Сар шај те користинел аменге о мангипе хем и грижа е Девлескири
О Девел керѓа амаро тело добором шукар со шај коркори те сасљол. Кеда чхинаја амен, гребинаја амен или посаваја амен, тегани амаро тело сигате реагиринела те шај те чхинавел те тхавдел рат, те сасљарел и рана хем те пхандел о мас.
РАЗМИСЛИН: Ако о Девел керѓа амаро тело коркори те сасљарел о ране, зарем нашти те овел амен доверба ко лескоро ветување хем кај ка сасљарел амари дукх андре ко вило? Башо Девел, о псалмисти пишинѓа: „Ов сасљарела адален сој пхаге вилеа хем паќарела ленгере ране“ (Псалм 147:3). Ако иси тут панда дукх адалеске со накхљан нешто лошно, сар шај те уверине тут кај о Јехова ка сасљарел тле ране кола со иси тут акана хем кола со шај ка овен тут?
СО ВАКЕРЕЛА АМЕНГЕ И БИБЛИЈА
О Девел ветинела аменге: „Ма дара, соске ме сиум туја! Ма ов секиримо, соске ме сиум тло Девел! Ме ка керав тут зорало хем ка поможинав туке. Ка икерав тут мле десно праведно вастеа“ (Исаија 41:10). Кеда џанаја кај о Јехова грижинела пе аменге, тегани иси амен мир хем сила која со поможинела амен те накхава о пхарипа. О апостол Павле башо асавко мир вакерѓа кај тано „о мир таро Девел, кова сој упредер таро адава со шај о мануш шај те хаљол“. Ов пишинѓа: „Са шај те керав, соске поможинела манге окова со дела ман сила“ (Филипјања 4:4-7, 9, 13).
И Библија поможинела амен те овел амен вера ко е Јеховаскере ветувања баши иднина. На пример, ко Откровение 21:4, 5 (кова сој цитиримо ки следно страна) пишинела со ка керел о Девел хем соске шај те верујна кај адава чаче ка овел:
„Ов ка косел секоја асвин“ таро јакхја е манушенгере. О Јехова ка цидел са амаре муке хем секирацие, чак адала со е јаверенге дикхјона бут тикне.
„Окова со бешела ко престол“ ки небесно слава, о Семоќно Цари кова со керѓа са со постојнела, ка користинел пли моќ хем власт те шај цидел о муке хем те поможинел амен.
О Јехова уверинела амен кај ко лескере лафија „шај те верујнел пе хем тане чачутне!“ Е Девлескоро анав хем адава сави личност тано ов, сикавела аменге кај са со вакерѓа ка овел чаче.
О Девел ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха. Са со сине англе, накхља. Хем окова со бешела ко престол вакерѓа: „Аке! Керава са о буќа неве!“ Исто аѓаар вакерѓа: „Пишин, соске ко акала лафија шај те верујнел пе хем тане чаче!“ (Откровение 21:4, 5).
О створиме буќа хем и Библија сикавена аменге саве особине иси амаре небесно Даде. О створиме буќа бизо те керен лафи поттикнинена амен те манга те пенџара е Девле хем те ова попаше леа, а и Библија јасно вакерела аменге те кера адава. Ки лате пишинела: „Овен паше е Девлеа, хем ов ка овел паше туменцар“ (Јаков 4:8). Ко Апостолија 17:27 башо Девел вакерела кај „ов нане дур никастар амендар“.
Ако одвојнеа време те пенџаре е Девле, тегани панда повише ка ове уверимо кај „ов грижинела пе [туке]“ (1. Петарескоро 5:7). Сар ка користинел туке адава со ка џанеа кај о Јехова грижинела пе туке?
Те дикха е Торускоро пример тари Јапонија. Иако и дај таро тикнипе сикавела ле сине башо Девел, ов уло дело тари јапонско мафија која со викинела пе јакуза. Ов вакерела: „Мислинѓум кај о Девел мрзинела ман хем кај казнинела ман аѓаар со мерена о мануша кола со сине манге паше хем околен кас со мангава сине“. О Тору вакерела кај и насилно околина хем о начин сар размислинела сине керѓе ле те овел „мануш бизо вило“. О Тору вакерела со сине лескири цел ко живото: „Мангљум те керав нешто колеа со о мануша ка памтинен ман — те мерав терно откеда ка мударав некас сој тано попенџардо мандар“.
Ама, кеда о Тору хем лескири ромни и Хана почминѓе те проучинен и Библија, о Тору керѓа баре промене ко пло живото хем ко начин сар дикхела сине ко буќа. И Хана вакерела: „Мле јакхенцар дикхава сине сар променинела пе“. О Тору вакерела ко со тано акана уверимо: „Чаче иси Девел кова со грижинела пе секоле јекхеске амендар. Ов на мангела никој те мерел хем спремно тано те простинел сариненге со каинена пе башо пумаре грешке. Ов шунела амен кеда вакераја леске буќа кола со нашти те вакера е јаверенге хем кола со о јавера нашти те хаљон лен. Панда хари, о Јехова ка цидел са о проблемија, о муке хем о дукха. Ов панда авдиве поможинела аменге ко бут начинија кола со ни на авена аменге ки годи. Мангела амен хем поможинела аменге кеда и аменге бут пхаро“ (Псалм 113:7).
Е Торускоро пример сикавела аменге кобор тано шукар адава со џанаја кај е Девле иси ле моќ те цидел са о пхарипа хем те косел секоја асвин. Хем адава со џанаја кај панда хари ка керел адава, дела амен сигурно надеж баши иднина хем поможинела аменге те овел амен пошукар живото панда авдиве. Иако авдиве ко свето иси пхердо муке, амен шај чаче те верујна кај о Девел мангела амен хем грижинела пе аменге.