Состанокија баши служба — сави цел иси лен

1. Сави цел иси е состанокон баши служба?

¹ Ки јекх прилика, о Исус хем лескере 70 ученикија кхединѓе пе англедер те џан ки служба (Лука 10:1-11). Ов охрабринѓа лен адалеа со вакерѓа ленге кај ола нане те овен коркори хем кај тане водиме таро „Господари е жетвакоро“, о Јехова. Исто аѓаар, денѓа лен упатствија сар те керен и служба, хем организиринѓа лен те џан „дуј по дуј“. О состанокија баши служба со иси амен авдиве иси лен слично цел — те охрабринен амен, те ден амен упатствија хем те организиринен амен.

2. Кобор ваљани те трајнел о состанок баши служба?

² Џи акана, о состанокија баши служба трајнена сине 10 џи ко 15 минутија, хем ки ленде организиринена пе сине о пхраља, дена пе подрачја хем ко крајо вакерела пе сине молитва. Акана, о време кобор ка трајнен адала состанокија ка овел сменимо. Почминдор таро април, о состанокија баши служба ка трајнен 5 џи ко 7 минутија. Ама, ако англедер о состанок баши служба сине несаво јавер состанок, о состанок баши служба ваљани те овел панда пократко, соске о пхраља више шунѓе несаве мисле тари Библија. Ако о состанокија баши служба тане кратка, тегани ка шај те накхавел пе побутер време ки служба. Исто аѓаар, ако о пионерија или о објавителија више почминѓе и служба англедер те почминел о состанок, ка овел ленге да пошукар ако о состанок сине кратко.

3. Сар ваљани те планиринен пе о состанокија баши служба те шај те поможинен е објавителенге?

³ О состанокија баши служба ваљани те планиринен пе аѓаар со ка поможинен е објавителенге. Ко бут собранија шај ка овел пошукар о групе проповедибаске те кхеден пе ко различна тхана, а на само ко јекх тхан. Аѓаар, шај ка овел полокхо е објавителенге те ресен ко состанок баши служба хем ко подрачје. О објавителија ка шај посиг те овен организириме хем полокхо ка овел е надгледниконге те посветинен внимание секаске тари ленгири група. О старешине ка одлучинен со и најшукар башо ленгоро собрание хем дали о групе ка кхеден пе ко јекх или ко побутер тхана. Англедер те завршинел о состанок молитваја, сарине ваљани те џанен коте хем касаја ка џан ки служба.

4. Соске о состанокија баши служба тане важна исто сар са о јавера состанокија?

⁴ Акава да состанок тано важно сар о јавера: Адалеске со о состанокија баши служба икерена пе те поможинен околенге со ка џан ки служба, шај ки ленде нане те авен сарине таро собрание. Ама, акава на значинела кај ола тане похари важна таро јавера собраниска состанокија. Акала да состанокија, исто сар о јавера, тане таро Јехова кола со поттикнинена амен те сикава мангипе хем те кера шукар буќа (Евр. 10:24, 25). Адалеске, окола со водинена акава состанок ваљани шукар те спреминен пе те шај адава со ка овел вакердо те славинел е Јехова хем те овел корисно е пхраленге со ка шунен. О објавителија со ка џан ки служба, ако шај, ка овел шукар те трудинен пе те авен ко акала состанокија.

5. а) Со ваљани те керел о надгледнико баши служба кеда организиринела о состанокија баши служба? б) Сар ваљани јекх пхен те водинел о состанок баши служба?

⁵ Сар те спреминен пе адала со водинена: Те шај некој шукар те спреминел пе баши несави точка ко состанок, ваљани англедер те џанел сави точка иси ле. Акава исто аѓаар важинела е состаноконге баши служба. Џанѓола пе, ако о групе проповедибаске кхедена пе ко различна тхана, о надгледнико е групакоро или о помошнико ваљани те водинел о состанок ки ленгири група. Ама, кеда цело собрание кхедела пе ко јекх тхан башо состанок, тегани о надгледнико баши служба ваљани те одрединел кој ка водинел о состанок. Несаве надгледникија баши служба дена распоред са е водителенге хем јекх распоред чхивена ки огласно табла. О надгледнико баши служба ваљани шукар те проценинел кеда биринела е водителен, соске о квалитети е состаноконгоро зависинела таро адава сар некој водинела лен. Со кеда ко состанок нане те овел нијекх старешина, слуга помошнико или пхрал кова со о старешине мислинена кај шај те водинел о состанок? Тегани о надгледнико баши служба шај те чхивел несаве крстиме пхења со и способно те водинел о состанок. (Дикх и статија „Кеда пхен ваљани те водинел“.)

6. Соске тано важно адава со водинела о состанок те овел шукар спремимо?

⁶ Кеда иси амен задача ки Теократско школа или ко Состанок баши амари служба, тегани дикхаја ки лате сар јекх важно задача хем шукар спреминаја амен. На аџикераја ко последно моменти те спремина со ка вакера ки точка со иси амен. И задача те водинел пе о состанок баши служба тани исто добором важно сар о јавера задаче. Адалеске со акана о состанок ка овел пократко, о водители ваљани шукар те спреминел пе, те шај адава со ка вакерел те овел ле смисла хем те завршинел ко време. Исто аѓаар, шукар те спреминел пе о водители значинела, кеда ка ваљани те џал пе ки служба сар група, англедер те овел ле спремиме подрачја.

7. Башо со шај те керел лафи о водители ко состанок баши служба?

⁷ Башо со те керел пе лафи: Ко секова тхан иси различна околностија, адалеске о верно хем о разборито робо на дела нацртија со те вакерел пе ко секова состанок баши служба. Ки рамка „Башо со шај те керел пе лафи ко состанок баши служба“ иси предлогија со шај те користинен пе. Обично, акава состанок ваљани те водинел пе сар јекх дискусија. Несаво пути, шај те користинел пе јекх шукар спремими презентација или видеоклипи таро jw.org. Кеда о водители спреминела пе башо состанок, ваљани те мислинел сар шај те охрабринел е објавителен хем те поможинел лен пошукар те керен и служба адава диве.

8. Башо со шај те керел пе лафи ко состанокија баши служба со икерена пе сабота хем недела?

⁸ Сабота тано диве кеда бут објавителија нудинена и Стражарска кула хем о Разбудете се! Бут џене со џана ки служба сабота, на џана ки служба о јавера диве ко курко. Адалеске шај те овел ленге пхаро те сетинен пе ки презентација со сиклиле ла ки ленгири Фамилијарно рат. Ка овел шукар о водители те користинел јекх таро презентацие со и тане ки палуни страна тари Амари служба башо Царство. Или палем, ки презентација башо списание шај те спомнинел несави актуелно информација, настан или празнико со и пенџардо е манушенге. Исто аѓаар, шај те дел предлогија со те вакерел пе ки презентација те шај пало адава те керел пе повторно посета. Ако несаве објавителија денѓе адала списанија ки служба, о водители шај те замолинел лен те вакерен несаве предлогија сар денѓе о списанија или несаво охрабрувачко искуство. Недела, о водители шај те користинел презентацие поврзиме е литератураја со дела пе адава масек. О брошуре сар со и Шукар вест, Шун е Девле хем о лил Што учи Библијата шај те ден пе ки служба секова диве, адалеске о водители шај те вакерел сар шај те нудина јекх лендар.

9. Башо со шај те керел пе лафи ко викендија кеда иси посебно акција?

⁹ Ко викендија кеда иси посебно акција, о пхрал со водинела о состанок шај те сикавел сар те ден пе о списанија адале масекоске заедно е поканаја или е трактатеа, или шај те вакерел со ваљани те керел пе ако некој сикавела интерес. Исто аѓаар, шај те вакерен пе искуствија со ка сикавен кобор тане важна акала посебна акцие.

10, 11. Со шај те керен о објавителија те шај о состанок баши служба те овел пошукар?

¹⁰ Сар те спреминен пе о објавителија: О објавителија да шај те поможинен о состанок баши служба те овел пошукар. Кеда ка спреминен пе англедер те џан ки служба, тегани ка шај те охрабринен пе е јавере објавителенцар. На пример, шај те спреминен пе ки Фамилијарно рат. Шукар те спреминен пе о објавителија, исто аѓаар значинела те овел лен доволно литература ленцар англедер те авен ко состанок те шај посиг те икљовен те џан ко подрачје.

¹¹ Исто аѓаар, ка сикава кај сием спремна башо состанок, ако ресаја некобор минутија англедер те почминел. Соске тано важно адава? О пхрал со водинела о состанок лела ко предвид некобор буќа англедер те организиринел и група. Ако але похари објавителија, тегани о пхрал шај ка бичхалел саринен ко јекх подрачје со нане завршимо цело. Ако несаве објавителен иси подрачје кова со и подур, тегани о водители шај ка замолинел лен те џан адари некасаја со иси ле врда. Кеда о подрачје тано ко тхан коте со нане безбедно, тегани о водители шај ка биринел пхрален те џан е пхењенцар ки служба или те овен паше узи група коте со и о пхења. Е објавителенге со и насвале шај ка дел пе подрачје коте со о улице тане рамна или коте со иси кхера со нане лен бут басамакија. О неве објавителија шај ка овен чхивде те џан ки служба е поискусна објавителенцар. Ама, ако о објавителија каснинена ко состанок, тегани о планија шај ка ваљани те сменинен пе или те прилагодинен пе адаленге со каснинѓе. Точно и адава кај несаво пути шај ка овел причина соске каснинаја. Ама, ако иси амен навика секова пути те каснина, ваљани те пуча амен дали доволно ценинаја амаре состанокија баши служба или те дикха дали шај пошукар те организирина амаро време.

12. Ако коркори биринеа туке партнери баши служба, башо со ваљани те размислине?

¹² О објавителија со џана ко состанок шај англедер те договоринен песке партнери службаке или о водители шај те вакерел ленге касаја те џан. Ако коркори биринеа туке партнери, дали ка „пхраве то вило“ адалеа со ка џа ки служба различна објавителенцар, а на само адаленцар со џаја стално? (2. Кор. 6:11-13). Дали шај некогаш те договорине ту те џа ки служба јекхе неве објавителеа те шај те поможине леске? (1. Кор. 10:24; 1. Тим. 4:13, 15). Шун са о упатствија со и туке денде, сар на пример ко кова подрачје те проповедине. Кеда ка завршинел о состанок, трудин ту ма те сменине адава со и договоримо хем џа ко подрачје со посигате.

13. Сар о состанокија баши служба ка поможинен амен ако сарине сием совесна хем трудинаја амен?

¹³ Е Исусескере ученикија сине бут радосна кеда иранѓе пе тари служба (Лука 10:17). О состанок е Исусеа англедер те џан ки служба поможинѓа лен те овен успешна. Авдиве да, о состанокија баши служба шај бут те поможинен амен. Ако сарине сием совесна хем трудинаја амен, тегани о состанокија баши служба ка охрабринен амен, ка ден амен упатствија хем ка организиринен амен те кера амари задача ‚те сведочина са е народонге‘ (Мат. 24:14).