Дали џанљан?

Со керена сине о свештеникија ко храми ко прво веко е ратеа таро животне со сине денде сар жртва?

СЕКОВА берш, о свештеникија ко пурано Израел дена сине повише милје животне сар жртва ко жртвенико ко храми. Спрема о еврејско историчари таро прво веко, о Јосиф Флавиј, ки Пасха дена пе сине повише таро 250.000 бакхре сар жртве. Адава значинела кај тхавдела сине бут рат (3. Мој. 1:10, 11; 4. Мој. 28:16, 19). Со керела пе сине адале ратеа?

О археолозија откринѓе баро систем каналенцар котар со авела сине пани ко храми е Иродескоро кола со користинена пе сине са џикоте на сине уништимо о храми ко 70 берш тари а.е. Јасно тано кај акава систем користинела пе сине те шај те чистинел пе о рат таро храми.

Те дикха дуј буќа со откринена аменге нешто повише башо адава систем каналенцар:

• Дупке тело жртвенико: Сар изглединела сине акава систем каналенцар е жртвеникоскоро, иси ки Мишна — пурано лил таро Еврејско усно закони хем традицие, која со сине керди ко почеток таро трито веко тари а.е. Ки лате пишинела кај сине дуј дупке ко јекх крајо таро жртвенико. О рат таро жртве хем о пани со користинела пе сине те шај те чистинел пе о жртвенико, тхавдела сине таро дупке хем преку јекх канали продолжинела сине те тхавдел са џи ки долина Кедрон.

  Акаја пурани традиција те керен пе дупке паше узо жртвенико, одговоринела адалеа со аракхле о авдисутне археолозија. Јекх научно истражување потврдинела кај сине аракхло јекх баро систем каналенцар паше узо храми. Ко адава лил пишинела: „Акава систем веројатно поможинела сине о пани заедно е ратеа те икљол таро храми“ (The Cambridge His­to­ry of Judaism).

• Бут пани: Е свештениконге ваљани сине бут пани те шај те тховен о поди таро жртвенико хем те чистинен о канали. Те шај те керен акаја важно задача, е свештеникон сине лен цело време пани тари диз. О пани авела сине тари диз џи ко жртвенико преку систем каналенцар, аквадуктија, резервоарија хем тикне езерија. Спрема о археолого о Џозеф Патрик, изгледа кај нијекх јавер храми ко адава време на сине ле добором шукар начин сар те анел пе пани хем те фрдел пе о мелало пани.