О научникија мрдинѓе англал о саати башо судно диве — Со вакерела и Библија?

Ко 24 јануари 2023 берш, о научникија вакерѓе кај о стрелке таро саати башо судно дивеa але попаше узо 12 раќате, а адава сикавела кај паше тано о крајо е светоскоро.

• „О ’саати башо судно диве‘ симболизиринела и опасност о мануша те уништинен коркори пес. Адалеске со иси војна ки Украина, дар тари нуклеарно војна хем климатско криза, о научникија вторник мрдинѓе о стрелке попаше џи ко 12 о саати раќате. О стрелке тане акана попаше сар никогаш англедер“ (AFP International Text Wire).

• „О научникија вторник вакерѓе кај о стрелке таро ’саати башо судно диве‘ тане мрдиме англал хем кај ачхиле панда 90 секундија џи ко 12 — о мануша никогаш на сине добором паше џи ко Армагедон“ (ABC News).

• „Јекх група научникија таро повише пхувја предупрединѓе кај о ризик о мануша те уништинен коркори пес тано најбаро џи акана“ (The Guardian).

Дали тано паше о крајо е манушенгоро хем е пхувјакоро? Дали ваљани те дара со ка случинел пе ки иднина? Со вакерела и Библија?

Со ка овел ки иднина

И Библија вакерела кај „и пхув ачховела засекогаш“ хем кај о мануша „ка живинен вечно ки лате“ (Проповедник 1:4; Псалм 37:29). Значи, о мануша нане те уништинен и пхув, или те керен ла тхан коте со нашти те живинел пе.

Сепак, и Библија спомнинела јекх крајо, на пример ој вакерела кај „о свето накхела“ (1. Јованескоро 2:17).

• Те шај те дознајне со значинела о крајо е светоскоро сој спомнимо ки Библија, читин и статија „Што е крајот?“

• Те шај те дознајне со ка случинел пе ки иднина спрема и Библија, читин и статија „Кеда ка авел о крајо е светоскоро?“

Ачхов позитивно

И Библија шај те поможинел аменге те ачхова позитивна, иако ко свето иси проблемија. Сар?

• И Библија дела амен корисна советија башо амаро живото (2. Тимотеј 3:16, 17). На пример, те шај те дознајне сар ој шај те поможинел туке те ачхове позитивно, читин и статија „Како да се справиш со стресот“.

• И Библија дела амен надеж баши иднина (Римјања 15:4). Ој точно објаснинела аменге со шај те очекујна акана хем ки иднина, а адава поможинела аменге те на нашава амари надеж, иако иси добором проблемија ко свето.

Те шај те овел тут целосно корист тари Библија, канинаја тут бесплатно те проучине и Библија е Јеховаскере сведоконцар.