Јули

О Исус пле лафенцар хем постапкенцар — коте сој вклучиме хем о чудија со керѓа лен — совршено сикавѓа сар размислинела лескоро Дад хем саве чувствија иси ле (Јован 14:9). Со шај те сикљова таро е Исусескере чудија? О Исус хем лескоро Дад бут мангена амен. Џикоте о Исус сине ки пхув ов сикавѓа кобор мангела е манушен аѓаар со користинѓа пли моќ те шај те локхјарел ленгере муке. Ки јекх прилика, дуј короле мануша молинена ле сине те поможинел ленге (Мат. 20:30-34). Приметин кај е Исусеске „пело жал“ хем тегани сасљарѓа лен. Ко акава тхан башо израз „пело леске жал“ користинела пе јекх грчко глаголи кова со сикавела кај е Исусе бут дукхандило ле кеда дикхља сар мучинена пе акала мануша. Акалеа о Исус сикавѓа баро мангипе кова со поттикнинѓа ле исто аѓаар те дел хајбаске е бокхален хем те сасљарел е лепрозна манушен (Мат. 15:32; Мар. 1:41). Шај те ова сигурна кај о Јехова, о Девел со иси ле баро сочувство, хем лескоро Чхаво бут мангена амен хем кај дукхала лен кеда дикхена сар мучинаја амен (Лука 1:78; 1. Пет. 5:7). Ола едвај аџикерена те циден са о проблемија со мучинена е манушен (w23.04 3, пас. 4-5).

Ваљани те избегина те читина хем те шуна погрешна буќа кола сој популарна ко е Сатанаскоро свето. Ваљани те пхера амари годи шукар мисленцар аѓаар со ка читина хем ка проучина и Библија. Јавер бути со ка поможинел аменге те заштитина амаре мисле тани ако џаја ко состанокија хем ки служба. А о Јехова ветинела аменге кај нане те дозволинел те ова искушиме повише таро адава со шај те издржина (1. Кор. 10:12, 13). Секова јекх амендар ваљани те молинел пе сар никогаш англедер те шај те ачховел верно е Јеховаске ко акала пхаре последна диве. О Јехова мангела те пхраве леске тло вило ки молитва (Пс. 62:8). Фалин е Јехова хем благодарин леске башо са со керела. Роде лестар помош те ове храбро ки служба. Молин ле те поможинел тут те истрајне било саво проблеми хем те на пере ко искушение кова со шај иси тут. Ма дозволин никој или ништо те чхинавел тут редовно те молине тут е Јеховаске (w23.05 7, пас. 17-18).

Соске џаја ко состанокија? Најангле те шај те фалина е Јехова (Пс. 26:12; 111:1). Исто аѓаар адалеске со мангаја те охрабрина јекх јекхе ко акала пхаре времија (1. Сол. 5:11). Кеда ваздаја амаро вас хем коментиринаја, амен кераја о солдуј буќа. Ама шај иси амен трема те коментирина или шај бут мангаја те коментирина ама понекогаш о пхраља на дена амен те коментирина секова пути кеда ваздаја амаро вас. Со шај те поможинел аменге ко асавке ситуацие? О апостол Павле истакнинѓа кај ваљани те „охрабрина амен јекх јекхеа“. Кеда хаљоваја кај чак е едноставна коментаренцар шај те охрабрина е јаверен ко состанок, тегани адава шај те керел аменге полокхо те коментирина. Хем ако на дена амен те коментирина секова пути кеда ваздаја амаро вас, тегани шај те радујна амен башо адава со о јавера шај те коментиринен (1. Пет. 3:8; w23.04 20, пас. 1-3).

О Евреија кола со околу 70 берш сине робија ко Вавилон, шунѓе јекх бут шужо хабери — шај сине слободно те иранен пе ки пумари пхув, ко Израел (Езра 1:2-4). Акава случинѓа пе само адалеске со о Јехова мангља те овел аѓаар. О Вавилонција обично никогаш на ослободинена сине пумаре робон (Иса. 14:4, 17). Ама акана адалеске со о Вавилон сине освојмо хем некој јавер владинела, о Евреија шај сине слободно те џан песке. Секова Евреи, посебно о поглаварија, ваљани сине те одлучинен дали ка џан песке таро Вавилон или ка ачховен атхе. Шај на сине локхе те анел пе акаја одлука. Машкар ленде сине бут пхуре кола со нашти сине те издржинен адава баро друмо. Исто аѓаар, бут Евреија бијандиле ко Вавилон хем адалеске атхе осетинена пе сине сар кхере. Ленге о Израел сине пхув ленгере парапапонгири. А несаве Евреија барвалиле ко Вавилон хем адалеске шај сине ленге пхаро те мукхен пумаре шуже хем удобна кхера или пумари бути те шај те џан ки јекх пхув која со на џанена ла (w23.05 14, пас. 1-2).

Е Девлескоро Лафи охрабринела амен понадари да те развина истрајност, сочувство хем мангипе. На пример, ко Лука 21:19 вакерела: „Ако истрајнена џи ко крајо ка спасинен тумаро живото“. Ко Колошања 3:12 пишинела: „Уравен тумен ко баро сочувство“. Хем ко 1. Солунјања 4:9, 10 вакерела: „Тумен сиен сикавде таро Девел те манген тумен јекх јекхеа... Ама амен поттикнинаја тумен пхраљален те керен адава панда повише“. Са акала лафија сине пишиме е учениконге кола со више сине лен истрајност, сочувство хем мангипе, сепак ола ваљани сине те сикавен лен панда повише. Амен да ваљани те кера о исто. Те шај те кере адава, дикх сар о прва христијања сикавѓе акала особине. Пало адава, ка дикхе сар шај те џа пало пример адале христијаненгоро хем аѓаар те ове сигурно кај сиан спремно баши бари неволја. Тегани кеда ка почминел и бари неволја ту више ка џане сар те истрајне хем адалеске ка шај те ове одлучно понадари да те истрајне (w23.07 3, пас. 4, 8).

Бизи разлика дали сием помазаникија или таро „јавера бакхре“, сарине амен ваљани те ачхова ко Свето Друмо соске ов поможинела амен те ова ко духовно рај акана хем те добина о благословија со ка анел лен е Девлескоро Царство (Јован 10:16). Таро 1919 берш а.е., милиоња мурша, џувља хем чхаве иклиле таро Баро Вавилон, о светско царство е ховавне религијакоро, хем почминѓе те џан ко акава симболично друмо. Кеда о Евреија иклиле таро Вавилон о Јехова цидинѓа о пречке таро адава друмо (Иса. 57:14). А сар тано е „Свето Друмоја“ ко понево време? Веконцар англедер о 1919 берш, о Јехова почминѓа те користинел манушен кола со поштујнена ле сине те поможинен те спреминел пе о друмо те шај о мануша те икљовен таро Баро Вавилон. (Споредин Исаија 40:3.) Ола керѓе важна подготовке те шај покасно о искрена мануша те икљон тари ховавни религија хем те кхувен ко духовно рај коте со шај те обожавинен е Јехова лескере народоја (w23.05 15-16, пас. 8-9).

О Јехова мангела те ова радосна џикоте служинаја леске хем адава те кера ле доброволно (2. Кор. 9:7). Тегани, дали ваљани понадари да те кера бути ки амари цел чак кеда на керела пе аменге адава? Те дикха о пример е апостол Павлескоро. Ов вакерѓа: „Марава мло тело, хем керава ле сар мло робо“ (1. Кор. 9:25-27, фус.). О Павле силаја теринѓа пе те керел адава со родела лестар о Јехова чак кеда на керела пе сине леске адава. Дали о Јехова прифатинѓа адава со керѓа о Павле? Оја! Ов чак наградинѓа ле башо лескоро трудо (2. Тим. 4:7, 8). Слично, о Јехова тано задоволно амендар да кеда дикхела кај кераја бути ки амари цел, чак кеда нане амен желба. Ов радујнела пе адалеске со џанела кај иако понекогаш на мангаја те кера несави бути, сепак адалеске со мангаја ле, кераја адава. Исто сар о Јехова со благословинѓа е Павле, аѓаар ка благословинел амен да башо амаро трудо (Пс. 126:5). Хем џикоте дикхаја сар о Јехова благословинела амен, шај чак те бајрол аменге желба баши адаја бути (w23.05 29, пас. 9-10).

О апостол Павле спорединѓа околен со нане те преживинен е Јеховаскоро диве манушенцар со совена. Ола нане свесна со случинела пе околу ленде или кобор сигате накхела о време. Адалеске ола на џанена кеда случинела пе нешто важно хем нашти те керен ништо башо адава. Авдиве, бут мануша совена ко духовно поглед (Рим. 11:8). Лен на интересинена о знакија со сикавена кај живинаја ко последна диве хем кај и бари неволја тани паше (2. Пет. 3:3, 4). Ама сар аваја попаше ко крајо, овела са поважно те ова послушна ко совет те ачхова џангавде (1. Сол. 5:6). Ваљани те ачхова смириме хем јасно те размислина. Соске? Те шај те на мешина амен ки политика или ко проблемија со иси ко свето. Кобор попаше тано е Јеховаскоро диве, добором побаро притисок ка овел амен те мешина амен ко акала буќа. Сепак, на ваљани те секирина амен башо адава сар ка постапина соске е Девлескоро духо шај те поможинел амен те ачхова смириме, јасно те размислина хем те ана мудра одлуке (Лука 12:11, 12; w23.06 10, пас. 6-7).

Со авела туке ки годи кеда шунеа о анав Самсон? Веројатно мислинеа ки некасте сој тано бут силно. Хем адава чаче сине аѓаар. Ама о Самсон анѓа јекх погрешно одлука која со анѓа леске баре муке. Сепак, о Јехова дикхела сине ко Самсон сар лескоро верно слуга хем адалеске ов мукхља лескоро пример те овел пишимо ки Библија баши амари корист. О Јехова користинѓа е Самсоне те керел баре буќа те шај те поможинел пле народоске е Израелцонге. Бут векија откеда о Самсон муло, о Јехова преку пло свети дух поттикнинѓа е апостол Павле те спомнинел е Самсонескоро анав заедно јавере слугенцар колен со сине лен бари вера (Евр. 11:32-34). Е Самсонескоро пример шај бут те охрабринел амен. Ле сине ле доверба ко Јехова, чак кеда аракхљола сине ко бут пхаре ситуацие. Шај те сикљова таро Самсон хем лескоро пример шај те охрабринел амен (w23.09 2, пас. 1-2).

Шај те ова поистрајна ако редовно молинаја амен е Јеховаске хем вакераја леске са со мучинела амен (1. Сол. 5:17). Иако шај ко моменти нане тут несаво баро проблеми, дали сепак молинеа тут е Јеховаске хем родеа лестар водство секова пути кеда сиан секиримо, бунимо или на џанеа со те кере? Ако секова диве родеа помош таро амаро Девел ко потикне проблемија, тегани сигурно кај ка кере адава кеда ка појавинен пе туке побаре проблемија ки иднина. Аѓаар ка шај те ове сигурно кај о Јехова џанела точно кеда те поможинел туке хем сар те керел адава (Пс. 27:1, 3). Ако ачховаја верна е Јеховаске ко проблемија панда авдиве, побари тани и веројатност кај ка ачхова леске верна хем ки бари неволја (Рим. 5:3). Соске шај те вакера адава? Бут пхраља вакерена кај адава со истрајнѓе ко проблемија со сине лен англедер, поможинѓа ленге те истрајнен ко проблемија со појавинѓе пе ленге покасно. И истрајност бајрарѓа ленгири вера ко Јехова кај ов тано спремно те поможинел ленге хем мангела те керел адава. А и вера поможинѓа ленге те истрајнен ко неволје со сине лен покасно (Јак. 1:2-4; w23.07 3-4, пас. 7-8).

Е Јеховаскири понизност хем сочувство поттикнинѓе ле те овел разумно. На пример, лескири понизност шај сине јасно те дикхел пе кеда мангља те уништинел е лошна манушен таро Содом. Преку пле ангелија, о Јехова вакерѓа е праведно Лотеске те нашел ко планине. Ама о Лот дарандило те џал адари. Адалеске ов молинѓа е Јехова заедно пле фамилијаја те мукхел ле те нашел ко Сигор, јекх тикни диз која со о Јехова мангља те уништинел. О Јехова шај сине таро Лот те родел те керел адава со родинѓа лестар. Наместо адава, о Јехова дозволинѓа леске те џал ко Сигор, иако адава значинела сине кај ов ваљани те променинел пли одлука те на уништинел адаја диз (1. Мој. 19:18-22). Веконцар покасно, о Јехова сикавѓа сочувство е манушенге тари Ниневија. Ов бичхалѓа пле пророко е Јона те вакерел е лошна манушенге тари Ниневија кај адаја диз хем ола ка овен уништиме. Ама кеда о мануша тари адаја диз каинѓе пе, е Јеховаске пело жал хем на уништинѓа лен (Јона 3:1, 10; 4:10, 11; w23.07 21, пас. 5).

Со шај те сикљова таро Јоас? Ов сине сар каш бизо хор коренија со ваљани те овел пханло ко колцо сој набимо хор ки пхув те шај те икерел ле стабилно. Кеда о колцо, јавере лафенцар о Јодај, муло хем о отпадникија почминѓе те влијајнен упро Јоас сар бари бавлал, тегани ов пело. Акава јасно сикавела кај амари дар таро Девел на ваљани те зависинел само таро шукар пример е пхраленгоро хем амаре фамилијакоро. Те шај те ачхова духовно зорале амен мора коркори те бајрара амаро мангипе хем поштовање спрема о Јехова аѓаар со редовно ка проучина, хор ка размислина башо адава хем ка молина амен (Ерем. 17:7, 8; Кол. 2:6, 7). О Јехова на родела амендар бут. Са со родела тано пишимо ко Проповедник 12:13 коте со пхенела: „Нека овел тут дар таро чачутно Девел хем икер лескере заповедија соске адава тано са о мануш со ваљани те керел“. Кеда дараја таро Девел тегани шај те ачхова верна бизи разлика со ка случинел пе ки иднина. Нане нешто со ка шај те руминел амаро амалипе е Јеховаја (w23.06 19, пас. 17-19).

Е Девлескири гаранција почминела е лафенцар: „Окова со бешела ко престол вакерѓа“ (Отк. 21:5а). Акала лафија тане посебна соске ко лил Откровение о Јехова керела само трин пути лично лафи, а акава тано јекх таро адала трин ситуацие. Значи акаја гаранција на дела амен несаво моќно ангели, чак ни о воскреснимо Исус, него лично о Јехова! Акава панда повише бајрарела амари доверба ко лафија таро Откровение 21:5, 6. Соске? Адалеске со о Јехова „нашти те ховавел“ (Тит 1:2). Размислин башо лафи: „Дикх!“ О грчко лафи сој аменде преведимо сар „дикх!“ тано користимо бут пути ко лил Откровение. А со сине о следно со вакерѓа о Девел? Ов вакерѓа: „Керава са о буќа неве“. Точно тано кај о Јехова керела лафи башо промене со ка керел лен ки иднина. Ама адалеске сој добором сигурно кај ка исполнинел пе акава ветување, ов башо адала промене вакерела кај више случинена пе (Иса. 46:10; w23.11 3-4, пас. 7-8).

О апостол Петар боринела пе сине пле слабостенцар иако шунѓа хем дикхља са со керѓа о Исус. Те дикха некобор примерија. Кеда о Исус објаснинѓа кај ка цидел муке хем кај ка овел мудардо сар со вакерела о пророштво, о Петар вакерѓа кај не мора те овел адава (Мар. 8:31-33). Исто аѓаар, о Петар хем о јавера апостолија цело време распрајнена пе сине башо адава кој тано најбаро (Мар. 9:33, 34). И последно рат англедер те мерел о Исус, о Петар нападинѓа јекхе мануше хем чхинѓа о кан лескоро (Јован 18:10). И исто рат, о Петар дарандило хем трин пути вакерѓа кај на пенџарела пле амале е Исусе (Мар. 14:66-72). Пало адава бут рунѓа. О Исус на откажинѓа пе таро пло апостоли кова со сине бут обесхрабримо. Откеда о Исус воскреснинѓа, ов денѓа прилика е Петареске те сикавел кај панда мангела ле. Ки адаја прилика о Исус вакерѓа леске те служинел сар понизно пастири лескере бакхренге (Јован 21:15-17). Ов спремно прифатинѓа адаја задача. Ов сине ко Ерусалим ки Педесетница хем сине машкар о прва кола со сине помазиме е Девлескере силаја (w23.09 22, пас. 6-7).

О апостол Петар поттикнинѓа е јавере старешинен те овен „пастирија е Девлескере стадоске“ (1. Пет. 5:1-4). Ако сиан старешина, џанаја кај мангеа те пхрален хем пхењен хем кај мангеа те грижине тут ленге. Ама понекогаш мислинеа кај сиан бут зафатимо или осетинеа тут бут уморно те шај те кере адаја задача. Со шај те кере? Вакер е Јеховаске са со мучинела тут хем кобор мангеа те поможине те пхраленге хем пхењенге. О Петар пишинѓа: „Ако некој служинела, нека овел ле доверба кај шај те керел адава е силаја која со дела ла о Девел“ (1. Пет. 4:11). Те пхрален хем пхењен шај иси лен проблемија со нане целосно те решинен пе ко акава свето. Ама ма бистре, о најбаро пастири, о Исус Христос, шај те поможинел ленге повише него било кој јавер. Ов шај те грижинел пе ленге хем авдиве хем ко нево свето. Са со родела о Јехова таро старешине тано те манген пумаре пхрален, те грижинен пе ленге хем те овен шукар „пример е стадоске“ (w23.09 29-30, пас. 13-14).

Амен мора те избегина те овел амен доверба ко манушикано размислување. Ако почминаја те дикха ко буќа сар о мануша таро свето, тегани шај те бистра е Јехова хем лескере мерилија (1. Кор. 3:19). „И мудрост акале светоскири“ бут пути поттикнинела е манушен те овел ленге најважно те задоволинен пумаре телесна желбе. На пример, упро несаве христијања таро Пергам хем Тијатира влијајнѓе о мануша со сине околу ленде хем коленге со сине нормално те керен неморал хем те обожавинен идолија. О Исус денѓа строго совет е солдује собраниенге адалеске со прифатинѓе о погрешно стави башо сексуално неморал (Отк. 2:14, 20). Авдиве да иси амен притисок те прифатина о погрешна ставија е светоскере. И фамилија или о јавера мануша шај те убединен амен кај дикхаја бут строго ко буќа хем кај на ваљани те икера амен ко е Јеховаскере законија. На пример, ола шај те вакерен аменге кај нане добором важно те ачхова морално чиста хем кај адава со вакерела и Библија тано бут старомодно. Понекогаш шај те мислина аменге кај о упатствија со дела амен о Јехова нане доволна јасна. Шај чак те ова ко искушение те џа преку адава сој тано пишимо (1. Кор. 4:6; w23.07 16, пас. 10-11).

Е Исусескере дајаке, е Маријаке, ваљанѓа сила. Ој ваљани сине те ачховел кхамни, а на сине женими. Иако никогаш на сине ла чхаве хем на сине ла искуство сар дај, ој акана ваљани сине те бајрарел чхаве кова со ваљани сине те овел о Месија. Исто аѓаар, ој мора сине те објаснинел е Јосифеске кај тани кхамни хем кај на суќа никасаја. Акава на сине ни хари локхо те објаснинел пе (Лука 1:26-33). Сар и Марија добинѓа и сила со ваљанѓа лаке? Ој родинѓа помош таро јавера. На пример, ој таро Габриел родинѓа повише информацие башо адава сар те керел и задача (Лука 1:34). Кратко пало адава, ој патујнѓа „ко јудејска планине“ те посетинел е Елисавета. И Елисавета пофалинѓа е Марија хем сине водими таро Јехова те вакерел јекх охрабрувачко пророштво башо е Маријакоро чхаво кова со на сине панда бијамо (Лука 1:39-45). И Марија вакерѓа кај „о Јехова керѓа бут моќна буќа пле вастеа“ (Лука 1:46-51). Преку о Габриел хем и Елисавета, о Јехова денѓа сила е Маријаке (w23.10 14-15, пас. 10-12).

Само ограничимо број таро е Исусескере ученикија тане помазиме е Девлескере силаја хем иси лен посебно однос е Јеховаја. Акала 144.000 ка служинен сар свештеникија ко небо е Исусеа (Отк. 14:1). Џикоте ола тане панда ки пхув, о Девел помазинела лен пле силаја хем посвојнела лен сар пле духовна чхаве. И Свето просторија ко свето шатори претставинела акава посебно однос со иси лен е Девлеа џикоте тане панда ки пхув (Рим. 8:15-17). А и Најсвето просторија ко свето шатори претставинела о небо, о тхан коте сој о Јехова. И „завеса“ која со одвојнела и Свето просторија тари Најсвето просторија претставинела е Исусескоро манушикано тело. Са џикоте е Исусе сине ле манушикано тело, ов нашти сине те кхувел ко небо ко духовно храми сар баро првосвештенико. Адалеске со о Исус сине спремно те откажинел пе таро пло манушикано тело хем денѓа ле сар жртва е манушенге, са о помазиме христијања добинѓе прилика те живинен упре ко небо. Ола да мора те откажинен пе таро пумаро манушикано тело те шај те добинен и небесно награда (Евр. 10:19, 20; 1. Кор. 15:50; w23.10 28, пас. 13).

О Гедеон сине смиримо кеда о мануша таро Ефрем критикујнѓе ле (Суд. 8:1-3). Ов на иранѓа хољаја. Ов сикавѓа кај тано понизно аѓаар со шунѓа лен џикоте жалинена пе сине, хем пало адава тактично смиринѓа и ситуација со шај сине те керел баре проблемија. О мудра старешине џана пало е Гедеонескоро пример аѓаар со внимателно шунена хем љубезно одговоринена ако некој критикујнела лен (Јак. 3:13). Аѓаар аракхена о мир ко собрание. Кеда о јавера пофалинѓе е Гедеоне адалеске со побединѓа е Мадијамцон, ов денѓа и фалба е Јеховаске (Суд. 8:22, 23). Сар шај о именујме пхраља те џан пало е Гедеонескоро пример? Ола ваљани те ден и фалба е Јеховаске башо адава со керена (1. Кор. 4:6, 7). На пример, кеда некој пофалинела јекхе старешина башо лескере говорија ов шај те вакерел кај о мисле тане таро е Девлескоро Лафи хем кај сарине амен добинаја обука тари е Јеховаскири организација. Понекогаш ка овел шукар о старешине те размислинен дали пумаре говоренцар привлечинена повише внимание ки песте наместо ко Јехова (w23.06 4, пас. 7-8).

Ако на добинаја адава башо со молинѓем амен, шај те пуча амен: „Дали молинава ман баши исправно бути?“ Бут пути мислинаја кај амен џанаја сој аменге најшукар. Ама о буќа башо со молинаја амен шај нане о најшукар решение. Ако молинаја амен башо несаво проблеми, шај иси бут пошукар решение таро адава со амен мислинаја. А несаве буќа башо со молинаја шај нане спрема е Јеховаскири волја (1. Јов. 5:14). Те размислина башо пример е родителенгоро кола со молинѓе е Јехова те керел ленгоро чхаво те ачхол ко чачипе. Иако нане погрешно те молина амен башо акава, сепак те овел амен ки годи кај о Јехова нане никас силаја те чхивел те служинел леске. Ов мангела сарине амен, коте сој вклучиме хем амаре чхаве, коркори те бирина те служина леске (5. Мој. 10:12, 13; 30:19, 20). Адалеске, о родителија шај те молинен е Јехова башо нешто јавер — те поможинел ленге те ресен џи ко вило пумаре чхавескоро те шај те овел поттикнимо те мангел е Јехова хем те овел лескоро амал (Изр. 22:6; Еф. 6:4; w23.11 21, пас. 5; 23, пас. 12).

Соске и утеха тано важно начин сар сикаваја мангипе? Спрема јекх библиско речнико, о лафи со користинела ле о Павле баши „утеха“ значинела „те ове узи некасте те шај те охрабрине ле кеда накхела тари пхари ситуација“. Значи, адалеа со утешинаја амаре пхрале поможинаја леске те кхедел сила хем понадари да верно те служинел е Јеховаске. Секова пути кеда спремно шунаја амаре пхрале, адалеа сикаваја кај мангаја ле (2. Кор. 7:6, 7, 13). О сочувство хем сикајбе утеха тане бут паше поврзиме. Сар? Некој сој тано сочувствително тано поттикнимо те утешинел е јаверен хем пробинела те керел нешто те шај те поможинел ленге. Значи о сочувство поттикнинела амен те утешина е јаверен. О Павле објаснинела кај о сочувство со иси е Јехова поттикнинела ле те утешинел е јаверен. Ов опишинела е Јехова сар „Дад кова сој бут милостиво хем о Девел секоле утехакоро“ (2. Кор. 1:3; w23.11 9-10, пас. 8-10).

Са е Христосескере ученикија шај те очекујнен неволје. Размислин башо пример таро апостол Павле. Е пхраленге таро Солун ов вакерѓа: „Кеда сием сине туменцар, англедер вакерѓем туменге кај ка трпина неволје хем сар со џанена, баш адава случинѓа пе“ (1. Сол. 3:4). А е пхраленге таро Коринт пишинѓа: „Амен мангаја тумен те џанен баши неволја со доживинѓем... мислинѓем кај нане те ачхова џивде“ (2. Кор. 1:8; 11:23-27). Авдиве да о христијања шај те очекујнен разна неволје (2. Тим. 3:12). Адалеске со сикавѓан вера ко Исус хем почминѓан те џа пали лесте, тле амала хем тли фамилија шај понашинена пе туја лошно. Или шај ки бути иси тут проблемија адалеске со мангеа ко са те постапине чесно (Евр. 13:18). Дали сине тут прогонство таро властија адалеске со сведочинеа е јаверенге баши тли надеж? Бизи разлика саве неволје ка овен амен, о Павле вакерѓа кај ваљани те ова радосна (w23.12 10-11, пас. 9-10).

О Јаков истрајнѓа ко бут проблемија. Дуј таро лескере чхаве, о Симеон хем о Леви, анѓе лаџ упри фамилија хем е Јеховаскере анавеске. Покрај са адава, е Јаковескири мангли ромни и Рахела мули џикоте бијанела сине е дујто чхаве. Хем адалеске со сине баро бокхалипе, о Јаков ко пле пхуре берша мора сине те селинел пе ко Египет (1. Мој. 35:16-19; 37:28; 45:9-11, 28). Иако доживинѓа са акала проблемија о Јаков никогаш на нашавѓа пли вера ко Јехова хем ко лескере ветувања. А о Јехова сикавѓа леске кај тано задоволно лестар. На пример, о Јехова денѓа е Јакове бут ко материјално поглед. Исто аѓаар о Јаков сине бут благодарно е Јеховаске кеда палем дикхља пле чхаве е Јосифе, каске со бут време мислинѓа кај тано муло. Адава со о Јаков сине паше амал е Јеховаја поможинѓа леске те истрајнел ко са о неволје со сине ле (1. Мој. 30:43; 32:9, 10; 46:28-30). Кеда сием паше е Јеховаја тегани амен да шај успешно те икљова ко крајо е проблеменцар со на очекујнѓем лен (w23.04 15, пас. 6-7).

Ко Псалм 23 преку јекх гили о Давид опишинела пли доверба ко е Јеховаскоро мангипа хем ки лескири грижа. Ов опишинѓа лескоро паше амалипе е Јеховаја, колесте со дикхела сине сар пло Пастири. О Давид осетинела пе сине сигурно адалеске со о Јехова водинела ле сине, хем ов целосно потрпинела пе сине ки лесте. О Давид џанља кај о Јехова секова диве ка сикавел леске пло мангипе. Соске сине добором уверимо ко адава? О Давид осетинела сине е Јеховаскири грижа соске ов секогаш дела ле сине адава со ваљани леске. О Давид исто аѓаар џанела сине кај о Јехова дикхела ле сине сар лескоро амал хем кај одобринела ле. Адалеске сине сигурно кај бизи разлика со ка случинел пе леске ки иднина, о Јехова понадари да ка грижинел пе башо лескере потребе. Адава со е Давиде сине ле доверба кај о Јехова мангела ле хем грижинела пе леске, поможинѓа леске те на секиринел пе хем те овел радосно хем задоволно (Пс. 16:11: w24.01 28-29, пас. 12-13).

Тари Дујто светско војна са џи акана, е Јеховаскере слуге слободно проповединена ко бут пхувја. Уствари, адалеске шај сине те дознајнен башо Јехова бут мануша. Авдиве, о членија таро Водечко тело понадари да родена водство таро Христос. Ола мангена о упатствија со дена е пхраленге хем е пхењенге те овен ко склад адалеа сар о Јехова хем о Исус дикхена ко буќа. Ола исто аѓаар дена водство е собраниенге преку о покраинска надгледникија хем о старешине. О старешине сој помазаникија, а ки побари смисла хем са о јавера старешине, тане ко е Христосескоро „десно вас“ (Отк. 2:1). Нормално, са о старешине тане несовршена хем керена грешке. О Мојсеј хем о Исус Навин понекогаш керѓе грешке, а исто хем о апостолија да (4. Мој. 20:12; Ис. Нав. 9:14, 15; Рим. 3:23). Сепак, о Христос шукар водинела е пхрален таро верно робо хем е старешинен хем понадари да ка керел адава. Адалеске, иси амен шукар причине те овел амен доверба ко водство со о Исус дела амен преку адала сој чхивде те предводинен (w24.02 23-24, пас. 13-14).

Авдиве, амен шај те фалина е Јехова амаре лафенцар кола со ка сикавен кобор сием леске благодарна хем кобор мангаја ле. Кеда проповединаја, амари главно цел тани те поможина е јаверенге те овен паше е Јеховаја хем ола да те осетинен о исто со амен осетинаја амаре мангле Дадеске (Јак. 4:8). Радосна сием со шај те сикава е манушенге сар и Библија опишинела е Јехова. Ки лате тане пишиме лескере бут шуже особине сар сој о мангипе, правда, мудрост хем моќ. Исто аѓаар, амен фалинаја е Јехова хем радујнаја ле кеда даја амендар са те џа пало лескоро пример. Адалеа сикаваја кај разликујнаја амен таро акава лошно свето. О мануша шај те приметинен кај сием појавера хем те пучен пе соске разликујнаја амен (Мат. 5:14-16). Кеда иси амен прилика те кера ленцар лафи тегани шај те објаснина ленге соске разликујнаја амен. Адава шај те керел о искрена мануша те манген те служинен е Девлеске. Кеда фалинаја е Јехова ко акала начинија радујнаја лескоро вило (1. Тим. 2:3, 4; w24.02 10, пас. 7).

Те шај те ове зрело христијани, ваљани те сикљове корисна вештине. Ола ка поможинен туке те прифатине одговорностија ко собрание, те аракхе бути хем те ачхове ки лате, те грижине тут коркори туке хем тле фамилијаке хем те ове шукар е јаверенцар. На пример, сикљов шукар те читине хем те пишине. И Библија вакерела кај окова со секова диве читинела е Девлескоро Лафи хем размислинела башо адава тано успешно хем радосно (Пс. 1:1-3). Адава со редовно ка читинел и Библија, пошукар ка џанел сар размислинела о Јехова, а адава ка поможинел леске јасно те размислинел хем те применинел адава со читинела (Изр. 1:3, 4). Е пхраленге хем е пхењенге тане потребна пхраља кола со шај те поучинен хем те ден библиска советија. Ако џанеа шукар те читине хем те пишине, ка шај те спремине говорија хем коментарија кола со ка овен корисна е јаверенге хем коленцар со шај те бајраре ленгири вера. Исто аѓаар, шај те кере корисна белешке, адава шај те поможинел туке те бајраре тли вера хем те охрабрине е јаверен (w23.12 26-27, пас. 9-11).

Кеда дараја, размислин башо адава со о Јехова ка керел ки иднина кеда о Сатана нане више те постојнел. Ко регионално конгрес со икерѓа пе ко 2014 берш, сине сикавдо сар јекх дад керела лафи пле фамилијаја башо 2. Тимотеј 3:1-5 хем сар би овена сине о лафија ако ки ленде сине пророкујмо саво ка овел о живото ко рај. Ов вакерѓа: „Ко нево свето ка овел бут шужо време. Соске о мануша ка манген е јаверен, ка манген о чачипе, ка овен скромна, понизна, ка фалинен е Девле, ка шунен пумаре родителен, ка овен благодарна, верна, ка манген пумаре фамилија, ка овен спремна башо договор, секогаш ка керен шукар лафи башо јавера, ка овел лен самоконтрола, ка овен кротка, ка манген о шукарипа, ка овен доверлива, нане те овен иначие, ка овен понизна, ка манген е Девле а на о задоволствија, ленгере постапке ка сикавен кај дарана таро Девел; хем асавке манушенцар ов паше“. Дали те фамилијаја или те пхраленцар кереа лафи башо адава саво ка овел о живото ко нево свето? (w24.01 6, пас. 13-14).

Бут охрабринела амен адава со џанаја кај о Јехова тано задоволно таро пло народо сар група! Ки Библија пишинела: „О Јехова радујнела пе пле слугенге“ (Пс. 149:4). Ама, понекогаш несаве тане добором бут обесхрабриме со шај пучена пе: „Дали о Јехова тано задоволно мандар лично?“ Буте верна слуген е Јеховаскере таро пурано време понекогаш мучинена лен сине асавке чувствија (1. Сам. 1:6-10; Јов 29:2, 4; Пс. 51:11). И Библија јасно сикавела кај о несовршена мануша шај те овен одобриме таро Девел. Сар? Мора те сикава вера ко Исус Христос хем те крстина амен (Јован 3:16). Аѓаар англо јавера сикаваја кај каинѓем амен башо амаре гревија хем кај ветинѓем е Девлеске кај ка кера лескири волја (Апо. 2:38; 3:19). О Јехова тано бут радосно кеда кераја акала буќа те шај те ова паше амала леа. Са џикоте даја амендар са те шај те живина спрема амаро завет, ка овел амен е Јеховаскоро одобрување хем ов ка дикхел ки аменде сар пле паше амала (Пс. 25:14; w24.03 26, пас. 1-2).

Амен шај те џа пало пример е апостоленгоро аѓаар со понадари да ка проповедина, чак кеда о властија вакерена аменге кај мора те чхинава. Амен шај те ова сигурна кај о Јехова ка поможинел амен те кера амари служба. Молин тут баши сила хем мудрост, исто аѓаар те поможинел тут те икљове ко крајо е проблеменцар. Бут џене амендар цидена муке адалеске со иси лен несаво насвалипе или емоционално проблеми, муло лендар некој со мангена ле, проблемија ки фамилија, прогонство или нешто јавер. А и пандемија хем о војне керѓе те овел аменге панда попхаро те икљова ко крајо акале буќенцар. Ама ма бистре, ту шај те вакере е Јеховаске са со пашљола туке ко вило. Објаснин леске тли ситуација сар со би вакереа јекхе паше амалеске хем ов уверимо кај о Јехова „ка поможинел тут“ (Пс. 37:3, 5). И молитва шај те поможинел амен те истрајна ко неволје (Рим. 12:12). О Јехова џанела таро со накхена лескере слуге хем шунела кеда родена ле (Пс. 145:18, 19; w23.05 5-6, пас. 12-15).

Кеда ваљани те ана важна одлуке, мора те хаљова „сој тани е Јеховаскири волја“ хем пало адава те постапина спрема лате (Еф. 5:17). Кеда трудинаја амен те аракха библиска начелија сој поврзиме амаре ситуацијаја, амен уствари, трудинаја амен те хаљова сар о Девел размислинела баши адаја бути. Пало адава, ако применинаја лескере начелија ка шај те ана шукар одлуке. „О лошно“ — амаро душмани о Сатана — мангела те ова добором бут зафатиме е буќенцар таро акава свето со ко крајо нане те овел амен време баши амари служба е Девлеске (1. Јов. 5:19). Јекх христијани локхе шај те почминел те концентриринел пе ко паре, образование или ки бути, наместо ко разна прилике со иси ле те шај те служинел е Јеховаске. Ако керела адава ов ка сикавел кај почминела те размислинел сар о мануша таро акава свето. Џанѓола пе, акала буќа нане погрешна. Ама ола на ваљани никогаш те овен аменге ко прво тхан ко живото (w24.03 24, пас. 16-17).