Превише тато време ко цело свето ко нилај ко 2023 берш — Со вакерела и Библија?

О мануша ко цело свето трпинена о тато време повише него било кеда англедер хем доживинена јавера катастрофе со керела лен о превише тато време. Дикх о следна извештаија:

„Акава сине о најтато јуни џи акана откеда о мануша почминѓе те меринен о температуре ко цело свето, англедер 174 берш“ (National Oceanic and Atmospheric Administration, U.S. Department of Commerce, 13 јули 2023).
„И Италија, и Шпанија, и Германија хем и Полска соочинена пе баре татипаја, а ко островија Сицилија хем Сардинија, очекујнела пе о температуре те уклен џи ко 48 степенија. Акаја температура шај те овел и најбари која со сине мерими ки Европа“ (European Space Agency, 13 јули 2023).
„Сар и пхув овела потати, очекујнела пе те овел почесто хем бут баре бршима, кола со ка анен џи ко баре поплаве“ (изјава таро Стефан Ухленбрук, директори ки Светско метеоролошко организација, 17 јули 2023).

Дали сиан секиримо таро акала извештаија башо асавко време? Дикх со вакерела и Библија баши акаја важно тема.

Дали асавко време тано пророкујмо ки Библија?

Оја. О баро татипе ко цело свето хем јавера климатска промене тане ко склад адалеа со вакерела и Библија башо амаро време. На пример, о Исус пророкујнѓа кај „адава со ка дикхен о мануша ка даравел лен хем ка овен баре знакија таро небо“ (Лука 21:11). Адава со о температуре бут бајрона, керела бут мануша те даран кај ка нашти те живинел пе ки пхув.

Дали и пхув ка овел тхан коте со ка нашти те живинел пе?

На. О Девел керѓа и пхув те шај о мануша те живинен ки лате засекогаш, ов нане те дозволинел о мануша те уништинен и пхув (Псалм 115:16; Проповедник 1:4). Наместо адава, ов ветинела кај ка „уништинел околен со уништинена и пхув“ (Откровение 11:18).

И Библија сикавела кај о Девел шај хем ка заштитинел и пхув таро катастрофе.

„[О Девел] чхинавела и бура хем смиринела о морска бранија“ (Псалм 107:29). Е Девле иси ле моќ те контролиринел о природна силе. Ов шај те поправинел о проблемија со авена таро катастрофе кола со предизвикујнена о мануша те циден муке адалеске со иси бут баре климатска промене.
„Ту грижинеа тут е пхувјаке хем керѓан ој те дел бут плодија хем те овел барвали“ (Псалм 65:9). О Девел ка керел и пхув те овел рај.

Те шај те дознајне повише башо библиска ветувања кај ка овел шукар промене ки пхув, дикх и статија „Дали човекот ќе ја уништи Земјата?“