„И борба тани е Јеховаскири“

О проблеми почминѓа ко 1999 берш кеда и Француско влада вакерѓа кај амари подружница ваљани те платинел данок башо прилог со добинѓа ле ко периоди таро 1993 и 1996 берш. На добинѓем правда таро нијекх судо ки Франција. Откеда нашавѓем о случај ко апелационо судо, и влада леља повише таро штар текваш милиоња еврија тари сметка е подружницакири. Амари последно шанса те шај те ирана о паре сине те жалина амен ко (ЕСМП). Ама, англедер те почминел о судско процес, о (ЕСМП), родинѓа те овел амен состанок е адвокатенцар тари Француско влада хем јекхе претставникоја таро адава судо те шај те анел пе договор англедер о случај те џал ко (ЕСМП).

Очекујнаја сине кај и службеничка ка керел аменге притисок те решина акава проблеми аѓаар со ка сложина амен те платина дело тари сума. Ама, аменге сине јасно кај ако платинаја чак јекх евро да, адалеа ка пхага о библиска начелија. О пхраља хем о пхења денѓе прилогија те шај те поддржинен о активностија башо Царство, адалеске адала прилогија на припадинена сине е владаке (Мат. 22:21). Сепак, адалеске со поштујнаја о судска правилија амен присуствујнѓем ко адава состанок.

Адава состанок икерѓа пе ки јекх таро бут шуже конференциска сале ко судо. О состанок на почминѓа баш најшукар. И службеничка таро (ЕСМП) одма вакерѓа кај е Јеховаскере сведокија ваљани те платинен дело таро данок кова со и Француско влада родела ле. Тегани, таро јекх пути ало аменге те пуча ла: „Дали сиен свесна кај и влада више леља повише таро штар текваш милиоња еврија тари амари сметка ки банка?“

Ој сине шокирими. Кеда о правно тими е владакоро вакерѓа кај керѓе адава, лакоро стави башо случај целосно менинѓа пе. Ој опоменинѓа лен хем одма чхинавѓа о состанок. Тегани халиљум кај о Јехова, ко начин кова со ни на мислинѓем, целосно менинѓа о буќа те шај те победина о случај. Кеда иклилем таро состанок, сием сине бут среќна хем ни на верујнела пе сине аменге со случинѓа пе.

Ко 30 јуни 2011 берш, о (ЕСМП) анѓа одлука кај на ваљани те платина данок хем кај и Француско влада ваљани те иранел аменге о паре со леља лен амендар хем адава каматаја. Акаја историско пресуда заштитинела о чисто обожавибе ки Франција са џи авдиве. Адава пучибе со на планиринѓем те пуча ле, сине исто сар о бар со кхувѓа е Голијате ко шеро. Менинѓа и одлука башо случај. Соске побединѓем? Баш сар со вакерѓа о Давид е Голијатеске, „и борба тани е Јеховаскири“ (1. Сам. 17:45-47).

На сине амен само акаја победа. Џи авдиве, иако иси баро политичко хем религиозно противибе, о најбаре судија ко 70 пхувја хем некобор меѓународна судија анѓе 1.225 пресуде ки корист е Јеховаскере сведоконге. Акала правна победе заштитинена амаре основна правија, сар на пример о право те ова законски признајми религија, јавно те кера амари служба, те одбина те учествујна ко патриотска церемоние хем те одбина рат.

Сар ало џи ко адава те учествујнав ко правно случај ки Европа иако служинава сине ко главно седиште е Јеховаскере сведоконгоро ко Њујорк (Америка)?

СИУМ СИНЕ ВОСПИТИМО ТАРО РЕВНА РОДИТЕЛИЈА

Мле родителија, о Џорџ хем и Лусил, дипломиринѓе ко 12 класи ко Гилеад хем служинѓе ки Етиопија кеда бијандиљум ко 1956 берш. Чхивѓе манге анав Филип, исто сар о проповеднико таро прво веко (Апо. 21:8). О следно берш, и влада забранинѓа амаре активностија. Иако сиум сине бут тикно, шукар сетинава ман кај мли фамилија гаравиндор обожавинела сине е Јехова. Сар чхаво, адава сине манге бут интересно. Жално тано адава со ко 1960 берш, о властија бркинѓе амен тари адаја држава.

Кеда сар фамилија селинѓем амен ки Вичита (Канзас, Америка) мле родителија леле пеа нешто бут посебно — пумари мисионерско ревност. Ола живинена сине спрема о чачипе хем на само со сикавѓе ман, него хем мле побаре пхења, и Џуди, хем мле потикне пхрале, о Лесли, кола со исто аѓаар бијандиле ки Етиопија, те манга е Јехова хем те служина леске цело амаре вилеа. Ме крстинѓум ман кеда сине ман 13 берш. Трин берш покасно, сар фамилија селинѓем амен ко тхан коте со сине побари потреба, ки Арекипа (Перу).

Ко 1974 берш, кеда сине ман 18 берш, о Бетел ко Перу бичхалѓа ман хем панда штаре јавере пхрален те служина сар специјална пионерија. Ваљани сине те проповедина ко подрачја коте со никој англедер на проповединѓа, ко уче Анде. Адава значинела сине те сведочина е манушенге со керена сине лафи ки чхиб кечуа хем ки ајмарско чхиб. Патујнаја сине јекхе камперско врдаја коле со викинаја сине „и Арка“, соске изглединела сине сар бари кутија. Бут сиум радосно кеда сетинава ман ко време кеда преку и Библија сикавава сине е манушенге таро адала тхана кај о Јехова панда хари ка чхивел крајо е чоролипаске, е насвалипаске хем е мерибаске (Отк. 21:3, 4). Бут џене лендар прифатинѓе о хабери башо Царство.

ДОБИНАВА ЗАДАЧА ТЕ СЛУЖИНАВ КО ГЛАВНО СЕДИШТЕ

Во 1977 берш, о Алберт Шредер кова со служинела сине сар члени ко Водечко тело е Јеховаскере сведоконгоро, ало ки посета ко Перу. Ов поттикнинѓа ман те дав молба баши бетелско служба ко главно седиште. Хем денѓум и молба. Кратко пало адава ко 17 јуни 1977 берш, почминѓум те служинав ко Бетел ко Бруклин. О следна штар берша керѓум бути ко одделенија башо чистибе хем одржибе.

Ко јуни 1978 берш, ко јекх меѓународно конгрес ко Њу Орлеанс (Луизијана), запознајнѓум е пхења Елизабет Авалон. Лакере родителија, исто сар мле, цело вилеа служинена сине е Јеховаске. И Елизабет више служинела сине штар берш сар општо пионери хем мангела сине понадари да те служинел е Јеховаске ки полновремено служба џи ко крајо таро пло живото. Ачхилем ко контакт лаја. Башо кратко време бут заманглем амен. Венчинѓем амен ко 20 октомври 1979 берш хем почминѓем е бетелско службаја сар брачно пари.

О пхраља хем о пхења таро амаро прво собрание ко Бруклин — шпанско чхиб, бут замангле амен. Ко берша со накхле, трин јавера бут шукар собранија спремно прифатинѓе амен хем поддржинѓе амен ки бетелско служба. Бут ценинаја ленгири помош хем и поддршка таро амала хем тари фамилија, кола со поможинѓе амен те грижина амен амаре пхуре родителенге.

ПОЧМИНЃУМ ТЕ КЕРАВ БУТИ КО ПРАВНО ОДДЕЛЕНИЕ

Бут изненадинѓум ман кеда ко јануари 1982 берш, добинѓум задача те служинав ко Правно одделение ко Бетел. Трин берш покасно, сиум сине замолимо те пишинав ман ко правно факултети хем те овав адвокати. Џикоте студиринава сине, изненадинѓум ман кеда дознајнѓум кај о мануша ки Америка хем ко јавера пхувја, иси лен слобода те керен бут буќа адалеске со е Јеховаскере сведокија побединѓе ко бут судска случаија. Башо адала важна случаија бут керела пе сине лафи ко предавања ко факултети.

Ко 1986 берш, кеда сине ман 30 берш, сиум сине именујмо сар надгледнико ко Правно одделение. Сине манге бари чест со добинѓум асавки задача иако сиум сине бут терно, ама адалеске со на сине ман искуство адале буќаке, сиум сине бут секиримо.

Уљум адвокати ко 1988 берш, ама на сиум сине свесно сар адаја школа влијајнѓа упри мли духовност. Некој со иси ле бари школа шај те овел амбициозно хем те мислинел кај тано пошукар некастар со нане ле асавки школа. И Елизабет поможинѓа манге палем те иранав мли духовно рутина со сине ман англедер те џав ко правно факултети. Ваљани сине манге време, ама хари похари опоравинѓум ман ко духовно поглед. Таро лично искуство шај те вакерав кај ако џанеа бут буќа, адава нане о најважно ко живото. Адава со чаче врединела тано о паше амалипе е Јеховаја хем о хор мангипе спрема лесте хем спрема лескоро народо.

БРАНИНЕЛА ПЕ ХЕМ ЗАКОНСКИ ПОТВРДИНЕЛА ПЕ О ПРАВО ТЕ ПРОПОВЕДИНЕЛ ПЕ О ШУКАР ХАБЕРИ

Откеда завршинѓум о правно факултети, концентриринѓум ман ко адава те поможинав те организиринен пе о правна службе кола со ваљанена сине ко Бетел хем те бранинен пе о активностија е Царствоскере ко судо. Сине интересно те поддржинел пе амари организација која со сигате менинела пе хем која со цело време напредујнела. Ама сине хем предизвикија. На пример, англедер родаја сине прилогија баши амари литература, ама почминдор таро 1990 берш, о Правно одделение сине замолимо те дел упатствија башо адава сар те чхинавел пе више адалеа. Оттегани, е Јеховаскере сведокија дена литература бизо паре. Акава керѓа и бути ко Бетел хем ко подрачје те овел поедноставно хем поможинела аменге те на овен амен проблемија даноконцар. Несаве мислинена сине кај аѓаар ка нашава бут паре хем адалеске ка нашти те печатина литература која со ка шај те да ла ки служба. Ама случинѓа пе баш о спротивно. Ко 1990 берш, о број околенгоро со служинена е Јеховаске барило дупло хем о мануша авдиве шај те добинен бизо паре духовно храна која со спасинела животија. Лично дикхљум кај о баре промене со случинена пе ки амари организација тане успешна само адалеске со о Јехова поможинела хем дела амен водство преку о верно робо (2. Мој. 15:2; Мат. 24:45).

О победе со добинаја лен ко судо нане само адалеске со иси амен шукар адвокатија. Бут пути адава со поттикнинела околен сој ки власт те анен одлуке ки амари корист тано о шукар понашибе е Јеховаскере слугенгоро. Јекх асавко случај сине ко 1998 берш, кеда трин членија таро Водечко тело хем ленгере ромња присуствујнѓе ко некобор историска конгресија ки Куба. Ленгоро љубезно понашибе хем поштовање бут повише поможинѓа те решинен пе о проблемија е владаја него амаре официјална состанокија со сине амен ленцар.

Ама кеда о правна случаија нашти те решинен пе ко мирно начин, амен џаја ко судо те шај те бранина хем законски те потврдина о право те проповединел пе о шукар хабери (Фил. 1:7). На пример, бут берша о властија ки Европа хем ки Јужно Кореа на признајнена сине амаро право те кера цивилно служба наместо те џа ки војска. Адалеске, околу 18.000 пхраља ки Европа хем повише таро 19.000 пхраља ки Јужно Кореја сине чхивде ко затвор адалеске со одбинѓе те џан ки војска баши пумари совест.

Ко крајо, ко 7 јули 2011 берш, о (ЕСМП) анѓа историско пресуда ко случај Бајатјан против Ерменија колаја со таро са о Европска пхувја родела пе те анел пе закони баши цивилно служба околенге со на мангена те џан ки војска баши пумари вера. Пали адаја пресуда, ко 28 јуни ко 2018 берш, о Уставно судо ки Јужно Кореа анѓа слично пресуда. Акала важна победе нане сине те овен чак хем ако некобор таро амаре терне пхраља на ачховена сине неутрална.

О Правно одделение ко главно седиште хем ко подружнице ки цели пхув, бут керела бути те шај те бранинен о активностија е Царствоскере. Чест аменге те бранина е пхрален хем е пхењен колен со иси противибе таро властија. Бизи разлика дали ка победина ко судо или на, е судска случаенцар даја сведоштво е управителенге хем царенге хем народонге (Мат. 10:18). О судие, о претставникија е владенгере, о медиумија хем о народо мора те размислинен башо стихија со вклучинаја лен ко амаре пишиме документија хем башо стихија џикоте трајнела о судибе. О искрена мануша дознајнена кој тане е Јеховаскере сведокија хем ко со темелинена пе ленгере верувања. Несаве лендар уле амаре пхраља хем пхења.

ФАЛА, ЈЕХОВА!

Ко акала 40 берш со накхле сине ман чест те соработинав подружниценцар ко цело свето башо правна буќа хем те претставинав е организација англо повише баре судија хем англо службеникија сој ко важна тхана. Бут мангава хем ценинава мле соработникон сој ко Правно одделение ко главно седиште хем ко правна одделенија ко цело свето. Сине ман бут шужо живото хем добинѓум бут благословија.

И Елизабет верно хем мангипаја поддржинела ман ко акала 45 берша хем ко шукар хем ко лошно. Бут ценинава ла соске адава керела ле иако тани насвали хем нане ла сила.

Таро лично искуство шај те вакера кај и сила хем и победа на авена таро амаре способностија. Сар со вакерѓа о Давид: „О Јехова тано и сила пле народоске“ (Пс. 28:8). Чаче, „и борба тани е Јеховаскири“.