АЧХОВЕН ЏАНГАВДЕ!
И религија хем и војна ки Украина — со вакерела и Библија?
Дикх со вакерѓе несаве религиозна водачија баши војна ки Украина:
„О поглавари тари Руско православно црква, о патријархо о Кирил, на вакерѓа ништо башо адава со керела и Русија... Лескири црква понадари да ширинела ховавне информацие баши Украина, хем о Путин користинела акаја пропаганда те оправдинел и војна“ (EUobserver, 7 март 2022).
„О патријархо о Кирил јавно оправдинѓа адава со керела и Русија ки Украина адалеа со вакерѓа кај акаја војна тани против о грево“ (AP News, 8 март 2022).
„О поглавари тари Украинско православно црква, о митрополит Епифаниј таро Киев, понеделник благословинѓа и војна пле народоскири против о руска војникија... Ов вакерѓа кај нане грево те мударен пе руска војникија“ (Jerusalem Post, 16 март 2022).
„Амен поддржинаја е Украинско војска хем са е манушен со боринена пе те бранинен амари пхув. Мангаја те да лен е Девлескоро благослов џикоте бранинена и Украина таро душмања хем молинаја амен ленге“ (Изјава таро Украинско совет е црквенгоро хем релгиозна организациеa, 24 февруари 2022).
Со мислинеа, дали о религие кола со вакерена кај џана пало е Исусескоро пример ваљани те поттикнинен пле верникон те џан ки војна? Со вакерела и Библија башо адава?
И религија хем о војне — со вакерела и историја?
И историја сикавела кај о религие бут пути поддржинѓе хем оправдинѓе о војне, па чак поттикнинѓе е манушен те џан ки војна, а ко исто време керена пе кај мангена о мир. Бершенцар, е Јеховаскере сведокија поможинена е јаверенге те дикхен кобор тане лицемерна о религие. Те дикха несаве примерија кола тане спомниме ко амаре публикацие.
И статија „Крстоносна војне — трагично илузија“ сикавела кај и Римокатоличко црква тани одговорно башо баре мудариба со сине керде ко анав е Девлескоро хем е Христосескоро.
И статија „И католичко црква ки Африка“ керела лафи кај о религие на чхинавѓе и војна машкар о племија, па чак на чхинавѓе ни о геноцид.
О статие „Дали и религија тани одговорно?“, „И улога е религијакири ко војне“, хем „Војна која со менинѓа о свето“ објаснинена сар о католичка, о православна хем о протестантска свештеникија поддржинѓе о солдуј стране ко бут војне.
Дали ваљани о христијанска религие те поддржинен о војне?
Со сикавѓа о Исус: „Манг тле пашутне сар коркори тут“ (Матеј 22:39). „Манген тумаре душманен“ (Матеј 5:44-47).
Размислин: Дали шај јекх религија те вакерел кај икерела пе ко е Исусескере заповедија башо мангипе, а ко исто време поттикнинела пле верникон те мударен ки војна? Те шај те џане о одговор читин о статие „И шукар религија сикавела те манга е јаверен“ хем „Шај ли те манге е душманен?“
Со вакерѓа о Исус: „Мло Царство нане дело таро акава свето. Те овел сине мло Царство дело таро акава свето мле слуге ка боринен пе сине те на овав предајмо“ (Јован 18:36). „Сарине со астарена пе ко мачи, таро мачи ка мерен“ (Матеј 26:47-52).
Размислин: Ако о христијања на смејнѓе те боринен пе те шај те бранинен е Исусе, дали ваљани те боринен пе тари било која јавер причина? Читин и статија „Дали о христијања ваљани те боринен пе?“ те шај те дикхе сар о христијања таро прво веко верно џана сине пало е Исусескоро пример хем икерена пе сине ко адава со ов сикавела.
Со ка овел е религиенцар кола со поттикнинена о војне?
И Библија сикавела кај о Девел отфрлинела о религие со вакерена кај џана пало пример е Исусескоро, ама на икерена лескере сикљојба (Матеј 7:21-23; Тит 1:16).
Ко лил Откровение вакерела кај англо Девел о религие тане одговорна башо са о мануша со сине мударде ки пхув (Откровение 18:21, 24). Те шај те џане соске, читин и статија „Сој тано о Баро Вавилон?“
О Исус сикавѓа кај са о религие кола со отфрлинела лен о Девел ка овен уништиме адалеске со керена лошна буќа, исто сар со „секова каш со на дела шукар плоди, чхинела пе хем фрдела пе ки јаг“ (Матеј 7:15-20). Ако мангеа те џане сар ка овел адава, читин и статија „О крајо е ховавне религијакоро тано паше!“.
О слике тане ленде, таро лево ко десно: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Ко Украинско совет е црквенгоро хем релгиозна организацие (UCCRO) вклучиме тане 15 цркве хем верска заеднице, машкар ленде тане и Православно, Грчкокатоличко хем Римокатоличко црква, протестантска хем евангелистичка цркве, а исто аѓаар о еврејска хем о муслиманска верска заеднице.