). Ама адалеске со љубезно поможинѓе леске о Јехова хем о Исус, о Петар на откажинѓа пе таро адава те овел следбенико е Христосескоро. Адалеске о Јехова дозволинѓа о Петар „те кхувел ко вечно Царство амаре Господарескоро хем Спасителескоро, е Исус Христосескоро“ (2. Пет. 1:11). Адаја сине бут бари награда! Ако ту да на откажинеа тут сар о Петар хем мукхеа о Јехова те обучинел тут, ту да ка добине о вечно живото сар награда. Хем баши тли вера ка ове спасимо (1. Пет. 1:9; w23.09 31, пас. 16-17).

Ко свето шатори ко пурано време сине јекх дворо — баро тхан кова со сине заградимо хем коте со о свештеникија керена сине пумаре задаче. О баро бакарно жртвенико коте со тхарена пе сине о жртве аракхљола сине ко дворо заедно е мијалникоја кова со исто аѓаар сине таро бакари. Акава мијалнико користинена сине о свештеникија те шај те чистинен пе англедер те почминен те керен пумари свето служба (2. Мој. 30:17-20; 40:6-8). Авдиве о помазаникија сој панда ки пхув верно служинена ко андруно дворо таро духовно храми. О баро мијалнико пањеа сетинкерела лен хем са е христијанен кај ваљани те ачховен чиста ко морално хем ко духовно поглед. Тегани коте служинела о баро мноштво? О апостол Јован дикхља лен „сар терѓовена англо престол“, јавере лафенцар ки пхув ко авруно дворо, коте со „служинена [е Девлеске] диве хем рат ко лескоро храми“ (Отк. 7:9, 13-15). Бут сием благодарна со о Јехова денѓа амен скапоцено прилика те служина леске ко лескоро баро духовно храми (w23.10 28, пас. 15-16).

Јекх начин сар о Јехова дела амен сила тано преку о старешине (Иса. 32:1, 2). Адалеске кеда сиан секиримо, вакер тле муке е старешиненге. Кеда ка нудинен туке помош, ов благодарно хем прифатин ла. О Јехова преку ленде шај те керел тут силно. И надеж со авела тари Библија башо вечно живото — бизи разлика дали ко небо или ки пхув — исто аѓаар шај те дел амен сила (Рим. 4:3, 18, 19). Амари надеж дела амен сила те истрајна ко искушенија, те проповедина о шукар хабери хем те служина амаре пхраленге хем пхењенге ко собрание (1. Сол. 1:3). И исто надеж денѓа сила е апостол Павлеске. Ов сине чхивдо ко притисок, ки неизвесност, сине прогонимо хем перавдо. Уствари лескоро живото понекогаш сине чак ки опасност (2. Кор. 4:8-10). Е Павле сине ле сила те истрајнел адалеске со концентриринѓа пе ки пли надеж (2. Кор. 4:16-18). Ов сине концентриримо ки пли надеж башо вечно живото ко небо. Ов размислинела сине баши адаја надеж хем адалеске сине „обновимо таро диве ко диве“ (w23.10 15-16, пас. 14-17).

Кеда молинеа тут, размислин дали акана тано о време о Јехова те дел тут адава башо со молинеа ле. Шај мислинаја аменге кај ваљани одма те добина одговор ко амаре молитве. Ама ма те бистра, о Јехова џанела кеда најшукар те поможинел аменге (Евр. 4:16). Кеда на добинаја одма адава башо со молинаја, шај те мислина аменге кај о одговор тано „на“. Ама лескоро одговор уствари шај те овел „панда на“. На пример, јекх терно пхрал молинѓа пе те сасљол, ама ов на састило. Те сасљарел ле сине о Јехова чудоја, тегани о Сатана ка шај сине те вакерел кај о пхрал продолжинѓа те служинел е Јеховаске само адалеске со сасљарѓа ле (Јов 1:9-11; 2:4). Освен адава, о Јехова одрединѓа више време кеда ка сасљарел са о насвалипа (Иса. 33:24; Отк. 21:3, 4). Џи тегани, нашти те очекујна о Јехова чудоја те сасљарел амен. Адалеске, о пхрал шај те молинел пе башо нешто јавер, о Јехова те дел ле сила хем андруно мир те шај те истрајнел иако тано насвало хем те продолжинел верно те служинел леске (w23.11 24, пас. 13).

О Самсон керѓа јекх сериозно грешка, ама ов на откажинѓа пе хем продолжинѓа те служинел е Јеховаске. Ов родела сине прилика те боринел пе против о Филистејција хем аѓаар те исполнинел и задача со денѓа ле о Девел (Суд. 16:28-30). Ов молинѓа е Јехова: „Дозволин те иранав е Филистејцонге“. О чачутно Девел одговоринѓа ки е Самсонескири молитва хем панда јекх пути денѓа ле посебно сила. Сар резултати, о Самсон ки адаја прилика мударѓа повише Филистејцон него цело пло живото. Иако о Самсон мора сине те трпинел о пхаре последице тари пли грешка, ов на откажинѓа пе хем трудинела пе сине те керел е Јеховаскири волја. Со шај амен те сикљова? Чак ако кераја несави грешка хем добинаја укор или лела пе амендар несави одговорност, на ваљани те откажина амен. Ма бистре, о Јехова на откажинела пе амендар ов спремно простинела аменге (Пс. 103:8, 9). Иако грешинаја, о Јехова шај те дел амен сила те кера лескири волја исто сар со керѓа адава е Самсонеа (w23.09 6, пас. 15-16).

Ако сием истрајна тегани о Девел ка прифатинел амен. Акава на значинела кај о Јехова радујнела пе кеда иси тут неволје или проблемија. Наместо адава ов тано радосно адалеске со ту верно истрајнеа. Бут охрабринела амен адава со џанаја кај кеда сием истрајна адава радујнела е Јехова хем одобринела амен (Пс. 5:12). Ма те бистра кај о Авраам верно истрајнѓа кеда сине испитими лескири вера хем адалеске о Девел сине задоволно лестар. О Јехова вакерѓа кај о Авраам тано лескоро амал хем ки лесте дикхела сине сар праведно мануш (1. Мој. 15:6; Рим. 4:13, 22). И исто бути шај те овел аменцар да. Дали о Девел ка прифатинел амен, на зависинела таро адава кобор сием зафатиме ки служба, а ни таро адава саве одговорностија иси амен. Него ка овел амендар задоволно ако верно истрајнаја чак ко пхарипа. А секова јекх амендар шај те истрајнел бизи разлика таро амаре берша, околностија или способностија. Дали моментално иси тут несаво проблеми хем верно истрајнеа? Ако оја, тегани ма бистре кај кереа туке шукар анав англо Девел. Адава со џанаја кај о Девел прифатинела амен шај бут те влијајнел упри аменде. Адава шај те зојракерел амари надеж (w23.12 11, пас. 13-14).

Јекх христијани мора те сикљол шукар те комунициринел. Окова со џанела сар те керел лафи е јаверенцар, шунела лен хем хаљовела ленгере мисле хем чувствија (Изр. 20:5). Ов шај те сикљол сар некој размислинела хем осетинела пе преку о гласо, о изразија ко муј хем о говор е телоскоро. Акава нашти те сикљове ако на сиан манушенцар. Ако цело време користинеа електронска уредија те шај те комуницирине е јаверенцар, сар на пример преку пораке, тли способност те кере некасаја лично лафи шај те слабонел. Адалеске, кер туке прилике те кере лафи е јаверенцар лично (2. Јов. 12). Јекх зрело христијани исто мора коркори песке те грижинел пе хем пле фамилијаке (1. Тим. 5:8). Шукар тано те сикљове вештине кола со ка поможинен туке те аракхе бути (Апо. 18:2, 3; 20:34; Еф. 4:28). Трудин тут те ове пенџардо сар некој сој буќарно хем сар некој со завршинела адава со почминѓа. Ако кереа акава, побаре ка овен о шансе кај ка аракхе бути хем кај ка ачхове ки лате (w23.12 27, пас. 12-13).

Кеда и Библија керела лафи башо „е Јеховаскоро диве“, уствари керела лафи башо време кеда о Јехова ка судинел пле душманен хем ка спасинел пле народо. Ко пурано време, о Јехова понекогаш анѓа осуде (Иса. 13:1, 6; Езек. 13:5; Соф. 1:8). Ко амаро време, „е Јеховаскоро диве“ ка почминел кеда ка овел нападимо о Баро Вавилон хем ка завршинел е војнаја Армагедон. Те шај те преживина адава „диве“, ваљани те спремина амен панда акана. Ама о Исус на вакерѓа само те спремина амен баши „бари неволја“, него исто аѓаар те ачхова спремна (Мат. 24:21; Лука 12:40). Ко пло прво писмо џи ко Солунјања, о апостол Павле користинѓа некобор споредбе те шај те поможинел е христијаненге те ачховен спремна башо е Јеховаскоро баро диве баши осуда. О Павле џанља кај е Јеховаскоро диве нане те авел ко лескоро време (2. Сол. 2:1-3). Сепак, ов поттикнинѓа пле пхрален те овен спремна башо адава диве сар те пхене ка авел тајса. Амен да ваљани те применина акава совет (w23.06 8, пас. 1-2).

Ко 1978 берш ко Токио (Јапонија), сине градими јекх бут учи зграда таро 60 спратија. О мануша пучена пе сине дали акаја зграда ка шај те издржинел о земјотресија кола со често случинена пе сине ки адаја диз. Ама соске на ваљани сине те даран? Адалеске со о инженерија керѓе акаја зграда добором цврсто, а ко исто време добором флексибилно со шај сине те издржинел о земјотресија. О христијања тане сар акаја учи зграда. Ко саво начин? Јекх христијани ваљани те џанел кеда те овел цврсто, а кеда флексибилно. Ов ваљани те овел цврсто хем стабилно кеда керела пе лафи башо е Јеховаскере законија хем мерилија. Тегани ка овел спремно те шунел хем нане те попуштинел. Ама тари јавер страна, ов ваљани те овел флексибилно или разумно секогаш кеда ка шај или чак кеда тано потребно (Јак. 3:17). Јекх христијани со иси ле асавко стави нане те овел претерано строго или претерано попустливо (w23.07 14, пас. 1-2).

О Исус ваљани сине те ачхол цврсто кеда о Сатана искушинѓа ле, па чак кеда директно вакерѓа леске те откажинел пе тари пли верност спрема о Девел (Мат. 4:1-11). О Сатана сине одлучно те чхивел е Исусе те грешинел хем аѓаар те нашти те платинел и откупнина. Џикоте трајнела сине лескири служба теле ки пхув, о Исус мора сине те истрајнел ко јавера да неволје. Лескере душмања прогонинена ле сине хем мангле те мударен ле (Лука 4:28, 29; 13:31). Мора сине те трпинел о слабостија пле следбениконгере (Мар. 9:33, 34). Џикоте трајнела сине о судибе башо лескоро живото, бут сине малтретиримо хем асана сине леске. Пало адава, сине мудардо ко јекх понижувачко начин хем трпинѓа бари дукх (Евр. 12:1-3). Кеда сине ко стубо мучибаске, ов мора сине коркори те трпинел баре дукха, бизи е Јеховаскири заштита (Мат. 27:46). Акалестар шај јасно те дикха кај о Исус платинѓа бари цена баши откупнина. Кеда размислинаја башо жртве со о Исус сине спремно те керел аменге, амаро мангипе бајрола панда повише спрема лесте (w24.01 10-11, пас. 7-9).

Те шај те ова паше е јаверенцар ваљани аменге стрпливост. Акаја особина поможинела амен шукар те шуна кеда о јавера керена лафи (Јак. 1:19). Исто аѓаар, и стрпливост поможинела амен те ова ко мир е јаверенцар. Ако сием стрплива нане те реагирина сигате хем те вакера нешто нељубезно кеда иси амен стрес. Исто аѓаар, и стрпливост ка поможинел амен те на хољана сигате кеда некој ка поврединел амаре чувствија. Наместо те ирана ленге ко исто начин, амен понадари да ка трпина амен јекх јекхеа хем ка простина цело вилеа (Кол. 3:12, 13). И стрпливост исто аѓаар шај те поможинел аменге те ана пошукар одлуке. Наместо те ана одлуке сигате хем бизо те мислина ваљани те одвојна аменге време те истражина саве опцие иси амен хем пало адава те размислина кола лендар би овела и најшукар. На пример, ако родаја бути шај те ова ко искушение те прифатина и прво бути со ка аракха. Ама ако сием стрплива ка одвојна аменге време те размислина сар и бути ка влијајнел упри мли фамилија хем упро духовна буќа? Ако сием стрплива нане те ана лошна одлуке (w23.08 22, пас. 8-9).

Ако сиан обесхрабримо адалеске со мора те борине тут погрешна желбенцар, адава со ка размислине со ветинѓан е Јеховаске кеда денѓан леске лафи кај ка служине леске, шај те керел тут панда поодлучно те борине тут против о искушенија. Сар? Кеда деа лафи е Јеховаске кај ка служине леске цело живото, ту откажинеа тут тутар. Акава значинела кај ту биринеа те отфрлине тле лична желбе хем целија кола со на свиџинена пе е Јеховаске (Мат. 16:24). Адалеске, кеда ка овел тут несаво искушение или пхари ситуација нане те овел потребно те пуче тут сар ка постапине. Ту више отфрлинѓан са о јавера опцие освен јекх — те ачхове верно е Јеховаске. Ка ове цврсто одлучно те радујне е Јехова. Ки адаја бути ка ове сар о Јов. Иако аракхлило ко посебна пхаре ситуацие ов одлучно вакерѓа: „Нане те откажинав ман тари мли беспрекорност!“ (Јов 27:5; w24.03 9, пас. 6-7).

О Јехова, „о Девел е мангипаскоро“, тано аменцар (2. Кор. 13:11). Ов грижинела пе секоле јекхеске лично! Увериме сием кај сием опколиме таро лескоро верно мангипе (Пс. 32:10). Кобор повише размислинаја башо адава сар ов сикавѓа аменге пло мангипе, добором пореално овела аменге хем оваја са попаше леа. Шај ко секова моменти те молина амен леске хем те вакера леске кобор аменге потребно лескоро мангипе. Шај те вакера леске са со мучинела амен соске сием увериме кај хаљола амен хем кај бут мангела те поможинел аменге (Пс. 145:19). Исто сар со привлечинела амен и јаг ко јекх шудро диве, аѓаар привлечинела амен е Јеховаскоро мангипе. Адалеске, те прифатина е Јеховаскоро мангипе кова со дела амен утеха хем мир хем амен да те вакера леске: „Мангава тут, Јехова!“ (Пс. 116:1; w24.01 31, пас. 19-20).

О Исус керѓа бут повише него само те вакерел е манушенге кај е Девлескоро анав тано Јехова. О Евреија, колен со о Исус сикавела сине, џанена сине више е Девлескоро анав. Ама ов ко најшукар начин вакерела сине, јавере лафенцар, објаснинела сине сави личност тано ов (Јован 1:17, 18). На пример ко хебрејска списија читинаја кај о Јехова тано милостиво хем љубезно (2. Мој. 34:5-7). Акава чачипе уло панда појасно кеда о Исус вакерѓа и споредба башо бунтовно чхаво хем лескоро дад. Ки акаја споредба о чхаво каинѓа пе хем иранѓа пе кхере. Кеда о дад дикхља ле панда дуралдан, прастандило, гушинѓа ле хем таро вило простинѓа леске. Џикоте читинаја акаја споредба шај те хаљова кобор милостиво хем сочувствително тано о Јехова (Лука 15:11-32). О Исус поможинѓа е јаверенге те хаљовен сави личност чаче тано о Јехова (w24.02 10, пас. 8-9).

О Јехова освежинела хем утешинела околен со иси лен неволје. Сар шај исто сар о Јехова те сикава е јаверенге сочувство хем те утешина лен? Јекх начин сар шај те кера адава тано аѓаар со ка развина особине кола со ка поможинен аменге те овел амен сочувство хем те утешина е јаверен. Кола тане несаве таро адала особине? Со ка поможинел аменге те на нашава амаро мангипе кова сој потребно те шај понадари да те утешина јекх јекхе секова диве? (1. Сол. 4:18). Ваљани те развина особине сар сој милост, пхраликано мангипе хем љубезност (Кол. 3:12; 1. Пет. 3:8). Сар ка поможинен амен акала особине? Кеда ола ка овен дело тари амари личност, тегани едвај аџикераја те поможина околенге со накхена таро пхаре ситуацие. Исто сар со вакерѓа о Исус: „О муј вакерела адава солеа тано пхердо о вило. О шукар мануш вакерела шукар буќа адалеске со ко вило иси ле шукар буќа“ (Мат. 12:34, 35). Адалеа со утешинаја амаре пхрален хем пхењен тано јекх важно начин сар сикаваја ленге кај мангаја лен (w23.11 10, пас. 10-11).

Ако мангаја те хаљова о библиска пророштвија ваљани те рода помош. Те вакера јекх споредба. Замислин туке кај џаја ко јекх тхан со на џанеа ле ама тло амал сој туја бут шукар џанела адава тхан. Ов точно џанела кај сиен хем коте ингарела секова друмо. Сигурно туке бут мило со тло амал ало туја. О Јехова тано сар акава амал. Ов точно џанела ко саво време живинаја хем со ка случинел пе ки иднина. Значи, те шај те хаљова о библиска пророштвија мора понизно те рода помош таро Јехова (Дан. 2:28; 2. Пет. 1:19, 20). Исто сар секова родители о Јехова да мангела лескере чхавен те овел лен шукар иднина (Ерем. 29:11). Ама о манушикане родителија нашти те вакерен со ка случинел пе ки иднина, а о Јехова шај хем ов никогаш на грешинела. Ов мукхља те овен пишиме пророштвија ко лескоро Лафи те шај те џана кола важна настанија ка случинен пе ки иднина (Иса. 46:10; w23.08 8, пас. 3-4).