Дали о чачипе тано панда важно?

Дали мислинеа кај на дикхјола нисави разлика машкар о чачипе хем о ховајбе? Изгледа авдиве е манушен повише иси лен доверба ко пле чувствија хем ко адава со ола верујнена, а на ко чачипе хем фактија. На пример, сигенде уло популарно о лафи со сине измислимо те шај те опишинел адава — „пост-чачипе“, јавере лафенцар превртимо чачипе.a Акава лафи бут шукар опишинела о свето авдиве колесте со бут џене мислинена кај чачипе на постојнела.

Асавко мислење нане нешто нево. Англедер околу 2.000 берша, о римско управители о Понтиј Пилат бизи лаџ пучља е Исусе: „Сој тано чачипе?“ (Јован 18:38). Иако о Пилат на аџикерѓа о Исус те одговоринел леске, лескоро пучибе тано бут важно. О одговор со дела и Библија башо адава пучибе шај те поможинел туке те разликујне о чачипе таро ховајбе.

Дали постојнела чачипе?

Оја. Ки Библија о лафи „чачипе“ користинела пе кеда нешто темелинела пе ко фактија хем ко адава сој точно хем исправно. Ки лате пишинела кај таро Јехова,b о Девел авела о целосно чачипе хем баши лесте вакерела кај тано Девел е чачипаскоро (Псалм 31:5). Ки Библија пишинела о чачипе башо Девел хем спорединела ле светлинаја која со водинела амен ко акава свето сој ко хаос (Псалм 43:3; Јован 17:17).

Сар те аракхе о чачипе?

О Девел на мангела те прифатина о чачипе тари Библија бизо те размислина. Наместо адава, ов поттикнинела амен те испитина о чачипе аѓаар со ка користина амари годи, а на амаре чувствија (Римјања 12:1). Ов мангела те запознајна ле хем те манга ле са амаре гоѓаја хем поттикнинела амен те уверина амен ко чачипе со сиклилем ле тари Библија (Матеј 22:37, 38; Апостолија 17:11).

Кастар авела о ховајбе?

И Библија вакерела кај о ховајбе авела таро е Девлескоро душмани, о Сатана, хем баши лесте вакерела кај тано „дад е ховајбаскоро“ (Јован 8:44). Ов вакерѓа ховајба башо Девел е прва манушенге (1. Мојсеева 3:1-6, 13, 17-19; 5:5). Оттегани о Сатана понадари да вакерела ховајба те шај те гаравел о чачипе башо Девел (Откровение 12:9).

Соске авдиве иси бут ховајба?

Ко амаро време колеске со ки Библија вакерела кај тано „последна диве“, о Сатана са повише ховавела е манушен. Адалеске о мануша бут пути ховавена те шај те анен е јаверен ко погрешно заклучок хем те искористинен лен (2. Тимотеј 3:1, 13). Авдиве исто аѓаар иси ховајба ко бут религие. Башо амаро време, и Библија пророкујнѓа кај о мануша „ка роден учителен кола со ка вакерен ленге адава со мангена те шунен“ хем „нане те манген те шунен о чачипе“ (2. Тимотеј 4:3, 4).

Соске тано важно о чачипе?

Те шај е манушен те овел лен доверба машкар песте, ваљани ленге о чачипе. Кеда нане доверба нане амалипа хем о мануша нашти те овен заедно. Спрема и Библија, о Девел мангела амаро обожавибе те темелинел пе ко чачипе. Ки лате пишинела: „Окола со поштујнена [е Девле] мора те служинен леске духоја хем чачипаја“ (Јован 4:24). Те шај те дознајне сар о чачипе шај те поможинел тут те пенџаре о ховајба со вакерена лен о религие хем те ослободине тут лендар, читин и серија таро статие е насловеа „Лаги што го оцрнуваат Бог“.

Соске о Девел мангела те џанав о чачипе?

О Девел мангела те живине засекогаш, а башо адава ваљани те џане о чачипе баши лесте (1. Тимотеј 2:4). Ако дознајнеа е Девлескере мерилија башо исправно хем погрешно хем живинеа спрема ленде, ка ове паше амал леа (Псалм 15:1, 2). Те шај те поможинел е манушенге те дознајнен о чачипе, о Девел бичхалѓа е Исусе ки пхув. О Девел мангела те шуна о сикајба е Исусескере (Матеј 17:5; Јован 18:37).

Дали о Девел некогаш ка цидел о ховајбе?

Оја. О Девел мрзинела кеда о мануша ховајбаја искористинена е јаверен. Ов ветинела кај ка чистинел и пхув таро окола со биринена понадари да те ховавен (Псалм 5:6). Тегани ка исполнинел пло ветување да: „О муј кова со вакерела о чачипе ка постојнел засекогаш“ (Изреки 12:19).