О Девел панда хари ка цидел са о муке
„Џи кеда, Јехова, ка родав помош, а ту нане те шуне ман? Џи кеда ка родав тутар помош адалеске со иси насилство, а ту нане те кере ништо?“ (Авакум 1:2, 3). Акала лафија вакерѓа лен о Авакум, јекх шукар мануш кова со сине мангло таро Девел. Дали акала лафија сикавена кај ле на сине ле доволно вера? На. О Девел уверинѓа е Авакуме кај ов одрединѓа диве кеда ка чхивел крајо е мукенге (Авакум 2:2, 3).
Кеда ту или некој таро тле паше цидела муке, тегани шај пучеа тут соске е Девлеске ваљани добором бут време те шај те анел крајо е мукенге хем соске на керѓа ништо џи акана. Ама и Библија уверинела амен: „О Јехова на каснинела те керел адава со ветинѓа, сар со несаве мислинена кај каснинела, него ов тано стрпливо туменцар, соске на мангела никој те овел уништимо, него мангела саринен те овел лен прилика те каинен пе“ (2. Петарескоро 3:9).
КЕДА О ДЕВЕЛ КА КЕРЕЛ НЕШТО ТЕ ШАЈ ТЕ ЧХИНАВЕЛ О МУКЕ?
Панда хари! О Исус вакерѓа кај ка овел јекх генерација која со ка дикхел некобор буќа со ка случинен пе ко исто време хем адава ка сикавел лаке кај тано паше о „крајо акале светоскоро“ (Матеј 24:3-42). Адава со ко амаро време исполнинена пе е Исусеске лафија, сикавела кај о Девел панда хари ка променинел о буќа ко свето.a
Ама, сар о Девел ка чхивел крајо е мукенге? Кеда сине ки пхув, о Исус сикавѓа кај е Девле иси ле моќ те чхивел крајо е мукенге кола со мучинен сине е манушен. Те дикха несаве примерија.
Природна катастрофе: Џикоте о Исус хем лескере апостолија сине ко Галилејско Море, почминѓа бари бура коте со шај сине о чамцо те батинел ко пани. Ама о Исус сикавѓа кај ле хем лескере Даде иси лен моќ упро бршим, упри бавлал хем упро јавера природна силе (Колошања 1:15, 16). О Исус вакерѓа: „Чхинав! Смирин тут!“ Со уло пало адава? „И бавлал ачхили хем ули бари тишина“ (Марко 4:35-39).
Насвалипа: О Исус сине пенџардо пало адава со сасљарела сине е королен, е сакатен, околен со сине лен епилепсија, лепра или несаво јавер насвалипе. И Библија вакерела кај ов „сасљарела сине е манушен таро секова насвалипе“ (Матеј 4:23, 24; 8:16; 11:2-5).
Бокхалипе: Џикоте сине ки пхув, о Исус користинѓа и моќ со денѓа ле лескоро Дад те шај те керел таро хари хајбе те овел доволно хајбе башо милја мануша. Ки Библија тане пишиме дуј асавке ситуацие (Матеј 14:14-21; 15:32-38).
Мерибе: Ки Библија пишинела кај о Исус ваздинѓа трине џенен таро мерибе. Адалеа сикавѓа кај е Јехова иси ле моќ те цидел о мерибе. Јекх таро адала мануша со ваздинѓа ле таро мерибе сине муло штар диве (Марко 5:35-42; Лука 7:11-16; Јован 11:3-44).
a Ако мангеа те џане нешто повише башо последна диве шај те читине ки 32 лекција таро лил Ов бахтало засекогаш, кова со икалѓе ле е Јеховаскере сведокија. Шај те пераве ле бесплатно тари амари интернет-страна www.pr418.com.